1 MATESALONIKA 4

Maendreleo yamujiv̄iao Mungu

1Yaɓaki v̄anu wananya wa shi uaminifu, mupara ulawa na wasi namuna jeje ya udziv̄inga na umujiv̄ia Mungu, na iyo ɗe itrongo muifanyao. Av̄asav̄anu ɓasi, risumumiani na umutriani ɓari ha uv̄umoja na Raɓi Insa, namuendreleye raha ha uzidisha. 2Kweli amba musujua maosio ramuv̄aniwo ulawa ha Raɓi Insa.

3Mav̄endzeleo ya Mungu ɗe wanyu uka watwaharifu, mudzipukamanise na maendreleo maovu ya shahawa. 4Kula moja hari mwanyu najuwe asike umwili#4:4 umwili: Au: aẽshi na mushe wahe namuna yalazimu ha utwaharifu na hishima. Au raha: najuwe aziye umwili wahe ha utwaharifu na hishima. wahe ha shi utwaharifu na hishima, 5ɓila udzieleha na taɓia ya shahawa, mauri ɗe namuna wafanyao watru wa zinishani zangina kazimuji Mungu. 6Hari mwa itrongo iyo, v̄usuke mutru akosa mwananya wa shi uaminifu, wala amurendra mbi, mana Mola uɗiv̄ia piya trongo zizo, mauri ɗe inamuna madza ramuambianiyo na umuhakikishani. 7Mana Mungu karihira raẽshi hari mwa utshafi, ɓadi hari mwa utwaharifu. 8Ha izo, mutru aharao maosio yao kasuhara mwanadamu, ɓadi Mungu, waye kamwe amuv̄aoni Roho Ndzitwaharifu yahe.

9Hari mwa yahusu uv̄endzana wa shi unanya, tsi paka muangishiwe, mana wanyu-wanyu musomo ha Mungu amba muv̄endzane wanyu na wanyu. 10Mana madza musuifanya mbeli za piya uwananya wa shi uaminifu wa iMakadoniya|Makadoniya kamili. Na wasi risumutriani ɓari wananyatru amba muendreleye zaidi.

11Namufanye djitihadi ya uẽshi ha utrulivu na mudzishahilise na trongo zanyu wenyewe, tsena mufanye hazi ha yimihono yanyu, mauri ɗe inamuna madza ramusariɓiani, 12ile mudziv̄inge ha namuna yastahiki mbeli za watru wa shi v̄ondze, wala udzidjukumisa na mutru atsokao yotsi.

Muregeo wa Insa

13Wananya wa shi uaminifu, wasi karisutsaha yaka amba kamusujua zahusu wao wandra mbeli za Mungu, ile mwasusikitihe mauri ɗe wasalia walio amba kawasina tama. 14Mana ɓaanda riaminio amba Insa afariki tsena aregea hayi, v̄av̄o ɓasi risuamini raha amba Mungu atsov̄inga v̄umoja na Insa wao wafa hari mwa uv̄umoja na waye. 15Tsini ɓasi trongo rimuambiaoniyo, unu urongozi wa Raɓi: wasi wendza roho, wasi raha ritsoɓakio wakati wa umuregeo wa Raɓi, karitsotrangulia wao itsokao amba wafu. 16Mana Raɓi waye-waye atsoshuka ulawa pev̄oni ãmuri yamotolwa, v̄umoja na ji la umuɓole wa zimalayika, na ngono ya liɓaragumu la Mungu. V̄av̄o wao wafa hari mwa uv̄umoja na Kristi watsoregezewa hayi kadimu. 17Ɓaanda ya v̄av̄o wasi ritsoɓakio hayi ritsorengwa v̄umoja na wao mavinguni, ramupare Raɓi hawani. Na ha izo, daima ritsoka v̄umoja na Raɓi. 18Ɓasi v̄av̄o namutriane ɓari ha marongozi yao.

Currently Selected:

1 MATESALONIKA 4: swb

Highlight

Copy