APOSTOLMI 27
27
Paul sasü Rome lo Wuve
1Kughou Italy lo ningu puwuve nike xathave keno, panongu no Paul ngo akughumi kütami khami pesü Akükau Ghüshimi mqo lo aqhe zatsüu Julius ipikeu picheve tsü. 2Adramyttium shuka, khikhi Asia cheaxü lo azüghimkü phughiqo züsü wuniye akeno, tile ikuve. Thessalonica lono ighi kemi Macedoniami lakhi Aristarchus no ningu gholo wue. 3Thoghiu ningu no Sidon tolu. Julius no kimiyeqhiyi Paul ikhilu eno ado pa tsüno pa küsami lau wulu eno pa tucholupe. 4Tithiu ningu no Cyprus ije ghi wue, kughengu amülhü no ningu fudaqhi ake. 5Ningu no Cilicia ngo Pamphylia xüsa lo sükusho kühano wuve kethiu Lycia lo Myra tolu. 6Tileno aqhe zatsüu no Alexandriami zükilu lakhi Italy lo wuche keu phulu no ningu tile pukuve. 7Atsala hami ningu ye asheshi no chesü akushukulu Cnidus tolu, eno amülhü no azüu wulu pemove kehu, ningu ye Salmone ghüngü lono Crete ijesü wuve. 8Ningu no aveküsa shi azüghimkü ijesü Ashuka Kungo-a ipikeu tolu, tipa phivilo mishighüna Lasea ani.
9Ado kushuo puwove, eno ashuka ghüzüla ghi kümsapu shive kughengu itehi ye Kümvükeu#27:9 Momu Lokichile Tsala tsala ghi wove akehu, Paul no panongu akükümsü tsü, 10“Kijemiqo, I no pimhelu anike aghüzüla lo aghüzapu ngo amhekiqi kutomo shini cheni, ti ye tinhemgha ngo zükilu likhi kumono ningu küxüu ghi pühaveni cheni.” 11Ikemu aqhe zatsüu no zükilu küsau ngo zükilu mpeu lau amlo tsüno Paul tsa initsü move. 12Ashuka kungo-a ghi süsü ghenguno akivi kumove kehu kutomo no kishikela shimu Phoenix tolu no tileno süsü puwoni pi xathave. Hi ye Crete lo ashuka kungo-a, hileno apeu kulolau eno ahuu kulolau jupuwolu cheni.
Azüghi lo Pasapagha
13Kughou apeu mülhü no mtshaminhei ighi keno, panongu no ado kivi kepi kümsü no ayiküba ikhive no amkü mxüsü Crete kupunu wuche. 14Ikemu kushuo kumono pasapagha mülhü, ahuu kipela, ipikeu no züdoyeghi lono ighive. 15Kughou zükilu küzüpho luve no amülhü shoxüsü wumlave keno, ningu no amülhü süla shive no ashuka fusasü wuvepe. 16Ningu no Cauda züdoyeghi ijesü akushukulu zükilu lo ashukati sünhelu. 17Ti sünhesü luve kethiu, panongu no zükilu gholo ti tsügha küqhave. Syrtis lo aniba lo shosü lunikeu kümsa no panongu ye aphi xaqhive no amülhü no fusasü wuche. 18Ningu ye pasapagha no shishe sükuchoqhive kehu, thoghiu ye akho puche keqo azüghi lo vesü thuve. 19Eno aküthüni ye panongu ampi no zükilu nhemgha ikhipe azüghi lo vesüve, 20Kughou atsala kutomo khetsünhe eno ayepu ipeghi move no pasapagha no aghulo kumo ningu süho luve keno, ningu xalu nanie pikeu lajupu kümtsü hauve.
21Achuqupu chumo keu ado kushuo shive kehu, Paul no timiqo gholo puthugho no pi, “Timiqo, nongu ye I tsa inive no Crete lono wumo kepushi akena, tishike aye hitoi shiküpsa eno amhekiqi shimoni cheke. 22Ikemu I no nongu hakite anike amlo mtolo, kughengu zükilu kumo aye nongu gholo khuu küxümu pühamo nani. 23Kughengu itiji Alhou, khuu I no mlla cheni eno ni ye Paw shi acheni keno, Paw kungumi no I phivilo puthugho, 24eno pi, ‘Msa kevilo, Paul, no ye Caesar zülo puthugho masae. Julo, Alhou no zükilu lo o gholo kichemi kümtsü o tsüvae.’ 25Ikehu amlo mtolo, timiqo, kughengu I vilo kiu pi keno titoi shi nani kepi ni ye Alhou lau aküpülü ani. 26Ikemu ningu ye khileala züdoyeghi lo kutholeni chenie.”
27Kughou ghulo chighiabidiu ji shi akeno, ningu ye Adria Züghi lo che. Zübumta lo zükilu küsami no ayeghi kupunu akeshi kümsüve. 28Ikehu panongu no azükutho mighiju kelo, aunhekipshe 120 aghi. Kitila wuno itaghi mighiju kelo, aunhekipshe 90 aghi. 29Ikehu atuqu shou ikuveni keu kümsa no zükilu küsami no ayiküba bidi kuqhoqhive no tsüküvü kheae. 30Zükilu küsami no zükilu lono pove niye ayiküba kuqho akeshi amqü shino ashukati azü lo kitipiqi aghi, 31ikemu Paul no aqhe zatsüu ngo ghüshimi vilo pi, “Timi hipaqo no zükilu lo ngomo aye nongu ye xümoae.” 32Tileno ghüshimi no ashukati tshü püakeu kighi ghithave tsüno ti kütashi puwuve.
33Tsütho ipeche kelo, Paul no kümtsü vilo achuqupu hami chulopi hakite no pi, “Ishi atsala chighiabidiu nongu ye amlo kichi püha ighive no kiumu chumovae. 34Tighenguno I no nongu hakite anike kiuala chulo. Kughengu hi no akumto nongu tsü nani, nongu kütsüsa lakhimu pühamo nani.” 35Pa no hi pive kethiu, asho ikhipe kümtsü zülono Alhou shikimthi tsüno süphope chuuve. 36Ikelo kümtsü no amlo mto luve no achuqupu chuve. 37(Zükilu lo kichemi kümtsü kelo 276 ae.) 38Panongu no aghapiqi chuve kethiu, zükilu kho kümthü niye ashothi pesü azüghi lo vesüve.
Ashuka Kuboleve
39Kughou tsütho ipeghi keno, panongu ye ayeghi michimla no azümkü ithulu, ikehu tolukivi thaqhü zükilu sasü amkü lo ipe niye shi. 40Panongu no ayiküba ghithape azü lo süve, eno tipa mtsa helisa kighi kuqhove. Tishino amülhü fupuku keu phi süqhe no amkü lo saipe. 41Ikemu azü kikichhe dolo ilove no zükilu ye aniba lo shosüve. Zükilu kütsü meluve no itha move, eno azü fukukucho no athiu shophove tsü. 42Akughumi no azü ghasü wuve no pove nosa kehu ghüshimi no kümtsü pithive niye kughu. 43Ikemu aqhe zatsüu no Paul xaluni shi kehu panongu kukughu lakhave. Eno khunoqo no azü ghathi ani keno tipaqo paghi ilhe ilo no amkü lo ipe penike pa no azah tsü, 44eno kütami no asüpa ngo zükilu kughupo khamgho peni keu shive. Hitoi kümtsü no kütüsü mono amkü tolu.
Currently Selected:
APOSTOLMI 27: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
