ROMMI 14
14
Kütami Shou Küghathabe Kevilo
1Khuu no aküpülü lo miqemlei ani keno alokivishi ikhiluni thono akükümsü kiyeqü ke ghenguno mto kevilo. 2Milakhi no pa ye kiu kiumu chulu nanie pi pülü aghiluvi, ikemu lakhiu miqemlei keu ye ayetsüni likhi chucheghi luvike. 3Khuu no chucheni keno pa ye chuchemo keu jukünatha moni, eno khuu no chuchemo keno pa ye chuche keu jukünatha moni, kughengu Alhou no pa ikhiluve ake. 4No ye khuue pi kütami qeu shou küghathabeni kea? Pa no achipishi aghina monamu pa mpeu likhino pi nani. Eno pa ye Ampeu no kuphutsü keu lono puthugholu nani.
5Khuana ye atsala lakhiu no kütau tsala nguno akhotou shi cheni, eno milakhiu ye atsala kümtsü akhotoshi cheni. Ikehu pütüta mlo lono mtotoi kümsüpu luvelo. 6Khuu no atsala lakhi hu pini cheni keno Ampeu gigihu lono pini cheni. Thokha chuche keu ghi Alhou lau shikimthi tsücheni keke Ampeu gigihu lono chucheni, eno chuchemo keu ghi Alhou shikimthi püzü Ampeu gigihu lono chuchemoe. 7Ningu khumu pütüta ghengu likhino xüchemo, momu pütüta ghenguno thive chemoe. 8Kughengu ningu no xü aye Ampeu ghenguno xümasa, eno thive aye Ampeu laumi shi thi masae. Ikehu ningu ye xüna thive namu Ampeuw ke. 9Hi ghenguno Khristo ye thive no xüchile luve, tishianguno Pa no kithimi ngo küxümi shou ghi Ampeu shiniye ke.
10Kushiye o thiküzümi shou küghathabe cheni kea? Momu no ye kushiye o thiküzümi jukünatha cheni kea? Kughengu ningu ye kümtsü Alhouw küghakütha lakhü zülo puthughoni aphie; 11kughengu ishi yepüani,
“Ampeu no pi, Ni xüküau zülo kümtsü no qhoqhünhe nani,
eno ashiaye kümtsü no Alhou sheqhe nani.”#Isa 45:23
12Tishi aye, ningu kümtsü pütüta müzülo kihikülai pe Alhou tsü masa nani.
Kütami Küpxa Kevilo
13Tighenguno, itehi ye ningu lakhino lakhi shou küghathabe moveni nolo, eno athiküzümi la lo küpxalu momu kütüsülu kepu kiumu qhitsümoni. 14I no Ampeu Jisü laumi shino ithitoi luve ake kiumu pakutoshi no mithemo keu ye kumoe, ikemu khuana no mithekumo kepi kümsüve aye pa ghenguno ti ye mithe movae. 15Kughengu nono kiuala chukeu lono o thiküzümi mlo kütakihive tsü aye, no ye kikimiye lono cheche movae. Nono chuche keu huno khumu kütsave kevilo, kughengu Khristo ye pa ghenguno thive ke. 16Tighenguno nono kiu pesü akivie picheni keno ti ye kütami zülo tichetighepu shivepe kevilo. 17Kughengu Alhou yekipe ye chuqu-kusho vehuke kumoe, ikemu Aghungu Kimthe no tsükeu achipiu-mikucho, külakishi eno aloviqhiyi keu ke. 18Ikehu khunono hitoi Khristo qeni keno Alhou zülo ikhikulupu eno timi mlokiqipu shilu ani. 19Tishi aye kiu lono külashilu eno shiqhe kilelu cheni keno ningu no hajuni nolo.
20Achuqupu ghenguno Alhou kümla kütsave kevilo. Kuchou loye thime kümtsü mqhamqhiyi ke, ikemu milakhi no chukeu lono khuana küpxalu keu huno achipikumo ke. 21Ashi na aji namu momu kiu kiumu o thiküzümi no küpxa luve kepu thime ye chusho move keu pavie. 22Nono Alhou lau aküpülü achekeu ye Alhou ngo nokujo dolo qhilo. Timi khuu no pa ampi shou küghatha bemo kepushi achipi lono mlaithani keno akümghapue. 23Ikemu khukhumu lipi ghi chusho keu ye aküpülü lono kumove akehu Alhou zülo pimivae. Kughengu kiu kiumu aküpülü shou bepemo keu ye axine ke.
Currently Selected:
ROMMI 14: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
