IPEKULU 37

Puloshoqhi Bohu Mla

1Bezalel no acacia sü pesü puloshoqhi bohu mla. Ti ye akushulau aulotikipshe 45, akijelau aulotikipshe 27 eno akiqhelau aulotikipshe 27 shie. 2Pa no ameshoyi kimthe pesü tipa alou ngo ashou küzüve, eno ameshoyi pesü amtsü sümxa ashekile süwoe. 3Eno pa no tipau ghenguno ameshoyi abohu bidi pesü tipau pukhu lo meda, kini no ako lakhi lo eno kini no ako tüxau süe. 4Pa no acacia sü pesü akipesü mla eno ameshoyi pesü tipaqo küzüve 5eno puloshoqhi bohu xapuni ke ghenguno pa no akipesü pesü ako hula-hila abocho akeu lo xisü. 6Eno ameshoyi kimthe pesü akuqho mla. Akushulau aulotikipshe 45, eno akijelau aulotikipshe 27 shie. 7Pa no ameshoyi pesü cherubim kini mla. Tiküma ye ameshoyi hepha keu pesü akünha ashe kini lo mlasü, 8Cherub lakhi no akünha she lakhi lo eno lakhiu no akünha she lakhiu lo ishi süe. Akünha mlakeu leqhi lakhi lono pa no cherubim kini ashe hula-hila ishi mlasüe. 9Cherubim tiküma ye agi lakhi no lakhi kujukile ghi achishibo kunguu xachho pukupe ngo no tiküma chishibo no akünha khonhape qhie.

Akibepu Mla

10Pa no acacia sü pesü akibepu ghi mla. Akushulau aulotikipshe 36, akijelau aulotikipshe 18 eno akiqhelau aulotikipshe 27 shie. 11Pa no ameshoyi kimthe pesü tipau küzüve, eno ameshoyi pesü tipau vehomxa ghi ashekile süve. 12Pa no aulotikipshe küthü qhemi no tipau vehomxa ghi ameshoyi no ashekile süve. 13Tipau ghenguno ameshoyi no shikeu abocho bidi mla eno abochoqo pesü tipau pukhu lo ako bidi akeu lo yedave. 14Chokiqhepu phivilo abocho süpüa, eno akibepu xapu kepushi akipesü xisü püae. 15Akibepu xapuni ke ghenguno pa no acacia sü pesü akipesü mla eno ameshoyi pesü tipau küzüve. 16Akibepu lo qhikepu ghenguno pa no ameshoyi kimthe pesü akhu mla, axokütsüngü ghenguno ali, eno atsaizü kümllagho leqhi kepu ajukhu ngo chithakhu mlae.

Akulu Kibepu Mla

17Pa no ameshoyi kimthe pesü akulu kibepu mla. Pa no ameshoyi hepha keu pesü akulu kibepu mla. Pa no tipau ghope qhikepu, ajukhu, axamunu, akhuni eno anipa ghi tipau mlakeu leqhi lakhi lono mlae. 18Tipau lono aloka tsügho pipe, akulu kibepu tüxau no aloka küthü eno tüxau no aloka küthü ishi ae. 19Almond puipeghi akeu ju toi ajukhu küthüthü ako hula-hila mla, aloka lakhikhi lo anipa ngo axamunu shisü—aqolo aloka tsügho akupu kibepu lono ipeghi keu mlae. 20Akulu kibepu shou ajukhu bidi ae, tipaqo ye almond kupu akhuni ngo anipa toike xamunu koghe shisü, 21Aloka tüna küthü akeu lakhikhi qholo akhuni lakhikhi ae. 22Akhuni, aloka eno akulu kibepu ye ameshoyi leqhi lakhi lono mla. 23Pa no akulu tsüni, tsümtsa, eno tipau kibepu ishi ameshoyi kimthe pesü mla. 24Akulu kibepu eno tipau lo peitha kepu nhemgha kümtsü ameshoyi kimthe ahu shighi pungu pesü mlae.

Tsüngqüikeu Ta Kiptia Mla

(Ipe 30:1-5)

25Pa no acacia sü pesü müsüghüta kiptia mla. Tipau ye akushulau aulotikipshe chighitache eno akijelau ghi aulotikipshe chighitache. Tipau ye ako bidi, eno akiqhelau ye aulotikipshe shighi-tsügho. Tipau lo akiboqo ye akiptia sasü aleqhi lakhishi mlae. 26Pa no tipau lo akütsüqa, akibo eno ako bidi vehomxa ghi ameshoyi kimthe pesü küzüve, 27eno ashe kilesü püakeu qholo ameshoyi pesü abocho kini mlano ako hula-hila süve, ti ye akipesü xipe qhino xapuni ke ghenguno mlae. 28Pa no acacia sü pesü akipesü mla eno ameshoyi pesü tipaqo küzüve.

29Pa no akimthe nukikishe thazü, eno akimthe tsüngqüikeu ta, ishi axokütsüngü toi kitekungo mlae.

Currently Selected:

IPEKULU 37: SUMRVBSI

Highlight

Copy