1 MONYE 2
2
1Namutsuwe ɓasi kula uovu, kula udangamanyifu, unafiki, uwivu, na kula musingidzio. 2Mauri wana wadzalwa av̄asa, namutsahe dzia swafi-swafi la shiroho#2:2 shiroho: Au: uUrongozi., ile ha wilo muhuwe, mupare uhuyifu, 3ɓaanda ilio amba «mulaulia uwema wa Raɓi.»#2:3 Namuangaliye Utende 34:9.
Ɓwe lilio hayi na umati watsahulwa na Mungu
4Namuje mumupare waye, Ɓwe lilio hayi, lalatswa na wanadamu, ɓadi latsahulwa na uonehana amba lendza faida ɓole mbeli za Mungu. 5Na wanyu-wanyu mauri mawe yalio hayi, namurumishihe hari mwa liɓundro la nyumba ya shiroho, mukane urumishi mutwaharifu wa Utolezi-Masadaka, ile mutowe masadaka ya shiroho, yakuɓalishiha na Mungu, ha ndzia ya Insa-Kristi. 6Mana v̄uangihwa moni na uMuangishio:
«Tsami nisuhetsi hari mwa iSiyuna|Siyuna
ɓwe#2:6 ɓwe: Ɓwe lini lirongolwao v̄anu, unu ɗe Insa. la nyongaju, ɓwe latsahulwa, tsena lendza faida,
na uwo aliaminio, katsojaya haya.»#2:6 Namuangaliye Izaya 28:16.
7Ɓasi v̄av̄o ha wanyu muaminio, ɓwe lilo lina faida halisi; ɓadi ha wao kawasuamini,
«Ɓwe lile maundrizi walilatsa,
lifanyishiha liɓwe mahususu la nyongaju.»#2:7 Namuangaliye Utende 118:22.
8Na tsena:
«Ɓwe likwalisao,
ɓwe-monye liusao.»#2:8 Namuangaliye Izaya 8:14.
Wao ulikwala, mana kawasutuĩ Urongozi. Na iyo ɗe itrongo wahetsiwayo.
9Ɓadi wanyu kaɓila yatsahulwa, Matolezi-Masadaka ya shiufalume, nishani ndzitwaharifu, umati Mungu adziparia, ile mujudze yimisifio ya Uwo amuhirani ulawa shidzani mwendre hari mwa iheu ndzitukufu yahe. 10Wanyu mulio amba hale hule kamwaka umati, av̄asa mufanyiha umati wa Mungu; wanyu mulio amba kamwaka mwapara urehema, av̄asa mupara urehema.
Maendreleo mazuri mbeli za watru
11Wav̄endzewa wangu, wanyu mulio wadjeni shiv̄andreju mwa tsi, tsena muv̄irao na ndzia, nisumutafadalini mudziɓause na zingushauku za shiunadamu ziwanao na nafusi zanyu. 12Namukane maendreleo mazuri mbeli na watru kawamuji Mungu, ile pare v̄ahanu kamwe wamurongoaoni amba wanyu warendrezi-mbovu, waone zitrendro ndjema zanyu, amwesa wamutukuze Mungu isuku ya umujilio wahe.
Namudzituĩse mbeli za wendza yezi
13Namudzituĩse ha siɓaɓu ya Mola mbeli za kula utawalifu wa shiunadamu: neka mufalume alio umuhu, 14au mawakala walio amba waye ɗe awav̄eleha wav̄e zifungo warendrezi-mbovu, na usifu warendrezi-ndjema. 15Mana mav̄endzeleo ya Mungu ɗe amba ha ufanya ndjema, muɓale ihanyo ya ujinga wa yamalaɓa. 16Namudziv̄inge shi wendza unafasi, ɓila ufanya unafasi wanyu amba shitamba ifinikiao taɓia mbi; mudziv̄inge shi warumwa wa Mungu. 17Namuhishimu piya uwatru, muv̄endze wananyanyu wa shi uaminifu, mumuriye Mungu, muhishimu umufalume.
Mufano wa matreso ya Kristi
18Wanyu warumwa, namudzituĩse ha warumisa wanyu v̄umoja na hishima ɓole, wala tsi amba ha wao walio wema tsena waeledzeshehao tu ɓasi, ɓadi wajau ha wao walio wahali. 19Mana iyo rehema amba ha mastaha mbeli za Mungu, mutru ustahamili utungu wa maondo tsi ya haki. 20Kweli amba sifa trini ikao mutru amostahamili ziv̄ondro ɓaanda akosa? Ɓadi neka amba musustahamili maondo ɓaanda murendrao ndjema, iyo rehema mbeli za Mungu. 21Na ha iyo ɗe mwahirwa, mana Kristi wajau ne aondesheha ha umufayidishani, amulishiani mufano, ile muɗunge yimirohoro yahe:
22«Waye kafanya dhambi,
na hanyoni hahe
kav̄waparihana udangamanyifu.»#2:22 Namuangaliye Izaya 53:9.
23Waye alio amba amoruhanwa, kakoruhana, amoondesheha, kakorisidza, ɓadi akodzilisha ha Uwo anamuao ha haki. 24Waye alio amba waye monyewe av̄ingi madhambi yatru mwilini hahe hari mwa umuri|muri wa pawa, pare rife uhusu madhambi, ne riẽshi uhusu ihaki; waye alio amba ha madjaraha yahe muangalisiwa. 25Mana muka mauri maɓariɓari yandrao mboya, ɓadi av̄asa murudi ha Uwo alio Mutsunga wanyu, tsena Mugogezi wa ziroho zanyu.
Currently Selected:
1 MONYE 2: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
