ROMMI 13
13
Yepemi Qhoqhülo
1Timi kümtsü no yepemi qhoqhülo. Kughengu Alhou launo kumo aye khunomu kükagha kühae, eno itehi akeqo ye kümtsü Alhou no süsüe. 2Tighenguno khuu no yepemi mjochileni keno Alhou no kiu puthu phetsü keno mjochile ani, eno ti ye Alhouw küghakütha pa shou ikughi kepu mla ayae. 3Kughengu yepemi ye aghili-aye vimo kemi thono kivimi lau ye kiumu shikümsalu kepu kühae. No ye yepeu msa moni shi anima? Tishi aye, kiu no akivi keno ti shilo, eno pa no akishe o tsü nani, 4kughengu pa ye o kivipu shitsüni ye Alhou ghinimi lakhi ke. Ikemu nono akumou shive aye msa kepu ani, kughengu pa ye adou loye azütakikihi pemo nani. Pa ye Alhou ghinimi kehu alhoksa kümlami shou Alhou loghu süghi cheni. 5Tighenguno Alhou loghu lono poveni keu ghengu likhino kumo püzü pütüta mlo lono akipimi shimo kepushi kümtsü no yepemi qhoqhü masae. 6Hi ghenguno nongu no zame ghi tsü cheni, kughengu yepemi ye hikithipu jukütsü chekemi Alhou ghinimi ke. 7Panoqo lau kiu tsü kepushi ani keno kümtsü tsülo: khuno lau zame, momu süqhasüli tsü kepushi ani keno tsülo, sükümsa eno agigihu pesü khuno tsüküzü keno tsü ishilo.
Kikimiye lono Ayezah Shikupu
8Lakhino lakhi kimiye kile keu pi-agha kumo aye khuu laumu api pu kevilo, khuu no kütami kimiyelu cheni keno Ayezah shikupu luvae. 9Kughengu Azakütsü, #Ipe 20:13-17; Zak 5:17-21“No ye shupu-salha moni, No ye ghiqhi moni, No ye püka moni, No ye alamine moni,” eno kütau kiu kiu Zakütsü pinamu, kümtsü xuküqhape hipa tsalo pipuku püani: #Achi 19:18“No ye o likhi o toi o kisüghüu kimiyelo.” 10Kikimiye ye akisüghümi lau alhoksa mla chemoe; tighenguno kikimiye ye Ayezah shikupukulu ke.
11Hinguno alau nongu no ado-ghuloki ithi anino itehi nongu ye züida thughive kepu do ighivae. Kughengu xakulupu ye püzüu ningu no atüghü lo pülülu kelo nguno itehiu no kupunukhoi ighivae. 12Tsüküzü ye wove chea; tsüküvü ipecheae. Ikehu ningu aküzü lo kümlaqo peve no aküvü lo ghünanu pepuni nolo. 13Ningu aküvü lo kichemi toi tsaqütsalei checheni thono ashi ghapiqi ghi shomzü moni, shupu-salha eno ghaghu-ghale shimoni, momu mtomshu eno anheshu moni nolo. 14Ikemu Ampeu Jisü Khristo lhoaye pepuni, eno khilemu ashi ghakiqipu shinike mineqhiyi keu jeli lo amlo tsümoni.
Currently Selected:
ROMMI 13: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
