रोमि 2
2
माङ्हाङ्ङाना धारमिक् न्याए
1हाउ आसाइबाचि, खानिङा आरु फाट्टुर लाब्मा हिडुम्चिम्चिम्मा नुङ् आमिट्टिटि होला, टरो खानि जोसुकै आलिसि चा, खानि लाउङ्सा पाक्चा माप्माना रिङ् वाइना॥ जब खान्ङा आरु न्याए आचोगुचिचि, खान्ङा आप्पेलाउङ्सा चा न्याए आचोगुटु, पोङ्भोने खान्ङा चा हिट्नागाँ ओचोगुना रिङ् डोक् आचोगुटु॥#मात्ति ७:१; लुका ६:३७ 2माङ्हाङ्ङा नाड्डेगा ओभेन्गा टोॽवा ओचोग्गा याप्मिचि सात्ते रिङ्ङाना आधारङि डोक् न्याए चोगुचिचि नुङ् आनि ठाहा टोगुम्टुम्॥ 3हिट्डेउङ् खानिङा हिट्ड्डेना टोॽवा ओचोग्गा याप्मिचि न्याए आचोगुम्चिम्गा, हिट्नुङ् खानि आप्पेङा चा हिट्ना टोॽवा डोक् आचोगुम्टुम् भोने, पाक् माङ्हाङ्ङा साजाए आपिनिना नुङ् खानि आमिट्टिटिगि? 4माङ्हाङ् आड्डिक् दाया हिट्नुङ् धैइरे काचोक्बा ए, उन्ङा खानि फेराँ लिसानि नुङ् माहाङ्सेट्टि, टरो पाक् खानिङाम्बाक् उन्ङाना दाया पाक् गाड्डेना चा माखाक् नुङ् आमिट्टिटिगि? पाक् खानि खानि पापलाम्मा नोक्टानि नुङ् माङ्हाङ्ङा दाया माचोगिना रिङ् खानिङा ठाहा ओटोक्निम्नै? 5टरो खानिउम् जिद्दि, हिट्नुङ् काएल्-काबु लिमा आटेन्डिन्गा, हिट्डेउङ् माङ्हाङ्ङाना ओरेक् टाना बेला लाउङ्सा खानिङा आप्पेङा टोक्माना साजाए जोम् आचोगुएट्टुम्॥ हिट्ना बेला ख्वाप्पा याप्मिचिङा माङ्हाङ्ङाना धारमोति न्याए उनिसुटु॥ 6हिट्ना बेला माङ्हाङ्ङा ख्वाप्पा याप्मिचिलाउङ्सा उन्चिङा ओचोगुना टोॽवा गाड्डे खोना रिङ् पिमा ओचेट्नु लियुक्ना हिट्ना रिङ् डोक् सोब्बेलाउङ्सा पिडुचिचि॥#छाम्लोमा छाप्ला ६२:१२; हितोपोदेस २४:१२ 7जुन् याप्मिचिङा ओचेट्नुना टोॽवा ओचोगुयाक्टुटु, माङ्हाङ्ङाना माहिमा, मान् चोक्मा, हिट्नुङ् सिनिना चोला लाउङ्सा उहिङ्युक् हिट्नागा माङ्हाङ्ङा लाट्निना चोला पिडुचिचि॥ 8टरो आप्पे लाउङ्सा एडोक् माया काचोक्, छेम्बाना रिङ् पालान् ओचोगुन्गा, हिट्नुङ् ओचाफेन्मा टोॽवा काचोक् याप्मिचि माङ्हाङ्ङा आड्डिक् टुक्ना साजाए पिडुचिचि॥ 9छेम्बा डोक्, ओचाफेम्मा टोॽवा काचोक् ख्वाप्पा याप्मिचिङा आड्डिक् टुक्ना याङ्छामा ओआङ्डुटु, ना रिङ् पाइला याहुदि याप्मिचि उठुङ्ङि ठायुक् डोक्, हिट्नुङ् पानिछोङ्बाचिङि चा लियुक्॥ 10टरो ओचेट्नुना टोॽवा काचोक् ख्वाप्पा याप्मिचिगा निङ् माङ्हाङ्ङा टो-टो चोगुबिडुचिचि, हिट्नुङ् हिट्नागाँ मान् हिट्नुङ् सान्ति ओटोगुटु, हिट्ना चा पाइले याहुदिचिङा ओटोगुटु डोक्, हिट्नुङ् पानिछोङ्बाचिङा चा ओटोगुटु॥ 11पोङ्भोने माङ्हाङ्ङा साक्चा टो यो चोगुन्चिन्गा॥#धारमाबिधि १०:१७
