1 MAKORINTIYO 15
15
uMuregeo hayi wa Kristi
1Av̄asa wananyangu, nisumunahanidzani iIndjili namujudzaniyo ilio amba muikuɓali, tsena muifanya ngazi, 2na ha wiyo tsena muna uhuyifu, neka musuisika mauri ɗe iheli namujudzaniyo. Neka tsi ɗe namuna iyo, itsoka amba v̄av̄o muamini ɓila tanafu itsokao yotsi.
3Mana kaɓula ya trongo piya, tsimuv̄ani izo nazipara wami-wami, ne ɗe amba: Kristi afu ha siɓaɓu ya madhambi yatru, mauri ɗe iheli yiMiangishio Mitwaharifu yarongoa. 4Tsena aka adzihwa, ata isuku ya raru aregezewa hayi, mauri ɗe iheli yiMiangishio Mitwaharifu yarongoa. 5Amuv̄enushia Monye#15:5 Monye: Yaãni, Sefasi., amwesa kumi na waili wale. 6Ɓaanda ya v̄av̄o av̄enushia wananya wa shi uaminifu zaidi ya hamsumiya ha sa moja, walio amba shengini mwawo raha wa hayi, na ɓaãdhwi wafu. 7Amwesa amuv̄enushia Yakoɓu, iv̄o piya yaMav̄ingizi-Risala|Mav̄ingizi-Risala. 8Ɓaanda ya wao piyawo, aniv̄enushia wami wajau, mufano wa mimba yadzalwa ɓila utsimu mezi.
9Mana wami ɗe umuv̄ungufu hari mwa yaMav̄ingizi-Risala, tsisustahiki ata uhiriwa Muv̄ingizi-Risala, mana tsitrese iDjama Ndziwaminifu ya Mungu. 10Ɓadi ha irehema ya Mungu, tsa namuna nilio, na irehema yahe iyo hanguju kaisi amba kaina mana. Ɗe ikinyume, tsidzirumu zaidi ya wao piya, wala tsi wami, ɓadi ɗe irehema ya Mungu ilio hanguju. 11Ha izo, neka ɗe wami, au ɗe wao, mujudzio watru ɗe uwo, na uwo ɗe mwauamini.
uMuregezeo hayi wa wafu
12Mana neka v̄usujudzwa amba Kristi aregezewa hayi ulawa ufaju, ɓasi ha namuna jeje v̄ulio ɓaãdhwi mengoni mwanyu warongoao amba kav̄usi muregezeo hayi wa watru wafa? 13Neka kav̄u muregezeo hayi wa watru wafa, v̄av̄o ata Kristi ne karegezewa hayi. 14Na neka Kristi karegezewa hayi, ɓasi maĩdhwa yatru kayasina tanafu, na uaminifu wanyu wajau kausina tanafu. 15Na v̄av̄o, ratsoonehana mauri wasi mazahidi ya trambo wa Mungu, rangu ramutolea ushahidi wa trambo Mungu amba amuregeza hayi Kristi, wakati ulio amba kamuregeza hayi neka wafu kawasuregezewa hayi. 16Kweli amba neka wafu kawasuregezewa hayi, v̄av̄o Kristi wajau karegezewa hayi. 17Na neka Kristi karegezewa hayi, v̄av̄o uaminifu wanyu kausina tanafu, tsena raha mwa hari mwa madhambi yanyu. 18Na wao wafa hari mwa uv̄umoja na Kristi, waangamia. 19Neka risumutumainia Kristi hari mwa uhayati unu riuẽshio tu ɓasi, v̄av̄o ra wasikinifu rahana piya.
20Ɓadi kweli amba Kristi aregezewa hayi ulawa ufaju, waye ɗe udzazi wa handra hari mwa wao wafa. 21Mana rangu ufa waja ha ndzia ya mwanadamu ɗe ha ndzia ya mwanadamu wajau, ɗe umuregezeo hayi wa uwafu waja. 22Mana iv̄o wanadamu piya wafao hari mwa uv̄umoja na Adamu, ɗe inamuna iyo wajau piya wanadamu watsoẽshisiwa hari mwa uv̄umoja na Kristi. 23Ɓadi kula mutru atsoregezewa hayi ha wakati wahe: imimba ya handra ya uregezewa hayi ɗe Kristi, yaɗunga ɗe wao walio wa Kristi wakati atsov̄enuhao. 24Amwesa umwiso utsoja, wakati atsov̄elehao ufalume ha Mungu amma Ɓaɓa, ɓaanda itsokao amba aangamidza kula utawalizi, kula yezi, na kula ushindzi. 25Mana ilazimu atawale mupaka ike amba atria piya maãduwi yahe utsini na maharo yahe. 26Na iãduwi ya mwiso ya uangamidziwa ɗe ufa. 27Kweli amba atriliwa piya utsini na maharo yahe. Ɓadi v̄wamorongolwa amba piya zitrilwa utsini na maharo yahe, irahara amba Uwo amutriazo, kasi moni v̄av̄o. 28Na wakati itsokao amba piya zitrilwa utsini mwaye, v̄av̄o uMwana waye-waye atsodzitria utsini na Uwo amutrilia piya utsini, ile waye Mungu ake ɗe piya ha piya.
