1 MAKORINTIYO 14

Murumishio wa zineema za iRoho

1Ɓasi namuɗunge uv̄endza, tsena namutsahe ha kusudi neema za shiroho, hususwani ya ujudza marongozi ya shi mutrume yashukidziwa. 2Kweli amba uwo alaguao ha luha ashukidziwa, kalagua na wanadamu, ɓadi na Mungu, iv̄o kav̄u ata mutru amuelewao, na ha uv̄ingwa na iRoho ɗe arongoao trongo zadzamisiwa. 3Ɓadi uwo ajudzao marongozi ashukidziwawo, ulagua na wanadamu: waye uhodarisha, utria ɓari, tsena utrulidza. 4Uwo alaguao ha luha ashukidziwayo, udzihodarisha monyewe, na ule ajudzao marongozi ashukidziwawo, uhodarisha iDjama Ndziwaminifu. 5Ɓasi natsov̄endza piyanyu mulaguwe luha mwashukidziwazo, ɓadi zaidi amba mujudze marongozi ya shi mutrume yashukidziwa. Ule ajudzao marongozi ashukidziwawo, ana faida rahana ule alaguao ha luha zashukidziwa, ɓadi neka v̄wa mutru atafaswirio luha zile, pare iDjama Ndziwaminifu ihodarishihe.

6Ɓasi av̄asa wananyangu, neka tsimujiliani ha ulagua luha nashukidziwa, nitsomufayidishani na trini? Na yotsi, ɓadi neka nisumujudzani trongo nav̄enuliwayo, au ya hikima, au ya urongozi washukidziwa, au ya musomo. 7Neka zitru kazina roho zivumao, mauri ndzumari au dzendze, kazisina tafauti ya ji, ɓasi ha namuna jeje mutru atsojuao shitru ivumisiwao na indzumari au lidzendze? 8Na neka ɓaragumu kalisutoa ji laondzoha, mbani ɗe atsodzitayarishao uendra kondroni? 9Ɗe namuna iyo wajau wanyu. Neka ulimi wanyu kausurongoa kauli yarahara, ɓasi ha namuna jeje ishitru yarongolwa itsojulihanao? V̄av̄o itsoka amba musulagua tu hawani. 10Kweli amba v̄wa tafauti nyengi za luha ulemenguni, ɓadi kav̄u amba kaisina mana yayo. 11Ɓasi neka tsisuelewa imana ya luha, v̄av̄o nitsoka mudjeni ha ule ailaguao, na ule ailaguao, atsoka mudjeni hangu. 12Ɗe namuna iyo wanyu wajau. Rangu muliona huɓa mudjaãliwe neema za iRoho, namuzitsahe ha uwengi, ɓadi ile ha uhodarisha iDjama Ndziwaminifu.

13Iyo ɗe imana mutru alaguao ha luha yashukidziwa, alazimu afanye mamilio ile pare aitafaswiri. 14Mana namofanya mamilio ha luha yashukidziwa, v̄av̄o roho yangu ya hari mwa mamilio, ɓadi ifikira kaidza. 15Ɓasi v̄av̄o nifanye jeje? Nitsofanya mamilio ha iRoho, tsena nifanye ha ifikira; nitsohimba ha iRoho, tsena nihimbe ha ifikira. 16Neka tsi namuna iyo, wamohimidia ha iRoho, uwo alio hari mwa liɓandza la idjama ivulishiao, atsov̄oshea jeje «Amina!» mamilio yaho, ne kaelewa trongo wairongoa? 17Kweli amba v̄ale usuhimidia ha uzuri tu, ɓadi munyaho ule kasuhodarishiha.

18Nisumushukuria Mungu iv̄o nilaguao luha nashukidziwazo rahana wanyu piyanyu. 19Ɓadi hari mwa iDjama Ndziwaminifu, wami uona ɓorwa nirongowe kauli tsano ha ifikira, ile nisomedze wasalia, rahana kauli alifu kumi ha luha yashukidziwa.

