रोमि 3
3
1हाट्ले हिट्डे भोने याहुदि लिमा पाक् फाइदा चा वाइना इ टे? आथाबा खाताना चोक्माना रिङ्ङाना पाक्चा मुल्ले वाइना इ टे? 2छेम्बा डोक्, याहुदि लिमाउङ् सोब्बे खालेङाना फाइदा युङ्ग्वा॥ सोब्बे नुङ्ना पाइलेउम् माङ्हाङ्ङा उन्ङाना सेङ्सेङ्ना रिङ् याहुदिचि पिडुचे॥ 3ना रिङ् छेम्बा डोक् इम्टेप्मा याहुदिचिङा माङ्हाङ्ङि ओचोगुना चामारसिङा पालान् ओचोग्वाट्टुन्॥ हिट्डे भोने आम्टेप्माङा पालान् ओचोग्वाट्टुन्ना कारानङा डोक् माङ्हाङ्ङा उन्ङा चोगुना चामारसिङा चोगुन्ना इ टे? 4हिड्डे माखाक्, ख्वाप्पा याप्मिचि माङ्जो रिङ् ओचेक्चा, माङ्हाङ् माङ्जो चेक्निना॥ उन्ङाना बारेङि धारमाछाप्लाङि नाड्डे छेप्टेसे,
“खान्ङा जे आमाट्टुचा हिट्ना छेम्बाना रिङ् नुङ् पारमान् लियुक्,
हिट्नुङ् जब याप्मिचिङा खान् न्याए माचोक्युक्, खान्ङा आमेट्टुचिचि॥”#छाम्लोमा छाप्ला ५१:४
5टरो आनिना ओचाफेन्ना चाट्लाङा माङ्हाङ्म्बाक् धारमि नुङ् आझै याप्मिचि पारचिन्दा ठेट्लोक् चोगुटु भोने, हाट्ले आन्याँ पाक् माट्टुम्माना टे? आनि याप्मि लिसिनाँ याप्मिङा निङ्ग्वा चोगु गाड्डे माङ्हाङ्ङा आनि साजाए पिमाम्बाक् उन्ङा नुना चोग्वाट्टुन् नुङ् माप्मा हिडुम्टुम्॥ टरो पाक् आनि हिड्डे माप्मा हिडुम्टुम्नि टे? 6हिट्डे माप्मा हिनिम्ना, पोङ्भोने माङ्हाङ्ङा नुलोक् ओयाप्मिचि न्याए चोगुन्चिन्गा भोने, खोड्डेउङ् ना नाराङिगा आरु याप्मिचि नुलोक् न्याए चोक्मा हिडुचिचिगा टे? 7टरो कोइ-कोइङा नाड्डे चा माप्मा उहिडुए बे, “आङा चोगुङ्ना ओभेन्ना रिङ्ङा माङ्हाङ् बिस्वासयोग्ए वाहेट् नुङ् पारचिन्दा चोगुटु हिट्नुङ् उन्ङा आझै मान् टोगुटु भोने, पोङ् हाट्ले चा आङा कायाङ्छाबा गाड्डे माङ्हाङ्ङा साजाए याङ्पियुक्ना टे?” 8कोइ ओचाफेन्गा याप्मिचिङा नाड्डे ओमाट्टुगा, “भेन्गा रिङ् चोगुमुङ् ओचेट्नुना रिङ् टाडुटु भोने, हाट्ले आनि ओभेन्ना रिङ् डोक् चोगुम्याक्टुम्॥” हिट्नुङ् कोइ-कोइङा आन्याँ नाड्डेगा रिङ् हिसिक्टुम्चिम्चिम्मा नुङ् फाट्टुर याप्मिलाबेसे, टरो हिट्ना रिङ् छेम्बाना माखाक्॥ हिट्डेगा रिङ् उपिग्गा याप्मिचि माङ्हाङ्ङा साजाए पिडुचिचि॥
धारमोति साक्चा वाइना
