2 MAKORINTIYO 4

Urumishi wa Ɓaulusu na wanyahe, ɗe umujudzio amba Insa-Kristi ɗe Raɓi

1Ha izo, iv̄o riliona urumishi uwo ha urehema radjaãliwawo, karisupuha ɓari. 2Risuhara trongo za siri zipatsao aĩɓu; karisudziv̄inga ha udjandja, wala karisuɓuzudza urongozi wa Mungu. Ɗe ikinyume amba, ha uvumbua ikweli, risudzieleha hari mwa likoho la unamuzi wa kula mwanadamu mbeli za Mungu. 3Neka iIndjili yatru raha ifinikiha shitamba, v̄av̄o ifinikiha ha wao wandrao waangamiye, 4wao walio amba kawasuamini. Ãkili zawo ziɓalwa matso na umutawalizi wa lidunia lini, ha namuna amba wasuone umuwalio wa iIndjili ya utukufu wa Kristi, alio umufano wa Mungu. 5Kweli amba tsi ɗe wasi wenyewe ɗe ridzijudzao; risumujudza Insa-Kristi amba waye ɗe Raɓi, na wasi ra warumwa wanyu ha siɓaɓu ya Insa. 6Mana Mungu Monyewe arongoa: «iHeu naiwaliye ishidza»#4:6 Namuangaliye Mwandro 1:3., awala moni na iroho yatru, ile awalise ujuzi wa utukufu wahe Mungu hari mwa isura ya Kristi.

Dafine moni mwa ziya za ɗongo

7Ɓadi idafine iyo risuiv̄inga moni hatru, wasi rilio ziya za ɗongo, ile ushindzi kauna mufano unu uonehane amba ulawa ha Mungu, ɓadi tsi hatru. 8Risongwa ha kula namuna, ɓadi karatseresewa; riɓaɓanyiha, ɓadi karalawa tama; 9risutreswa, ɓadi karahalwa; riuswa, ɓadi karaangamia. 10Risuv̄inga daima moni na umwili watru ufa wa Insa, pare uhayati wa Insa uv̄enuhe wajau mwiliju hatru. 11Mana wasi rilio hayi, ha daima risuv̄elehwa hari mwa hatwari ya ufa ha siɓaɓu ya Insa, pare uhayati wa Insa wajau uv̄enuhe hari mwa umwili mufa watru. 12Ha izo, moni hatru ufa ɗe urendrao, ɓadi moni hanyu, ɗe uhayati.

13Na ha iv̄o riliona roho wiyo-wiyo ya uaminifu na iyo yaangihwa amba: «Tsiamini, ɗe imana ata nalagua#4:13 Tsiamini, ɗe imana ata nalagua: Namuangaliye Utende 116:10.», ɓasi wasi wajau risuamini, ɗe imana ata rilaguao. 14Mana risujua amba Uwo amuregeza hayi Raɓi Insa, atsoriregeza hayi wajau hari mwa uv̄umoja na Insa, tsena atsoritekeleza v̄umoja na wanyu mbeli zahe. 15Piya zizo ɗe ha siɓaɓu ya wanyu pare irehema, ha uendra na ujilia indadi zaidi na zaidi ya watru, izidishe umuhimidio, ha utukufu wa Mungu.

Uẽshi ha uaminifu

16Iyo ɗe imana ata karisupuha ɓari. Ata neka amba hatruju ɓuumbio la v̄ondze latru lisuangamia, ɓadi la moni lisufanyiha pia suku ha suku. 17Mana zitaãɓu ndzangu za leo ziriparao, zisuridzalia ha indadi kaina mupaka utukufu wa daima. 18Ha izo, wasi uangalia tsi ɗe zile zionehanao ha yamatso, ɓadi ɗe zile kazionehana. Mana zionehanao uv̄ira na ndzia, ɓadi izo kazionehana uka ha daima.

Currently Selected:

2 MAKORINTIYO 4: swb

Highlight

Copy