IPEKULU 38

Akipti Kümllagho Khache Mla

1Pa no acacia sü pesü akipti kümllagho khache mla. Tipau ye kodibo eno akushulau auxakuchho kini, akijelau auxakuchho kini eno akiqhelau aunhekipshe bidi tüxa. 2Pa no acheku bidi lo akibo mla. Akiboqo ye aleqhi lakhi, eno alazayi pesü tipau küzüve. 3Pa no akümlla-khache lo peitha kepu nhemgha, ali, sholepu, chithakhu, jilisa, eno küsaliqo kümtsü alazayi pesü mla. 4Eno pa no akümlla-khache ghenguno kiyithasü kepu alazayi ghoküna pesü mla, eno akiptia kichi alou küdau qholo qhi, ti ye akiptia akiqhelau amta lo süke. 5Pa no akipesü ghenguno alazayi pesü abocho bidi mlano ako bidi lo meda. 6Eno acacia sü pesü akipesüqo mla eno alazayi pesü tipaqo medave. 7Pa no akümlla-khache xapuni kepu ako hula-hila abocho mlasü püakeu lo akipesüqo xisüpe qhie. Akiptia huye kubokhu shi mlae.

Alazayi Khu Mla

8Pa no alazayi no akhu eno tipau ghope qhikepu mla, ti ye totimi khunoqo no kuposhukulu phiki kulaghi lo mlache keno tipaqow ahiju pesü mlae.

Bokütha-a Mla

9Pa no bokütha-a mla. Apeu küdau bokütha nhaqhiphi phepheike phi kipili no mla eno akushulau auxakuchho lhobidi bidi; 10tipaqo lo atsükucho muku eno ghope qhikeu muku ye alazayi no mla, ikemu akufuyi eno tipaqo kütsü kükha ye ghükayi no mla. 11Ahuu küdau bokütha nhaqhiphi auxakuchho lhobidi bidi, tipaqo lo atsükucho muku eno ghope qhikeu muku ye alazayi no shi, ikemu akufuyi eno tipaqo kütsü kükha ye ghükayi no mla. 12Kulolau nhaqhiphi akushulau auxakuchho muku kini, tipau lo atsükucho chighi eno ghope qhikeu chighi eno akufuyi eno tipaqo kütsü kükha ye ghükayi no mlae. 13Agizüu no kipelau kutolo auxakuchho muku kini. 14Khagho tüxau nhaqhiphi ye auxakuchho muku bidi, tipau gholo atsükucho küthü eno ghope qhikeu küthü. 15Titoi ako tüxau ghi tishipe qhie. Bokütha khagho küdau ako kini lo nhaqhiphi ye auxakuchho muku kini, tipaqo gholo atsükucho küthü eno ghokepu küthü ishi mlae. 16Bokütha vehomxa ghi nhaqhiphi sükeu ye phepheike phi ayeho kivi no mlae. 17Eno atsükucho ghope qhikeu alazayi no mla, ikemu atsükucho kufuyi eno tipau tsügha kepu ye ghükayi no mla. Tipaqo kütsüqa ye ghükayi no küzüve, eno bokütha tsükucho kümtsü ghükayi no küzüe. 18Bokütha khagho ghenguno nhaqhiphi ye aye kivishi atsüla, hughai, eno huchuyi keu yeho eno phepheike phi kipili no tsüghusüe. Ti ye akushulau auxakuchho toku eno akiqhelau auxakuchho kini. 19Tipaqo tsükucho ye bidi. Ghope qhikeu ye alazayi no mla, pufu kepu no ghükayi no mla, eno akütsüqa küzü keu ngo tsüghasü keu no ghükayi no shie. 20Ampeu kungo phiki eno bokütha kümtsü alazayi no mlae.

Ampeu kungo Phiki Nhemgha

21 Ampeu kungo phiki, ti ashepe phiki ghenguno Moses zakütsü kiqi lono yekütsü keu ye hike, Levimiw bemakho ye Aaron achineu nu Ithamar kichemije kütsü qholono mlae. 22Judah shiaye lo Hur tilimi Uri nu Bezalel no Ampeu no Moses azah tsükeu kümtsü mla; 23eno pa gholo Dan shiaye Ahisamach nu Oholiab no mlae. Pa ye ayi yetha pesü kogheküghü shikemi lakhi eno phepheike phi kipili, atsüla, hughai eno huchuyi keu yeho pesü aye shisü chekemi ke.

24 Ampeu kimthe phiki kümla ghenguno ameshoyi peitha keqo kümtsü kihi kelo, akümllagho lono ameshoyi ithulu keu ye ahu 100, ti ye achineki lo ahu kimghi kiqi lono. 25Aqoaho launo ghükayi iloghi keu yekütsü kelo ahu 3,430, ti ye achineki lo ahu kimghi kiqi lono. 26Khunoqo je yekükütsü kaku lo akeno, ti ye ampe muku nguno kunguu, panongu lakhikhi no gram pungu tüxa tsü (ti ye achineki lo kimghi kiqi lo shekel tüxa qhemi), aqolo kiptimi lakh tsügho qhethonhe küthü aqhe pungu no lhopungu. 27Akimthe phiki mla kelo atsükucho ghokepu 100 mlakeu eno nhaqhiphi ghenguno ghükayi ahu 3,400 peithave, ghokepua lakhi lo ahu shighi bidi peithae. 28Ghükayi ahu 30 achili aghikeu pesü Bezalel no akufuyi, atsükucho eno atsükucho kütsüqa küzü keu lo peithave. 29Ampeu lau alazayi ikhiphe tsükeu ye ahu 2,425. 30Pa no tipaqo pesü kuposhukulu phiki kulaghi lo ghokepua, alazayi kiptia eno tipau alou alazayi khoje eno akiptia lo peitha kepu liqo mla, 31bokütha lo aboqha, bokütha khagho lo aboqha, aphiki she yetsa kepu ashu, eno bokütha lo sükepu jeli kümtsü mlae.

Currently Selected:

IPEKULU 38: SUMRVBSI

Highlight

Copy