ROMMI 15
15
Khristow Kichekipiye
1Ningu khunoqo no aküpülü lo mtotoi ani keno, ningu ampi pulou kumono miqemlei akeqo no ikiqive kelo xaqhe masa kepu ani. 2Ningu pütüta kisüghümi shiqhe kumtoni ke pa kivipu shi tsüni. 3Kughengu Khristo ye Pa ampi pulou shimoe, ikemu ishi yepüake toi shike, “O thaigha chekemiw küthakügha tsa huno I shou ikughie.”#Lesh 69:9 4Khaghi ghuloki lono kiu yepe qhive keno ti ye ishi ningu qoputhu niye ke, tishianguno Kuchoyesü lo kheakulu eno shikumtokütsü vecheo ningu pelo lajupu apeniye ke. 5Kheakulu eno shikumtokütsü Lhou no nongu pelo Khristo Jisü gholo xüküqhalu keu vecheo kuloni küghüvüi amlo lakhishi xülu peni, 6tishianguno nongu no asütsa lakhi lono ni Mpeu Jisü Khristo Papu Alhou juküvü shilu peni. 7Ikehu Alhou juküvüpu ghenguno Khristo no nongu ikhilu ketoi nongu lakhino lakhi ikhilu kilelo.
Khristo no Kümtsüw Lajupu
8I no nongu vilo piani ke Khristo ye Alhou mikucho piyeni ye Jewmi qeu shive, tishianguno püzüu apuasüqo lau pikiqhitsa tsükeu ye xüaphi kepi iqhikumto tsüniye ke, 9tishino Jewkumomi pelo Alhouw küpükini ithulu ke ghenguno Pa juküvüpu shi peniye ke. Ti ye ishi yepüa keu kiqi lono,
“Ikehu I no Jewkumomi gholono
O sheqhe eno O je shipilini.”#2Sa 22:50; Lesh 18:49
10Itaghi ishi yepüani,
“O Jewkumomi, Paw timi gholono alovilo.”#Zak 32:43
11Eno itaghi,
“Nongu Jewkumomi kümtsü no Ampeu sheqhelo,
ashiaye kümtsü no Pa sheqhelo”#Lesh 117:1
12Itaghi Isaiah no pi,
“Jesse kuhu-aghü lono ighi nani,
shiye shou aye peniye ithu chekeu
shou Jewkumomiu no laju nani.”#Isa 11:1,10
13Nongu no pülü akeu lo lajupu tsü chekeu Lhou no alokivi eno aloino keu kümtsü pesü nongu shepichhi tsü peni, tishianguno Aghungu Kimthe küka vecheo nongu ye lajupu no qochili apenie.
Jewkumomi Lau Paul Tsape
14I thiküzümiqo, ni ampi no nongu ye akivi no chhitoi, akighithi no qochili, eno lakhino lakhi qophelu nanie pi chilu kelo nongu ghenguno aghakiqishi ani. 15Ikemu akimji tsa hami loye nongu ghutu kithe ghi ni ye süchile mono mtotoi yevae, kughengu Alhou no küpükini I tsükeu ye 16Alhou tsakiviu kümlapu lo achinemi lakhi shi Jewkumomi lau Khristo Jisü tsapeu shi peniye ke, tishianguno panongu ghi Aghungu Kimthe vecheo shikimtheve no akümllagho toi ikhikulupu shi peniye ke. 17Tishino Khristo Jisü gholono ni ye Alhou ghenguno I kümlapu lo akijivile lukepu ani. 18Kughengu ni ye hipa tsa nguno alau kütau ye pimoae: Jewkumomi pelo aghokulu lo ighilu peniye Khristo no I vecheo mlae, ti ye—atsapi eno akümla, 19amchipu eno akümzapu küka, eno Alhou Ghungu küka lono ke—tishi kehu ni ye Jerusalem lono Illyricum qha kutolo homxasü Khristo tsakiviu kümla shikupu luvae, 20eno hi ghenguno atsakiviu pesü khilehi Khristo je chimla aphi keno tilau pikülhani keu no I kimjie, tikumo aye ni ye kütami no abo qhave keu shou mlapuku lunosa ke. 21Ikemu ishi yepüake toi,
“Khuno lau Pa ghili pimphi keno pano no ithulu nani,
khunono khilemu chilu mphi keno pano no vethalu nani.”#Isa 52:15
Rome lo Wunikeu Kukughu
22Akiqi hipau ghenguno I no nongu lau ighi niye ake lono ghuthu kutomo I vekha ighivae. 23Ikemu itehi ni ye hipa cheaxü qhalo ye ashehova, eno ni ghi nongu lau ighinishi kelauno ampe kutomo huqhe ighive akeke, 24I no Spain lo wucheke lono nongu sasü kujuthukile lunike huqhe aghini, eno ado hami nongu gholo ngove no itaghi I ghüzüla lo wuni kelono nongu kukuphu luni. 25Ikemu itehi ni ye Jerusalem lo küpülümi lau akukuphu pewu cheni. 26Kughengu Macedonia eno Achaia kukuhou no Jerusalem lo küpülümi gholo kumlhomi akeqo ghenguno akukuphu hami qhaphetsü ke. 27Kuchou lo panongu ye tishi kelau kehu amlokiqi shi tsüni keu kümsülue. Kughengu Jewkumomi no Jewmi vecheo aghungulo kükümgha küsajelu püaghi aye, itehi Jewmi no avehupu shi akelo panongu ghi tinhemgha jeli pesü kümghatsü kepue. 28Ikehu kughou I no hipa ghini shiveni eno qhaphetsü keu pewo Jerusalem lo tsüveni keno, ni ye nongu kila küdau no Spain lo wuveni. 29Kughou I no nongu lau ighini keno ni ye Khristow kükümgha nibonilei shi nongu sasü küsajelu nani kepi ithi ani.
30Athiküzümiqo, ni Mpeu Jisü Khristo eno Aghungu kikimiye vecheo I no hakite ani: I no aghimeküsa shi akelo nongu kighini lono I züqhushi Alhou lau khu tsülo; 31tishikeu lono Judea lo pülümokemi launo I xaphelu, eno Jerusalem lo I kümlapu ye küpülümi zülo ikhikulupu shi peni, 32tishianguno I pelo Alhou pulou lono alokivi shi nongu lau ighilu eno nongu gholono aghüthi püxülu penie. 33Aloinokeu Lhou no nongu kümtsü gholo apeniu, Amen.
Currently Selected:
ROMMI 15: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
