2 MATESALONIKA 1
1
1Wami Ɓaulusu, v̄umoja na Silvanus#1:1 Silvanus: Dzina langina lahe Silasi. na Timutausu, ha iDjama Ndziwaminifu ya Matesalonika ilio hari mwa uv̄umoja na Mungu amma Ɓaɓatru na Raɓi Insa-Kristi: 2Urehema na amani zalawa ha Mungu amma Ɓaɓa na Raɓi Insa-Kristi nazimuendreleyeni.
Himida na mamilio
3Ha dahari irilazimu rimuhimidiye Mungu, wananya wa shi uaminifu, ha siɓaɓu ya wanyu. Iyo haki amba riifanye, mana uaminifu wanyu usuhua ha kusudi, na uv̄endza wa kula moja ha uwanyawe usendra na uengedzeha. 4Ha izo, risudziɓua ha siɓaɓu ya wanyu hari mwa ziDjama Ndziwaminifu za Mungu, ha ustahamilifu wanyu na uaminifu wanyu hari mwa piya matreso yanyu na maondo muyav̄irao.
5Uwo udhiɓitifu amba hukuma ya Mungu, iyo ya haki, pare muonehane amba mustahiki Utawalizi wa Mungu, ulio amba ha siɓaɓu yawo ɗe muondeshehao. 6Kweli Mungu wa haki: atsoondesha wao wamuondaoni, 7tsena amuv̄eni wanyu muondeshehao, uv̄umuzi v̄umoja na wasi, wakati wa umuv̄enulio wa Raɓi Insa ulawa mbinguni v̄umoja na malayika zendza ushindzi zahe. 8Atsov̄enuha moni na jenge la moro, ile aãdhiɓu wao kawasumujua Mungu na wao kawasutuĩ iIndjili ya Raɓi watru Insa. 9Watru wao, iãdhaɓu yawo itsoka uangamifu wa daima, mbali na isura ya Raɓi na utukufu wa ushindzi wahe, 10wakati isuku iyo atsojao atukuziwe ha watwaharifu wahe, na usifiwa ha piya wao itsokao amba waamini. Na wanyu wajau mutsoka, mana muamini ushahidifu watru.
11Iyo ɗe imana dahari rimufanyiaoni mamilio, ile Mungu watru amuoneni amba mustahiki muhirio wahe, tsena atsimidze ha ushindzi wahe kula nia ndjema mulionayo, na kula shitrendro muifanyao ha uaminifu. 12V̄av̄o lidzina la Raɓi watru Insa litsotukuziha hanyuju, na wanyu haheju, ha ulingana na irehema ya Mungu watru na ya Raɓi Insa-Kristi.
Currently Selected:
2 MATESALONIKA 1: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.