1 MATESALONIKA 5
5
Namuke tayari na isuku ya umuregeo wa Raɓi
1Ɓasi wananyatru, hari mwa isa na uwakati trongo zizo zitsohidjirio, tsi paka muangishiwe. 2Mana wanyu-wanyu musujua ha uzuri amba isuku ya Raɓi itsoja mauri mwidzi ukwari. 3Wakati watru watsorongoao amba: «Nafasi na hifadhwi za v̄av̄o!», ɓasi wakati uwo kamwe uangamifu utsowajilia ɓila udzilindrilia, mauri shikodza ha mutrumama mwendza hamili, amwesa kawatsoshindra watrala.
4Ɓadi wanyu, wananya wa shi uaminifu, kamusi hari mwa shidza amba isuku iyo imuhiliɓuni mauri mwidzi. 5Mana piyanyu mwa wana wa iheu na wana wa mutsana. Wasi karisi wa uku, wala wa shidza. 6Ɓasi ha izo, rasulale mauri wasalia, ɓadi narishese, tsena rike wazima. 7Mana wao walalao, ulala uku, na wao wadzilezao, ulewa uku. 8Ɓadi wasi rilio wa mutsana, narike hashiri. Naripindre uaminifu na uv̄endza, zirihifadhwi mauri ngwezi ya shuma, na itama ya uhuyifu mauri kofia ya shuma. 9Mana Mungu karilisha amba wa hadhaɓu zahe, ɓadi ripare uhuyifu ha ndzia ya Raɓi watru Insa-Kristi, 10alio amba afu ha tanafu yatru, ile neka risushesa au risulala#5:10 neka risushesa au risulala: iMana ya v̄av̄o: neka ra hayi au rifu., riẽshi hari mwa uv̄umoja na waye. 11Ɓasi ha izo, namutriane ɓari na uhodarishana, mauri ɗe inamuna madza muifanyao.
Maosio ya mwiso na masalamu
12Ɓasi wananya wa shi uaminifu, risumumiani, mustehi wao wadzirumao mengoni mwanyu, wamuv̄ingaoni hari mwa uv̄umoja wa Raɓi na umutahadharishani. 13Namuwav̄e hishima ha kusudi na mahaɓa, ha siɓaɓu ya urumishi wawo. Namukane amani wanyu na wanyu. 14V̄av̄o wananya wa shi uaminifu, risumutriani ɓari mufahamishe wendza musadjadja, muhodarishe wao wapuha ɓari, musaidiye walemevu, mukane suɓira mbeli za watru piya. 15Namutahadhari amba v̄usuke mutru aɗiv̄a mbovu ha mbovu, ɓadi ha daima namuendreleye hari mwa zindjema, rangu wanyu na wanyu, ata ha piya wanadamu.
16Ha daima namufurahi, 17mufanye mamilio ɓila uzia, 18hali yotsi mutsokao namushukuriye, mana hanyuju yao ɗe mav̄endzeleo ya Mungu hari mwa uv̄umoja na Kristi-Insa.
19Mwasuɓaliliye iRoho. 20Mwasudharau marongozi ya shi mutrume yashukidziwa, 21ɓadi namutwaliye piya zitrongo, musike zilio ndjema. 22Namudziɓalidze na kula aina ya mbovu.
23Ɓasi Mungu Monyewe utrulivu waye-waye namutwaharisheni ha ukamilifu piya nafusi yanyu, iroho, umo, na umwili, zilishwe ɓila tuhuma ha umuregeo wa Raɓi watru Insa-Kristi. 24Monyewe umuhirani waye muaminifu, na waye ɗe atsoifanyao.
25Wananyatru, namurimiliye wajau wasi. 26Namusalimu piya uwananya wa shi uaminifu ha masalamu matwaharifu. 27Nisumurayini ha lidzina la Raɓi, liɓarua lini nalisomewe ha piya uwananya wa shi uaminifu.
28iRehema ya Raɓi watru Insa-Kristi naimuendreleyeni.
Currently Selected:
1 MATESALONIKA 5: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