12पानिछोङ्बाचिलोक् माङ्हाङ्ङाना धारमाबिधि वानेट्निना हिट्नुङ् हिट्नागाँ धारमाबिधि ठाहा ओटोगुन्गेट्टुन्चा पापङा जाखाम् चोगुचिचि॥ हिट्नुङ् याहुदिचिलोक् माङ्हाङ्ङाना धारमाबिधि युङ्ग्वा, हिट्नागाँ पालान् चोक्मा उहिडुवाट्टुन् भोने, धारमाबिधि आनुसार डोक् माङ्हाङ्ङा हिट्नागा साजाए पिडुचिचि॥ 13पोङ्भोने धारमाबिधिङिगा रिङ् काखेम्बा याप्मिचि माङ्हाङ् ओटोकानाङि धारमोति लिमा उहिनिगा, टरो धारमाबिधि पालान् काचोक्चि एडोक् माङ्हाङ्ङा धारमोति चोगुचिचि॥ 14पानिछोङ्बाचिलोक् मोसाङा छेप्टुना याहुदिचिगा धारमाबिधि वानेट्निना॥ टरो हिट्नागालोक् धारमाबिधि वानिचा हिट्नागाँ धारमाबिधिङा माट्टु गाड्डे ओचोगुटु भोने, उन्चि निङ्ग्वा डोक् धारमाबिधि गाड्डेना ए॥ 15हिट्नुङ् हिट्नागाँ ओचोगुना रिङ्लाम्मा उन्चि निङ्ग्वाङि धारमाबिधिङिगा रिङ् छेप्टेसे नुङ् पारकाट् लियुक्॥ हिट्नुङ् आप्पे उन्चि निङ्ग्वाङा चा हिट्ना ठिक्का डोक् ओमाट्टुटु, पोङ्भोने हिट्नागाँ ओचोगुगा टोॽवा चा खोनाम्बाक् माहामाना, खोनाम्बाक् माङ्जोना नुङ् उन्चि निङ्ग्वाङा ठाहा ओटोगुटु॥ 16हिट्ना लेम्बा टायुगेट् जाबो माङ्हाङ्ङा खिरिस्ट येसु याप्मिचिगा उन्चि निङ्ग्वाङि ठोबागा रिङ्ङाना न्याए काचोक्बा चोगुटु॥ ना रिङ् डोक् आङा नुना खाबोर पारचार चोगुङ्नाँ माट्टुङ्टुङ्॥
याहुदिचि हिट्नुङ् धारमाबिधि
17हाट्ले खानि आप्पेलाउङ्सा याहुदि याप्मि नुङ् आमाट्टुम्गा हिट्नुङ् धारमाबिधिङि भोरोसा आयुङ्सुम्गा, हिट्नुङ् माङ्हाङ् इम्टेप्मा माङ्ठेना नुङ् घामान्डि रिङ् आमाट्टुम्गा॥ 18खानिङा धारमाबिधि पोढाँ आचोगुमुङ् खोना रिङ् छेम्बाना हिट्नुङ् माङ्हाङ्ङा निङ्ग्वा चोगु गाड्डे खोड्डे पारिक् वामाना हिट्ना रिङ् ठाहा आटोगुएसुम्मे॥ 19हिट्नुङ् खानिङाम्बाक् हिट्नागा माङ्हाङ्ङाना लाम्बो ठाहा ओटोगुन्गेट्टुन्गा लाउङ्सा लाम्बो आनिमेट्टुम्चिम्गा याप्मिचि नुङ् खानिङा बिस्वास आचोगुम्टुम्, हिट्नुङ् खानिम्बाक् डुम्बारिक् डुम्ङि उलिसागा याप्मिचिगा लाउङ्सा व्हाङ् गाड्डेगा ए॥ 20खानिङा धारमाबिधिलाम्मा माङ्हाङ्ङाना बारेङि छेम्बाना रिङ् ठाहा टोगुम्मागा नुङ् खानि आप्पेङा आमाट्टुम्गा, हिट्डेउङ् खानिङा पाक्चा बुजा ओचोगुन्गा हिट्नुङ् पिच्छाचि गाड्डेगा याप्मिचि हिसिक्माचि कोनुयुक् नुङ् आप्पेलाउङ्सा आमिट्टुम्गा॥ 