ROMMI 16
16
Lüthü lau Pethakütsü
1I no ni chepukishiu Phoebe, Kenkhrea kukuhou lo deacon, shepe shi ghi nongu lau kilethitsü ani, 2küpülümi sasükile chekeu ghola lono nongu no Ampeu küdau no li sasü tsülo, eno kiu kiumu li no nongu launo avehupu shi aghikeu ye li kuphu tsülo, kughengu li ye aghütsüghi shi, ni ghi kihisü no, timi kutomo kuphu acheni.
3Khristo Jisü kümla lo I sasü mla chekemi Prisca ngo Aquila pama lau petha tsülo, 4I küxü pükha tsüniye pama no aküxü kütsü shike, ikehu I likhi kumono Jewkumomi kukuhou kümtsü no shikimthi tsü ani. 5Pama kilo akukuhou akeu lau petha tsülo. Asia lo Khristow shilu keu xathi amsüu, I qhuu Epaenetus, petha tsülo. 6Nongu ghenguno aka-aveshi mlaitha tsükeu Mary ghi petha tsülo. 7I thiküzümi eno I gholo akughumi shi achekeu Andronicus ngo Junia pama lau petha tsülo. Pama ye apostolmi no ithi akemi, eno I züuno Khristo laumi shive kemie. 8Ampeu küdau no I qhuu Ampliatus petha tsülo. 9Khristo kümlapu lo mlaküqha chekemi Urbanus, eno I qhuu Stachys lau petha tsülo. 10Khristo laumi shiluvepe keu Apelles lau petha tsülo. Aristobulus no kibolomi lau petha tsülo. 11I thiküzümi Herodion lau petha tsülo. Narcissus no kibolomi khunoqo Ampeu küdau ani keno panoqo petha tsülo. 12Ampeu kümlapu lo akemi, Tryphaena ngo Tryphosa pama lau petha tsülo. Kimiyekicheu Persis khuu aka-aveshi Ampeu kümlapu lo acheni keno petha tsülo. 13Ampeu kümlapu lo kisheluve keu Rufus; eno paza, li ye I za ghi ke, pama lau petha tsülo. 14Asyncritus, Phlegon, Hermes, Patrobas, Hermas, eno panongu gholo athiküzümi akeqo lau petha tsülo. 15Philologus, Julia, Nereus ngo pa chepu Olympas, eno küpülümi khunoqo panongu gholo ani keno petha tsülo. 16Akimthe shi müma keu pesü lakhino lakhi lau petha tsülo.
Ashekhau Kükütsütsa eno Petha
17Athiküzümiqo, I no nongu ghutu anike khunono kijetha cheni eno akülü tsa nongu shikave keqo kumono bidelau tsa pesü aküküpna shicheni keno, tipaqo launo putosüve lo. 18Kughengu titoi keqo ye ni Mpeu Khristo huthu amoe, ikemu pano kive kiqe ghenguno ke, pano ye jumghai shino alatsa pesü kivi-küsa mtha kemi pishiqhi cheni. 19Nongu no aghokulu shiche keu ye kümtsü kighithi kehu ni ghi nongu shou amloqi cheni, ikemu ni ye nongu pelo kiu no akivi keno tipau lo alotsü kithelu eno alhoksa loye kiumu mthamithe keu shive penishie. 20Aloino keu Lhou no kighithe nongu pukhu philono Satan nedaqhi nani. Ni Mpeu Jisü Khristow küpükini no nongu gholo apeniu.
21I gholo mlaküqha akeu Timothy no petha nongu tsü ani; titoi ni thiküzümi Lucius, Jason eno Sosipater ghi petha tsü ani.
22Yesü hipau kiyeu Tertius no Ampeu je lono petha nongu tsü ani.
23Ni eno akukuhomi kümtsü saküsüu Gaius no nongu petha tsü ani. Aphughi kinipighiu Erastus, eno ni thiküzüu Quartus no nongu petha tsü ani.
24(Ni Mpeu Jisü Khristow kimiyekini no nongu kümtsü gholo apeniu, Amen.)
Akishekütsü Le
25Itehi ye I tsape, I no Jisü Khristo ghili pikülha chekeu vecheo nongu shikumtokütsü Lhou sheqhe ani; ti ye ado kushuo tuqhou shi küsü püache keu tsa pephe piyeni keu kiqi lono ke, 26ikemu itehi ye tipau lhapheve no tungkupmi kiyeqo vecheo Lhokta Lhou zakütsü kiqi lono shiye kümtsü lau kilethivae, tishikeu lono timi kümtsü pelo aküpülü lono aghokulu küxü lo ighilu peniye ke— 27Khuu likhino alokütsü Lhou keno, Jisü Khristo vecheo pülhapuju lo ajuküvü Pa lau apeniu! Amen.
Currently Selected:
ROMMI 16: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