9हिड्डे भोने पाक् आन्याँ याहुदिचि आरु याप्मिचि नुङ्ना आझै ओचेट्नुगा इ टे? हिड्डे माखाक्॥ पोङ्भोने आङा पाइले डोक् लोमा हिनाइनाने, याहुदिचि उलियाक् आथाबा पानिछोङ्बाचि ख्वाप्पा याप्मिचि पापङा लिन्डुएसुचे॥ 10धारमाछाप्लाङि नाड्डे छेप्टेसे–
“धारमोति साक्चा वाइना, ठिबाङ् चा वाइना,
11माङ्हाङ् बारेङि बुजा चोक्मा कोन्ना हिट्नि साक्चा वाइना,
हिट्नुङ् माङ्हाङ् काकोम्बा हिट्नि साक्चा वाइना॥
12सोब्बेङा माङ्हाङ् ओनाडुएसुए हिट्नुङ् माङ्हाङ्लाउङ्सा बेकामे उलिसेसे॥
साक्ङा चा ओचेट्नुना टोॽवा ओचोगुन्गा, ठिबाङ् चा वाइना॥”#छाम्लोमा छाप्ला १४:१-३; ५३:१-३
13“हिट्नागाँगा रिङ्उम् होङ्ना ओहुम्पालाम्मा होन्ना चिम्मा फुट्टुम्ना डुङ्डुङ् नाम्ना गाड्डेना ए,
हिट्नागा ढाँट् एडोक् ओफोक्गा॥”#छाम्लोमा छाप्ला ५:९
“हिट्नागाँ ओमाट्टुगा रिङ् बिखालु ओप्पुङाना बिख गाड्डेना ए॥”#छाम्लोमा छाप्ला १४०:३
14“हिट्नागा उन्चि यासिलाम्मा माङ् ओभेन्गा रिङ् लोक् साराप एडोक् ओचेक्गा॥”#छाम्लोमा छाप्ला १०:७
15“हिट्नागा याप्मि सेप्मा एला एला ओचोग्गा॥
16हिट्नागा खोनि खोनि ओखाट् चा जाखाम् ओचोगुगा हिट्नुङ् याप्मिचि याङ्छामा उपिडुचिगा,
17हिट्नुङ् हिट्नागा आरुलोक् हाङ्हाङ् युङ्मा निङ्ग्वा ओचोगुन्गा॥”#यासैया ५९:७-८
18“हिट्नागा इम्टेप्मा चा माङ्हाङ्लोक् उकिट्निगा॥”#छाम्लोमा छाप्ला ३६:१
19हाट्ले धारमाबिधिङा जे रिङ् माट्टुटु हिट्ना धारमाबिधिङाना आधिन्ङि उलिगा याप्मिचिलाउङ्सा माट्टुना रिङ् नुङ् आन्याँ ठाहा टोगुम्टुम्मा॥ नाड्डेउङ् साक्लोक् चा पाक्चा माप्माना रिङ् लिनिना हिट्नुङ् नाराङिगा ख्वाप्पा याप्मिचि माङ्हाङ्ङाना न्याए सोरि येप्मा कोन्युक्॥ 20पोङ्भोने धारमाबिधिङिना रिङ् पालान् काचोक् साक्चा माङ्हाङ्ङा धारमोति ठाहाराँ चोगुन्चिन्गा॥ बोरु धारमाबिधिङाम्टे पाप चोगुएसुम्मे नुङ् आनि आनिमेट्युक्॥#छाम्लोमा छाप्ला १४३:२; गालाति २:१६
माङ्हाङ्ङा याप्मिचि धारमोति चोगुचिचि