21खानिङा आरु आहिसिक्टुम्चिम्गा, टरो आप्पेम्बाक् पोङ् सिकाँ आलिसिन्गा? खानिङा याङ्खुट्मा लिनिगा नुङ् आहिसिक्टुम्चिम्गा, पोङ् आप्पेम्बाक् याङ्आखुट्टुम्टुम्गा? 22खानिङा याप्मिचि इम्मेप्माजामा टोॽवा चोक्मा लिनिना नुङ् आलोडुम्चिम्गा, पोङ् खानि आप्पेङाम्बाक् इम्मेप्माजामा टोॽवा आचोगिटिगा? हिट्नुङ् खानिङा साम्माङ्चि चिम्मा आफुट्टुम्गा, टरो पोङ् पानिछोङ्बाचिगा माङ्ठानाङि उलिसागा थोक्चि याङ्आखुट्टुम्टुम्गा?#२:२२ आम्टेप्मा याहुदिचिङा उन्चि पाङ्ङि साजाँ चोक्माउङ्सा पानिछोङ्बाचिङा उन्चि साम्माङ्ङि भोक् ओठाङ्सुगा थोक् याङ्उखुट्टुगा डागा॥ आरुङाम्बाक् याङ्उखुट्गा थोक्चि ओछोङ्सुगा डागा॥ टरो चा, मोसाङाना धारमाबिधिङा नागा सोब्बे थोक् चोक्मा छाक्टुटु॥ धारमाबिधि ७:२५ 23धारमाबिधि खानिलोक् युङ्ग्वा नुङ् ठेलोक् आचोगिगा, टरो खानिङा माङ्हाङ् मान् आचोक्निम्ना, पोङ्भोने खानिङा धारमाबिधि पालान् आचोक्निम्ना॥ 24धारमाछाप्लाङि नाड्डे छेप्टेसे, “खानि याहुदिचिङा आचोगुम्नाँ डोक् पानिछोङ्बाचिङा माङ्हाङ् बिरुद्दाङि ओचाफेन्लोक् ओमाट्टुएसुए॥”#यासैया ५२:५
25खानिङा धारमाबिधि पालान् आचोगुम्टुम् भोनेम्टे खाताना चोक्मा ओचेट्नु डोक् ए, टरो धारमाबिधि पालान् आचोक्निम्ना भोनेम्टे खाताना ओचोगुन्गा याप्मिचि गाड्डे डोक् खानि आलिसिटि॥ 26खाताना ओचोगुन्गा पानिछोङ्बाचिङा धारमाबिधि पालान् ओचोगुटु भोने, माङ्हाङ्ङा हिट्नागा खाताना उलिसागा गाड्डे डोक् मिट्टुचिचि॥ 27हिट्नाडे लिसानाँ उन्चि येम्ङि खाताना ओचोगुन्गा पानिछोङ्बाचिङा धारमाबिधि पालान् ओचोगुटु भोने, हिट्नागाँ डोक् खानि फाट्टुर मालाबिटि॥ पोङ्भोने खानि खाताना काचोक्बा याहुदिचिलोक् छेप्बालाक् धारमाबिधि लिचा खानिङा आझै धारमाबिधि पालान आचोक्निम्ना॥ 28पोङ्भोने याप्मि याहुदि गाड्डे निङ्युङ् एडोक् हिट्नुङ् भारा ओयेम्ङि खाताना चोक्माना रिति चोगुङ् एडोक् माङ्हाङ्ङाना छेम्बाना याहुदि लिमा हिनिना॥ 29टरो छेम्बाना याहुदिम्बाक् उनिङ्ग्वालाम्मा लिमा कोन्युक्, हिट्नुङ् छेम्बाना खाताना चोक्माम्बाक् धारमाबिधि गाड्डे भारा येम्ङि चोक्माना रिङ् एडोक् माखाक्, टरो नाउम्बाक् सेङ्सेङ्ना हाङ्सालाम्मा निङ्ग्वाङि चोक्माना रिङ् ए॥ नाड्डेना याप्मिङाना निङ् चोन्डुना माङ्हाङ्ङा उनिङ्ग्वा टासुटु, याप्मिचिङा माखाक्॥#धारमाबिधि ३०:६
Currently Selected:
रोमि 2: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
