1 MONYE 4
4
Uẽshi shi mutru wa Kristi
1Ɓasi ha izo, iv̄o Kristi aondesheha mwilini, wanyu wajau namusike fikira ɗe wiyo-wiyo; mana mutru aondesheha mwilini, katawaliwa tsena na dhambi, 2ile aẽshi tsi ha zingushauku za wanadamu, ɓadi ha uɗunga yamav̄endzeleo ya Mungu hari mwa uwakati wamuɓakia aẽshi hari mwa umwili. 3Kweli amba wakati mwauv̄itsa nyuma oho ha ufanya mav̄endzeleo ya watru kawamuji Mungu utosho, mauri maẽsha yendza ushirikina, shahawa za peu, ulevi, malangadzo ya peu, karamu zilezao, na ĩɓada ndzilaãnifu za masanamwe. 4Isuwashangidza amba kamusendra tsena mbio v̄umoja na wao hari mwa trongo za shi ushirikina zatupa zile, ɓasi wasumushekedzani. 5Watsodzieledza mbeli za Uwo alio tayari ya uhukumu walio hayi na uwafu. 6Iyo ɗe imana amba ata ha uwafu, ne iIndjili ijudziwa, ile pare ɓaanda wanamulwa shi wanadamu mwilini, waẽshi shi roho mauri Mungu.
Murumishio wa neema za Mungu
7uMwiso wa piya zitrongo ukuruɓia. Ɓasi namukane zifikira zanyu, tsena muke hashiri, pare mufanye mamilio. 8Kaɓula ya piya, namuv̄endzane ha kusudi wanyu na wanyu, mana uv̄endzana, iyo ufinikia wengi wa madhambi. 9Namukariɓisane ɓila unguruma. 10Kula mutru narumiye ha wanyahe ineema adjaãliwayo; v̄av̄o mutsoka warumishi wema wa urehema wa namuna ha namuna wa Mungu. 11Neka mutru asulagua, nalaguwe shi mutru arongoao marongozi ya Mungu; neka mutru asurumishia, narumishiye ha zinguvu Mungu amudjaãliaozo, pare hari mwa piya zitrongo, Mungu atukuziwe ha ndzia ya Insa-Kristi, alio amba haheju utukufu na ushindzi zimuendrelea ha dahari. Amina.
Furaha ha monyewe uondesheha amba mutru wa Kristi
12Wanyu wav̄endzewa, musushange na lijenge la mudjereɓio limuv̄iriaoni, mauri mwakov̄iriwa na trongo imarusao. 13Ɓadi iv̄o murengao fuvu hari mwa yamatungu ya *Kristi, namufurahi ile pare hari mwa umuv̄enulio wa utukufu wahe, wanyu wajau mufurahi na ujiv̄iwa. 14Neka musunaziwa ha siɓaɓu ya lidzina la Kristi, v̄av̄o muɓarikishiha, mana iRoho yendza utukufu ya Mungu ya hanyuju. 15V̄usuke ata moja hari mwanyu aondesheha amba waye muula, au mwidzi, murendrezi-mbovu, au asupasiwa na trongo za watru, 16ɓadi neka amba iv̄o alio mutru wa Kristi, asuone haya; v̄av̄o waye namutukuze Mungu iv̄o av̄inga lidzina lilo. 17Mana uwo ɗe uwakati ihukuma ya Mungu iandrisao hari mwa umuraɓa#4:17 umuraɓa: Yaãni, uwatru wa Mungu. wahe. Na neka hari mwa wasi ɗe iandrisao, v̄av̄o utsoka jeje umwiso wa wao waharao utuĩ iIndjili ya Mungu? 18Na tsena amba:
«Neka umutuĩvu uhuyiwa ha udziro,
ɓasi atsoka jeje umovu na umufanyizi-madhambi?»#4:18 Namuangaliye Wasiya 11:31.
19Ha izo, wao waondeshehao ha yamav̄endzeleo ya Mungu, nawadhwaminishe nafusi zawo uMuumbizi alio muaminifu, ha wao urendra ndjema.
Currently Selected:
1 MONYE 4: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
