1 MAKORINTIYO 16
16
Mutsango wa usaidi wananya waaminifu wa Yerusalemu
1Yahusu umutsango wa waaminifu, namufanye wajau mauri ɗe inamuna naambia ziDjama Ndziwaminifu za Galatwiya. 2Kula mutru mengoni mwanyu isuku ya handra ya mufumo, nagamise hahe iyo atsoshindrao ha ikadiri yahe, ile watru wasulindre naja iv̄o v̄wafanyiwa umutsango. 3Ata namowaswili, nitsov̄a maɓarua wao mwawatsahua, niwav̄elehe wav̄inge zawadi zanyu Yerusalemu. 4Neka ionehana amba ɓorwa nendre wami wajau, v̄av̄o watsendra v̄umoja na wami.
Mipango ya musafara wa Ɓaulusu
5Nitsoja nimuoneni ɓaanda itsokao amba tsiv̄iri Makadoniya, mana kweli amba nitsov̄ira Makadoniya. 6Ukiri uka amba nitsoɓaki hanyu, au ata niv̄itse wakati wa ɓaridi, ile munisaidi na iyo yanilazimu pare niendreleye na musafara wangu, v̄ahali yotsi nitsendrao. 7Mara ini tsisutsaha nav̄ira tu na ndzia amba nimuoneni, ɓadi nisutumainia niv̄itse mwana wakati v̄umoja na wanyu, neka ɗe uv̄endza ya Raɓi. 8Ɓadi nitsoɓaki ɗagoni Efeso ata isuku ya Pentikoti#16:8 Pentikoti: Yaãni, isuku ya hamsini ɓaanda ya uUnahanizi wa Mutupio. Namusome yamaeledzo ju la Pentikoti hari mwa zikandre za mwiso za ishio ini., 9mana v̄uniɓulishia mulongo muɓole wa hazi yendza manufa, wala ukana walio kinyume wa wengi.
10Timutausu amowaswili oho, namumurenge ha uzuri ha namuna amba asutaãɓihe, mana waye ufanya mauri ɗe wami hazi ya umurumishia Raɓi. 11Ɓasi v̄wasuke ata mutru amudharau. Namumuendrese ha usalama umusafara wahe ata aje anipare, mana nisumulindra v̄umoja na uwananya waaminifu.
12Yahusu umwananya Aɓulusu, tsimutria ɓari hodari aje amuoneni v̄umoja na uwananya waaminifu, ɓadi ha kweli kayaka mav̄endzeleo yahe waye uifanya av̄asa; atsoja wakati atsoparao inafasi.
Masariɓu ya mwiso na masalamu
13Namuke hashiri, musike hodari uaminifu wanyu, mudziv̄inge mauri watruɓaɓa, muke wahodari. 14Naike amba hari mwanyu kula trongo ifanyishihe v̄umoja na mahaɓa.
15Sariɓu langina tsena wananyangu: musujua amba umuraɓa wa Stefanasi, uwo ɗe wa handra waamini hari mwa umukaɓala wa Akaya, tsena wadzihetsi amba wasurumishia idjama ya waaminifu. 16Ɓasi namutuĩ watru mauri ɗe wao, na piya warengao fuvu hari mwa ihazi, wadzirumao ha siɓaɓu ya wiyo. 17Nisujiv̄iwa na umujilio wa Stefanasi, wa Fortunatusa, na wa Akayikusa. Warenge ɓandza lanyu iv̄o kamwaka. 18Mana watrulidza roho yangu, v̄umoja na yanyu. Ɓasi namuv̄e mastaha watru mauri ɗe wao.
19ziDjama Ndziwaminifu za Aziya zimusalimuni. Akila na Priskila, v̄umoja na iDjama Ndziwaminifu ilio muraɓani hawo, wamuv̄ani masalamu mengi hari mwa uv̄umoja na Raɓi. 20Piya uwananya waaminifu wamusalimuni. Namusalimiane wanyu na wanyu masalamu ya shi utwaharifu.
21Ha umuhono wangu wami Ɓaulusu nisumuv̄ani lisalamu lini.
22Neka v̄wa mutru kamuv̄endze Raɓi, nalaãniwe. Maranatha#16:22 Maranatha: Hari mwa iluha ya Shiaramiya, «Raɓi naje,» iyo urongolwa «Marana tha».!
23Rehema ya Raɓi Insa naike ju lanyu piyanyu.
24Uv̄endza yangu ya na wanyu piyanyu hari mwa uv̄umoja na Kristi-Insa.
Currently Selected:
1 MAKORINTIYO 16: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
