IPEKULU 36

1“Bezalel ngo Oholiab eno atshamgha shikithimi ye Ampeu zakütsü kiqi lono Ampeu phiki kimthe kümla lo kiu kiumu mlaithalu penike akümla shikithi ngo alokütsü tsüvae.”

2Bezalel ngo Oholiab eno atshamgha shikithimi khunoqo mlo lo Ampeu no akümla shikithi süvetsü, eno amlo lo alokümsü akeu ghenguno akümla shiniye iqhoghi keno, Moses no panoqo ku. 3Eno akimthe-a mla nike ghenguno Israelmi no qhasütsü keqo kümtsü panongu no Moses launo luve. Panongu no itaghi pulokini kümllagho inaqhe atsütsü süghi auve, 4ikehu akümla shikithimi khunoqo no akimtheki lo akümla jeli shi akeno, panongu kümtsü ighi, milakhikhi no pütüta no mla akeu pasü lono ighi, 5eno Moses vilo pi, “Ampeu no ningu azah tsükeu kümla lo avehupu shi akeu nguno alau timiqo no peighi anie.” 6Ikehu Moses no azah tsüve no aghazü kümtsü lo asheshu, “Kiptimi mu totimi mu akimtheki ghenguno küqhasü akeu lo kiumu ala ye süghi kevilo.” Ikehu timiqo pelo peighi pemoni ke lakükha shive, 7kughengu tinhemgha panongu no akeqo ye akümla kümtsü shiqhilu kepu ae, eno ala ghi ake.

8Akümla kishimi dolo shitsami no Ampeu kungo phiki eno tipau gholono nhaqhiphi chighi mla. Tipaqo ye phepheike phi, atsüla, hughai eno huchuyi keu yeho pesü aye kivishi cherubim mlae. 9Akushulau nhaqhiphi lakhikhi lo auxakuchho chighikini eno akijelau nhaqhiphi lakhikhi ye auxakuchho kini. Nhaqhiphi kümtsü akije akushulau aqhemie.

10Pa no nhaqhiphi pungu pesü lakhino lakhi lo tsüghuda, eno kütau pungu akeu ghi pesü lakhino lakhi lo tsüghuda. 11Pa no atüghüu jolha lo atsülaphi pesü ashe lo pufukepu bocho mla. Tihutoi ajolha akiniu lo ghi ashe lo tipaqo mlae. 12Amqo atüghüu lo pufukepu lhopungu süwo tipau ajoshi mighiju püzü aqhemishi lakhiu lo ghi lhopungu tsüghu dawo. Pufukepu bochoqo ye lakhino lakhi ghüngüu qhie. 13Eno pa no ameshoyi pesü pufukepu lhopungu mlano nhaqhiphi lakhino lakhi lo kime küqha. Ikehu Ampeu kungo phiki ye akupuju lakhi shive.

14Pa no Ampeu kungo phiki khonha kepu ane mhi pesü nhaqhiphi mla. Pa no nhaqhiphi chighiqhaqhi mlae. 15Nhaqhiphi lakhi lo akushulau auxakuchho chighiküthü eno akijelau auxakuchho kini ishi. Nhaqhiphi chighiqhaqhi ye akije-akushulau kümtsü aqhemi. 16Pa no nhaqhiphi ala pungu pesü amqo lakhi shi tsüghu kime eno lakhiu mqo lo ala tsügho tsüghu kime. 17Eno pa no nhaqhiphi ala ashekhau lo pufukepu lhopungu mla eno lakhiu mqo lo ghi lhopungu süe. 18Pa no alazayi pesü pufukepu lhopungu mlano ala kini küqhano nhaqhiphi akupuju lakhishi mla. 19Eno pa no ambe yiko ngo ane yiko pesü Ampeu kungo phiki küzüpe qhikepu lakhi mla.

20Tishino pa no acacia sü pesü Ampeu kungo phiki choqhe kepu axu mla. 21Axu huye akushulau auxakuchho bidi eno akijelau aunhekipshe kini. 22Chokime küqhani ke ghenguno axu lakhikhi lo akighipe lo sükulupu kini mlae. Ampeu kungo phiki lo axu kümtsü lo pa no hipau mlae. 23Axuqo ghenguno pa no ishi mla: apeu küdau ghenguno axu muku. 24Pa no akhadu muku qholo ghükayi no shikeu boqha lhobidi mla, axu lakhi qholo akighipe lo sükulupu kini, eno tipa shelo axu lakhi qholo tipau sü kighipe lo sülu kepu kini ishi mlae. 25Ampeu kungo phiki ahuu küdau ghenguno pa no khagho muku mla, 26eno khagho lakhikhi qholo choqhe kepu ghenguno ghükayi pesü ghokepu-a lhobidi mla. 27Azübo küdau kulolau ghenguno chokiqhepu tsügho mla. 28Pa no athiu acheku ghenguno chokiqhepu kini mla. 29Tipaqo aqhou ye kütüta shi kemu akütsüqa loye abocho atüghüu lo kime küqhape qhive. Pa no hipa ghola lono acheku kini ghengu ghi mlae. 30Kümtsü küqha kelo chokiqhepu tache, ghokepu ghükayi no mlakeu chighitsügho, eno chokiqhepu lakhikhi qholo ghokepu kinini ae.

31Pa no acacia sü pesü akhadu chighipungu mla, pungu no ako lakhi küdau chokiqhe ghenguno, 32eno pungu no ako lakhiu chokiqhepu ghenguno, eno kütau pungu no azübo küdau chokiqhepu ghenguno ishi. 33Pa no amta lo hepta kepu khadu ashekichi lakhi lono ashe kichi lakhiu kutolo chokilepe qhi. 34Eno ameshoyi pesü chokiqhepuqo küzüve, eno akhaduqo chokime nike ghenguno abocho lo pufu kepu mla, eno ameshoyi pesü akhaduqo küzüve.

35Pa no ayeho atsüla, hughai eno huchuyi keu ngo phepheike phi kipili pesü nhaqhiphi mla; tipau lo cherubim koghe akivishi mlasüe. 36Tipau ghenguno acacia sü pesü atsükucho bidi mla eno ameshoyi pesü tipaqo küzüve. Tipaqo kufuyi ye ameshoyi no mla, eno tipaqo ghokepu bidi ghükayi no mlae. 37Pa no akulaghi lo ghi ayeho atsüla, hughai eno huchuyi keu ngo phepheike phi kipili pesü akoghe ye shisü no nhaqhiphi mla, 38nhaqhiphi hipau ghenguno atsükucho pungu gholo akufuyi mla, tipau kütsüqa ngo püta kepu sü kümtsü ameshoyi no küzüve no atsükuchoqo ghenguno alazayi pesü ghokepu-a pungu shipe qhie.

Currently Selected:

IPEKULU 36: SUMRVBSI

Highlight

Copy