1 MONYE 3

Maẽsha hari mwa ndrolo

1Ɗe namuna iyo wanyu watruwashe, namudzituĩse ha waume wanyu, pare neka amba v̄wa waharao utuĩ Urongozi, waparihane ha maendreleo ya watruwashe wawo, ɓila urongozi utsokao yotsi, 2ɓadi ha uona maendreleo maraharifu yendza adaɓu yanyu. 3Mustawidzio wanyu usuke wa v̄ondze, hari mwa musukio nyole, muɗayidzio dhahaɓu, wala mupindrio nguo zendza thamani, 4ɓadi nauke wa moni wa utru wanyu, ustawivu kaukomo wa roho makini yendza utrulivu. Iyo ɗe itrongo ikao na faida ɓole mbeli za Mungu. 5Iyo ɗe inamuna hale oho watruwashe watwaharifu walio amba wakomutumainia Mungu wakodzistawidza, ha udzituĩsa ha watruwaume wawo, 6mauri ɗe Sara akomutuĩ Iɓrahima na umuhira mwalahe. Ɗe ha waye ɗe mwafanyiha wana ha ufanya ndjema, wala udzilisha muhafilishiwe na trisidzo#3:6 trisidzo: Mutru atsojua aelewe iShigiriki v̄anu tsena amba isurongoa: Musuriye zitrongo waziriaozo. litsokao lotsi.

7Ɗe namuna iyo wanyu watruwaume, namuẽshi na watruwashe wanyu ha ujua inamuna ndzambamba yawo. Namuwahishimu, iv̄o wao walazimu wawarithi v̄umoja na wanyu irehema ya uhayati, ile v̄wasuke trongo itsokao yotsi yaja yazia mamilio yanyu.

Uondesheha ha ufanya indjema

8Ha muhutaswari, namuke konyo moja piyanyu, namuoneane utungu, muv̄endzane shiunanya, muv̄orehane, mukane uwekevu. 9Mwasuɗiv̄e mbovu ha mbovu, wala shilihidzo ha shilihidzo. Ɗe ikinyume, namusopeleye, mana ha iyo ɗe mwahirwa, ile muwarithi ɓaraka. 10Kweli amba uMuangishio usurongoa:

«Neka mutru asutsaha afurahi maẽshani hahe,

tsena aone suku zendza raha,

naɓalidze ulimi wahe na mbovu,

na uzia hanyo yahe na marongozi yendza unafiki.

11Nadziɓause na mbovu, afanye indjema,

natsahe iamani, tsena aiɗunge.

12Mana matso ya Mola uka hari mwa uwendza haki,

na makio yahe uvulishia mamilio yawo.

Ɓadi isura ya Mola uka kinyume

na wao warendrao mbovu.»#3:12 Namuangaliye Utende 34:14-17.

13Ɓasi mbani ɗe atsomurendraoni mbovu neka muna djitihadi hari mwa indjema? 14Na wala ukana musuondesheha ha siɓaɓu ya ihaki, v̄av̄o muɓarikishiha. «Musukane trisidzo na wao, tsena mwasuɓaɓanyihe.»#3:14 Namuangaliye Izaya 8:12. 15Ɓadi namumuhetsi Kristi rohoni hanyu amba Raɓi. Ha daima namuke tayari ya udifaĩ itama mulionayo moni hanyu, mbeli za yotsi atsotsahao ajuwe, 16ɓadi namuifanye ha namuna ya shiuwekevu v̄umoja na hishima, na ukana roho yarahara, ile v̄ahanu kamwe musingidziwao, wao watefuao maendreleo mema yanyu hari mwa uv̄umoja wanyu na Kristi, waone haya. 17Ɓorwa mutru aondeshehe ha ufanya ndjema, neka yao ɗe yamav̄endzeleo ya Mungu, rahana uondesheha ha ufanya mbovu.

18Mana Kristi waye-waye ne aondesheha mara moja ɓas ha siɓaɓu ya madhambi ya wanadamu. Waye mwendza haki afariki ha tanafu ya tsi wendza haki, ile pare amuv̄ingeni ha Mungu. Aulawa umwili wahe, ɓadi aẽshisiwa ha iRoho. 19Na ha wiyo ɗe andra aĩdhia ziroho zafungwa, 20ne ɗe zizo zakohara utuĩ hale oho, wakati isuɓira ya Mungu yakolindra hari mwa zisuku Nuhu akofanya lidjahazi. Moni v̄walo v̄uhuyiwa hisaɓu titi ya wanadamu yapara wanane, ha uv̄irisiwa hari mwa maji. 21Na iyo ika mufano wa umuɓaĩsho umuhuyioni leo ini, muɓaĩsho ulio amba kausutoa tsama za umwili, ɓadi ulio miyadi mbeli za Mungu ha roho yarahara. Na uhuyifu uwo uparihana ha umuregezeo hayi wa Insa-Kristi, 22alio amba andre pev̄oni, a humeni ha Mungu, tsena zimalayika, ziyezi na zingushindzi zilazimishiwa umutuĩ.

Currently Selected:

1 MONYE 3: swb

Highlight

Compare

Copy