21टरो हाट्लेम् माङ्हाङ्ङा याप्मिचि धारमाबिधि माले डोक् खोड्डेउङ् धारमोति चोगुचिचिगा हिट्ना रिङ् उन्ङा आनिमेट्टेसे॥ ना रिङ् बारेङि डोक् धारमाबिधि हिट्नुङ् माङ्काटाचिङा ओमाट्टुएसुए॥ 22येसु खिरिस्टङि बिस्वास काचोक् जुन् याप्मि चा माङ्हाङ्ङा धारमोति याप्मि चोगुटु, पोङ्भोने उन्ङा खोना चा साम्डुन्चिन्गा॥#गालाति २:१६ 23पोङ्भोने सोब्बे याप्मिचिङा पाप ओचोगुएसुए, हिट्नुङ् माङ्हाङ्ङाना माहिमा टोक्मालाम्मा लाप्माङ् उलिसेसेए॥ 24टरो माङ्हाङ्ङा उन्ङाना मायादाया आनि आपिडे हिट्नुङ् धारमोति आचोगे॥ उन्ङा खिरिस्ट येसुलाम्मा आनि पापङाना साजाएलाम्मा छुट्कारा आपिडे॥ 25माङ्हाङ्ङा खिरिस्ट येसु आनि पाप लाउङ्सा भोक् लिमा पाङ्सुए, हिट्नुङ् उन्ङि बिस्वास काचोक् याप्मिचिगा पाप ओहेलिक् वेडुङ् टुगुबिडुएसुचे॥ माङ्हाङ्ङा ना टोॽवा चोगुङ् उन् धारमोति नुङ् आप्पेलाउङ्सा पारकाट् चोगुए, पोङ्भोने पाइले माङ्हाङ् आड्डिक् धैइरे चोगे, हिट्नुङ् याप्मिचिङा ओचोगुना पापङाना साजाए पिडुवाट्टुन्चिन्॥ 26ना बेला माङ्हाङ्ङा उन् नुना नुङ् आनि फेरि आनिमेट्टेसे॥ हिट्डेउङ् उन्ङा माहामालोक् न्याए चोगुटु नुङ् आनिमेट्टेसे, हिट्नुङ् येसुङि बिस्वास काचोक्चि ओनाभाक्ङि माहामागा नुङ् लोडुचिचि॥
27हिड्डेउङ् आनि आप्पे आनिना धारमिक्ताङि काइले चा ठेलोक् चोक्मा हिडिन्ना॥ पोङ्भोने येसुङि बिस्वास चोगुमुङ् एडोक् आनि धारमोति याप्मि लिसिटि, धारमाबिधि पालान् चोगुमुङ् माखाक्॥ 28नाड्डेउङ् धारमाबिधिङिगा रिङ् पालान् चोगुमुङ् माखाक्, टरो खिरिस्टङि बिस्वास चोगुमुङ् एडोक् माङ्हाङ् सोरि धारमोति लिसिटि नुङ् माप्मा हिडुम्टुम्॥ 29हाट्ले खानि खोड्डे आमिट्टिटिगा? पाक् माङ्हाङ् याहुदिचिगा एडोक् माङ्हाङ् इ टे? पाक् उन् पानिछोङ्बा याप्मिचिगा चा माङ्हाङ् माखाक् इ टे? छेम्बा डोक्, उन् सोब्बे याप्मिचिगा माङ्हाङ् ए॥ 30पोङ्भोने माङ्हाङ् ठिक् एना ए॥ हिट्नुङ् उन्ङा याहुदिचि उलियाक्, पानिछोङ्बाचि उलियाक् ख्वाप्पा उन्चि बिस्वासलाम्मा डोक् धारमोति चोगुचिचि॥#धारमाबिधि ६:४; गालाति ३:२० 31पाक् बिस्वासङा ना धारमाबिधि बेकामे चोगुटु नुङ् खानि आमिट्टिटिगि? हिट्डे माखाक्, आन्याँ येसु खिरिस्टङि बिस्वास चोगुम्टुम्मा भोने, धारमाबिधि आझै काम लाहाब् लिना नुङ् आन्याँ बिस्वास चोगुम्टुम्मा॥
Currently Selected:
रोमि 3: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