20Wananyangu, musuke wanatsa hari mwa unamuzi. Hari mwa yahusu imbovu, namuke wanazaza, ɓadi yahusu unamuzi, namuke watru waɓalihi. 21V̄uangihwa moni na iSharia:

«Ɗe ha watru wa ngulimi ndzidjeni

na ha hanyo za wadjeni

ɗe nitsolaguao na umati uwo,

ɓadi ata namuna iyo ne kawatsonivulishia,»#14:21 Namuangaliye Izaya 28:11-12.

Mola ɗe arongoa.

22Ha izo, luha zashukidziwa, iyo ãlama tsi ha waaminifu, ɓadi ha tsi waaminifu, wakati ulio amba marongozi ya shi mutrume yashukidziwa, iyo ãlama tsi ha wao tsi waaminifu, ɓadi ɗe ha uwaaminifu. 23Neka hari mwa mungulidzano wa Djama Ndziwaminifu kamili piya watru wasulagua ha luha zashukidziwa, v̄wamongia watru wavulishiao tu au watru kawasuamini, hali kawatsorongoa amba wanyu wendza masera? 24Ɓadi neka piya wasujudza marongozi ya shi mutrume yashukidziwa, ɓasi v̄uja mutru kasuamini au mutru avulishiao tu, v̄av̄o atsorudiwa na piya atsozikiao, atsonamulwa na piya; 25siri za iroho yahe zitsov̄enuha. Ha izo atsorema isura v̄otsi, amuãɓudu Mungu na urongoa amba ha kweli Mungu a hari mwanyu.

Utaratiɓu hari mwa yimingulidzano ya iDjama Ndziwaminifu

26Ɓasi rifanye jeje, wananyangu? Kula mwamongulidzana, moja atsojua akane himbo, moja musomo, moja trongo av̄enuliwayo, moja luha ashukidziwa, na wangina faswiri. Piya nazifanyihe ha uendresa mbeli idjama. 27Neka v̄wa mutru alaguao ha luha yashukidziwa, wake waili, wasuzidi wararu, tsena walaguwe moja ha moja, amwesa v̄uke mutru atafaswiri. 28Na neka kav̄u mutru wa utafaswiri, v̄av̄o hari mwa idjama naɓurihe, adzilaguliye ɗe waye monyewe na Mungu.

29Yahusu wajudzao marongozi ya shi mutrume yashukidziwa, waili au wararu ɗe nawalaguwe, na wangina watwaliye izo zarongolwa. 30Na neka v̄wa wangina v̄ale av̄enuliwa trongo, wa handra ule naɓurihe. 31Mana piyanyu mutsojua mujudze moja ha moja marongozi mwashukidziwa, ile pare piya wafundrwe, tsena watrilwe ɓari. 32Roho za wajudzao marongozi ya shi mutrume yashukidziwa, za hari mwa ãmuri za wenyewe yamarongozi. 33Mana Mungu tsi Mungu wa fidjo, ɓadi Mungu wa utrulivu.

Mauri ɗe hari mwa piya ziDjama Ndziwaminifu za watwaharifu, 34watruwashe nawaɓurihe hari mwa yimingulidzano, mana kawaruhusiwa ulagua moni v̄av̄o; ɓadi nawake twaã, mauri ɗe iheli yarongolwa wajau na iSharia. 35Neka wasutsaha musomo hari mwa trongo, nawadzise waume wawo ɗagoni. Mana iyo aĩɓu mutrumushe ulagua hari mwa iDjama Ndziwaminifu. 36Hali urongozi wa Mungu ulawa hanyu? Au wanyu tu ɗe mwawaswiliwa nawo?

37Neka v̄wa mutru aonao amba waye mutru ajudzao marongozi ya shi mutrume yashukidziwa, au mutru av̄ingwao na iRoho, nakuɓali amba izo nimuangishiaonizo, iyo ãmuri ya Raɓi. 38Na neka v̄wa kasuzikuɓali, waye ne kakuɓaliwa.

39Ha izo wananyangu, namutsahe ujudza marongozi ya shi mutrume yashukidziwa, ɓila uɓalidza ulagua luha zashukidziwa. 40Ɓadi piya zifanyihe namuna yalazimu, tsena ha utaratiɓu.

Currently Selected:

1 MAKORINTIYO 14: swb

Highlight

Copy