2 MAKORINTIYO 5

Makazi yarilindrao pev̄oni

1Mana wasi risujua amba neka liɓanga la haima lini riliketsiao ulemenguni v̄anu liangamidziwa, rina pev̄oni v̄ahanu v̄wa uketsi v̄wafanyiwa na Mungu, makazi ya daima kayafanyiwa ha yimihono ya wanadamu. 2V̄anu rilio risuulula, risutumainia ha kusudi ripindrisiwe makazi ya shi pev̄oni yatru, 3mana ramopindrisiwayo, karitsoparihana wadzi. 4Ɓaanda rilio hari mwa liɓanga la haima la shi ulemenguni lini, risuulula ha udziro wa umudzo rautrika, wala tsi amba risutsaha ritsulwewo, ɓadi ripindrisiwe inyumba ya pev̄oni ile, pare ile ilio mufa, imedzwe na uhayati. 5Na Uwo aritayarisha ya umugaudzio uwo ɗe Mungu, alio amba ariv̄a iRoho ike fungu la handra la piya izo arilishiazo.

6Ɓasi ha izo, wasi ha dahari rina tama, iv̄o rijuao amba pindri rilio hatru hari mwa umwili uwo, risuka mbali na Raɓi. 7Mana risendra ha uaminifu, ɓadi tsi ha uona. 8V̄av̄o rina tama, tsena risuona ɓorwa rilawiye hari mwa umwili, ne rike ha Raɓi. 9Iyo ɗe imana wajau ata riliona nia ya umujiv̄idza, neka amba ra hari mwa umwili, au ramoulawia. 10Mana piyasi, ilazimu riv̄ire hari mwa mahakama ya Kristi, ile kula mutru apare zamulazimu ulawana na izo azifanya wakati aka hari mwa umwili, neka ndjema, au mbovu.

Muparanisio na Mungu ha ndzia ya Kristi

11Rangu rijuao itrongo ya umuria Raɓi, risutsaha riyakinishe wanadamu. Mungu ujua inamuna yatru, tsena nisutumaini amba moni na nafusi zanyu musuijua wajau. 12V̄anu karisudziaminisa mbeli zanyu raha, ɓadi risumuv̄ani furswa ya udziɓua ha siɓaɓu ya wasi, ile mushindre mudjiɓu wao wadziɓuao na zile zionehanao, ɓadi tsi na zilio rohoni. 13Mana neka amba rifanyiha wajinga, ɗe ha tanafu ya Mungu, na neka rina ãkili zatru, ɗe ha tanafu yanyu. 14Mana uv̄endza wa Kristi usurifarudhisha, iv̄o riliona yakini na zini: moja afu ha faida ya piya. Ɓasi v̄av̄o piya wafu. 15Na neka afu ha faida ya piya, v̄av̄o pare wao walio hayi wasuẽshi tsena ha faida yawo wenyewe, ɓadi ha faida ya ule afa, tsena aregezewa hayi ha faida yawo.

16Ha izo rangu v̄anu, karisuangalia atsokao yotsi ha shiuɓinadamu. Wala ukana rakomuangalia Kristi ha shiuɓinadamu, av̄asa karisumuangalia tsena namuna ile. 17Ɓasi neka mutru ana uv̄umoja na Kristi, v̄av̄o afanyiha shiumbe pia: za hale ziv̄iri, tsizini zilio pia zija. 18Na piya ulawa ha Mungu, alio amba ariparanisa na waye ha ndzia ya Kristi, tsena aridhwaminisha urumishi wa umuparanisio. 19Mana Mungu aka ha Kristi, akoparanisa ulemengu na iwaye yahe, ɓila uangalia mahosa ya wanadamu, tsena atria hatruju urongozi wahusu umuparanisio. 20Ɓasi wasi mawakala wa Kristi, na Mungu waye-waye ɗe amuhiraoni ha ndzia yatru. Risumumiani ha lidzina la Kristi, namudzilishe muparanisiwe na Mungu. 21Uwo alio amba kajua dhambi, Mungu amufanya dhambi ha tanafu yatru, ile ha waye rifanyihe wendza haki wa Mungu.

Currently Selected:

2 MAKORINTIYO 5: swb

Highlight

Copy