APOSTOLMI 28
28
Malta lo
1Kütüsü mono ningu sawo toluve kethiu, züdoyeghi huye Malta kepi nino chilu. 2Tile küxümi no paküta keu kimiyekini ningu piye, kughengu tsüghuuve no süthi akehu, panongu no ami shino ningu kümtsü ikhilue. 3Paul no asükügha amqo lakhi kichepe ami lo sükelo athicho pighi no akülü pumla no ipeghi püzü pa u lo hechije luve. 4Kughou tipano ghami no pa u lo lhoxü hechijepe akeu ithulu keno, lakhino lakhi vilo pi, “Timi hipau ye mtsüqheino ghikiqhimie. Azüghi lono pojolu namu, Kuchou Xakütha huno pa püxü movae.” 5Ikemu pa no lhoxü hu ami lo kilhesüve no kiumu pa shipüsa moe. 6Pa ye ingu ipeghi momu züleno ikiqi thive nanie pi panongu no khea. Ikemu ado kushuo thiu ghi pa shou kiumu anguküsa ikughi move kelo, panongu no akükümsü kilive no pa ye alhoue piuve.
7Ningu no ngo akeu phivilo züdoyeghi tipau kükau Publius yeghi ae. Pa no ningu ikhilu eno atsala küthü ningu kimiyeqhiyi pa kilo sasü. 8Publius papu ye aghakimki ngo ajiküba no süae. Paul no pa xuju wuno pa u chhope pa shou beno inikhu tsü püzü shipivive. 9Kughou hi shikeno, züdoyeghi lo küsükinimi kütami ghi ighi no shikipivi ithulu. 10Panongu no ningu ghi akiqheu shi ikhilu, eno kughou ningu no cheve niye shive keno, nino avehupu shikeqo thokha panongu no peighi tsü.
Paul no Rome lo Ighi
11Aqhi küthü thiu, Alexandriami zükilu, züdoyeghi tipau lono süsü puwove keu lono ningu ye wuve, tipau lo alhou kinikishe julho ae. 12Syracuse lo ighi no ningu no atsala küthü ngove. 13Tileno ningu ye vehosü Rhegium lo ighi. Eno atsala lakhi thiu, apeu mülhü ighi no ghulo akiniu lono ningu ye Puteoli lo ighive. 14Tile ningu no küpülümi kusholu eno panongu no kusü kehu atsala tsüni panoqo gholo ngove. Tishino ningu no Rome tolu. 15Tile küpülümi no kughou ningu ghili chilu keno, Appius Lhikishi-a ngo Aghüzüki Küthü kutolo ningu sasü kusho niye ighi. Panongu ithulu kelo, Paul no Alhou shikimthi tsüno pa mlo kuloghi shikithelu. 16Kughou ningu no Rome lo iloghi keno, Paul ye ghüshimi lakhi no pa kheno pa kutoshi ngolu penike azah tsü.
Rome lo Akelo
17Atsala küthü thiu, Paul no tile Jewmi sakiphemi kukütsü. Kughou panongu no kumqolu keno, Paul no pi, “Athiküzümiqo, ni ye ni timi momu ni puasü khuaye shou kiumu mla pimi püamo kemu Jerusalem lono I küghape akughumi shi Rommi u lo süvetsü. 18Panongu no I piqhijuve kethiu I pheve nike pulove, kughengu I pithive kepu jeku panongu ye kiumu phumlae. 19Ikemu Jewmi no lakhave kehu, ni ye ni shiye shou nguku kepu kiumu küha kemu Caesar lau qhüiniju masave. 20Ikehu hipa vehu ghenguno ni ye nongu sasü kusho no küptsa niye kue, kughengu Israelmi lajupu ghenguno ni ye ayikichhe hipau no I tshüpe ani.” 21Panongu no pi, “Ningu ye Judea lono o ghenguno yesü kiumu ithumla, momu athiküzümi tilano ighi kemi mu o ghili küsa pimoe. 22Ikemu ningu ye o kükümsü kiu keno o launo chiluni shi ani, kughengu aqha kümtsü lo hipa mqo pipüsa akeu nino ithi anie.”
23Kughou pa sasü kushoni ke kihikütha tsala tove keno, panongu kutomo shesü pa kungo-a lo ighi. Inaqhe no avelau kutolo, pa no apasü shi Alhou yekipe shepe shitsü eno Moses Yezah ngo Tungkupmi kaku lono Jisü ghili pesü panongu züiza nike pükapütsa. 24Khami ye pa tsa no züluve, ikemu khami ye pülü tsümoe. 25Paul no atsa nhekha lakhi pive kethiu panongu dolo akükümsü küqha mlano ixawove: “Aghungu Kimthe no tungkupu Isaiah vecheo nongu puasü vilo ishi pikeu ye achipie:
26“‘Timi hipaqo lau wuno pilo,
“Nongu no chilu nani kemu khilemu vethamla nani,
nongu no ithulu nani kemu khilemu ithikuthu monani.”#Isa 6:9,10
27Kughengu timi hipaqo mlo ye mamaivae,
pano kini ye chimlavae,
pano nhethi miyi luvae,
tikumo aye pano nhethi no ithulu,
akini no chilu eno amlo no
ithikuthulu no I lau tsüghü ighi
kelo I no shipivi nosa kehue.’#Jhn 12:40; Rom 11:8
28Tighenguno hi ithilo, Alhouw xakulu huye Jewkumomi lau puwuvae; panongu no chilu nani.” 29(Pa no hipa tsa pive kethiu Jewmi no pano dolono kütsala ixawove.)
30Ampe kini kutolo Paul ye pa no ame süghi ngoche, eno pa lau ighi kemi kümtsü sasü kusholu no 31mtotoi lakükha kühano Alhou yekipe ghili sheshu eno Ampeu Jisü Khristo ghili pesü kütsü shikache.
Currently Selected:
APOSTOLMI 28: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