29Neka tsi namuna iyo, wale waɓaĩshiwao|uɓaĩsha ha siɓaɓu ya uwafu, wasutumainia trini? Neka wafu kawatsoregezewa hayi, manatrini waɓaĩshiwao ha siɓaɓu ya wao? 30Na wasi hatruju, manatrini ata rikao hari mwa hatwari kula wakati? 31Kula suku wami uka hari mwa hatwari ya ufa, wananyangu, mauri ɗe inamuna ilio kweli amba wanyu ɗe ufahari wangu hari mwa uv̄umoja watru na Kristi-Insa, Raɓi watru. 32Na djeli kusudi yangu ika ya shiuɓinadamu ɗe nawana na zinyama nyeha#15:32 zinyama nyeha: Zinyama nyeha zini zisurongoa wanadamu waka kinyume na Ɓaulusu. Efeso, faida trini ɗe natsoipara? Neka wafu kawasuregezewa hayi, v̄av̄o:
«Nariɗye#15:32 Nariɗye... meso ritsofa: Namuangaliye Izaya 22:13. na unwa,
mana meso ritsofa.»
33Musudzidanganye: «Uka v̄umoja na waovu, uangamidza taɓia ndjema.» 34Ãkili zanyu nazimuregeyeni, musuãswi tsena. Kweli amba v̄wa wasalia kawamuji Mungu. Nisuirongoa ha aĩɓu yanyu.
uMwili waregezewa hayi
35Ɓadi mutru atsojua arongowe: «Ɓasi namuna jeje wafu waregezewao hayi? Wao uregezewa na mwili trini?» 36Wawe ɗaɓa halisi! Shitru uitaɓuo, iyo kaiji uka hayi neka kayafa raɓuzi. 37Na shitru uitaɓuo, tsi ɗe umwili wa ishimea ijao, ɓadi mbia tu ɓasi, ukiri ka mbia ya murama-mutsa, au ya shitru yangina. 38Amwesa Mungu uiv̄a mwili atsahao, kula maela mwili wayo. 39Mili piya tsi moja. V̄wa wa wanadamu, yangina mili ya zinyama, yangina ya zinyunyi, na yangina ya zifi. 40V̄wa tsena mili ya mbinguni, na ya shiv̄andreju mwa tsi; wangina ɗe utukufu wa yimili ya mbinguni, na wangina wa yimili ya shiv̄andreju mwa tsi. 41Utukufu wa lijua wangina, utukufu wa umwezi wangina, na wangina ɗe utukufu wa zinyora; ata nyora moja ukana tafauti ya utukufu na nyora munyahe.
42Ɗe namuna iyo ɗe ulio umuregezeo hayi wa uwafu. Uwo utrilwa shiv̄andreju mwa tsi mwili muola, uregezewa hayi tsi muola; 43uwo utrilwa shiv̄andreju mwa tsi mwili mupuzi, uregezewa hayi, mutukufu; uwo utrilwa shiv̄andreju mwa tsi mulemevu, uregezewa hayi wendza ushindzi; 44uwo utrilwa shiv̄andreju mwa tsi mwili wa nyama, uregezewa hayi mwili wa shi roho.
Neka v̄wa mwili wa nyama, v̄wa wajau mwili wa roho. 45Iyo ɗe imana ata v̄waangihwa moni na uMuangishio Mutwaharifu: «uMwanadamu wa handra, Adamu, afanyiha shiumbe yendza roho»#15:45 Namuangaliye Mwandro 2:7.; Adamu wa mwiso#15:45 Adamu wa mwiso: Uwo ɗe Insa-Kristi. waye, roho iv̄ao uhayati. 46Wa roho tsi ɗe kadimu, ɗe wa nyama; wa roho uja ɓaanda. 47uMwanadamu wa handra arengwa shiv̄andreju mwa tsi, afanyiwa ha trotro; wa v̄ili aja ulawa pev̄oni. 48iNamuna aka mutru wa trotro, ɗe inamuna wajau uwatru wa trotro walio; na inamuna wa pev̄oni alio, ɗe inamuna wajau uwatru wa pev̄oni walio. 49Na tsena, mauri ɗe inamuna raka mufano wa ule afanyiwa ha trotro, ritsoka wajau mufano wa Ule wa pev̄oni.
50iTrongo nimuambiaoni wananyangu, ɗe amba nyama na damu kazishindri uwarithi Utawalizi wa Mungu, tsena shitru muangamia kaiwarithi shitru tsi muangamia. 51Tsini nisumuambiani siri: Karitsofa piyasi, ɓadi piyasi ritsogaudziwa, 52hari mwa sa moja, sa ya uv̄ena, liɓaragumu la mwiso lamovudziwa. Mana litsovuma, na uwafu watsoregezewa hayi wake kawaji ufa tsena, na wasi, wasi ritsogaudziwa. 53Kweli amba ilazimu ndziangamia ipindre itsindziangamia, na ndzifa ipindre itsindzifa. 54Wakati itsokao amba ndziangamia ipindri itsindziangamia, na ndzifa ipindri itsindzifa, v̄av̄o urongozi wa uMuangishio Mutwaharifu unu utsotsimidziha: «Ufa uzimwa hatwi na ushindrifu mukamilifu.»#15:54 Namuangaliye Izaya 25:8. 55V̄wangina tsena:
«Ufa, wa hav̄i ushindrifu waho?
Ufa, la hav̄i dzinyo la sumu laho?»#15:55 Namuangaliye Hozeya 13:14.
56Na dzinyo liv̄ingao lisumu la ufa, ɗe lidhambi; na ushindzi wa dhambi, ɗe iSharia. 57Ɓasi himida ha Mungu ariv̄ao ushindrifu ha ndzia ya Raɓi watru Insa-Kristi.
58Ha izo wananya wa roho wangu, namuke wahodari, watru wasika. Ha daima murendre na uzidisha urumishi wa Raɓi, ha ujua amba ihazi yanyu hari mwa uv̄umoja na Raɓi, kaisi tsi endza faida.
Currently Selected:
1 MAKORINTIYO 15: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
