APOSTOLMI 19
19
Ephesus lo
1Apollos no Corinth lo akelono, Paul no apukhu lono chesü Ephesus lo ighi. Tile pa no akhopemi khami kusholu. 2Pa no panongu vilo pi, “Nongu no pülülu kelo Aghungu Kimthe ithulu kema?” Panongu no pi, “Aghungu Kimthe anie pikeu ghi ningu ye khilemu chimla aphie.” 3Pa no pi, “Imaye nongu ye kiu lo baptiz shisülu kea?” Panongu no pi, “John baptizkishi lo.” 4Paul no pi, “John baptizkishi ye timiqo vilo milakhi pa thiu chekeu, ti ye Jisü, shou pülübe lo pikeu, axine lono xaidekeu baptizkishi ke.” 5Hipa tsa chilu no panongu ye Ampeu Jisü je lono baptiz shiluve. 6Kughou Paul no panongu shou pa u bekeno, Aghungu Kimthe no panongu shou ighi, eno panongu no amili lono eno tungkuptsa piuve. 7Tile timi chighikinia ae.
8Pa no aqhi küthü qhalo sinagog lono amlo kumtoshi timiqo pütsa, kütsala, eno Alhou yekipe ghili pesü züiza. 9Ikemu khami no kuthovi auve no pülümo püzü aqo zülono Alaghi vehu lhoksa piuve kehu pa no panoqo qhive no akhopemi sasü wuve, eno tsalakipe Tyrannus hoho ki lono küptsache. 10Ampe kini kutolo hitoi ache, eno Asia lo Jewmi ngo Greekmi kümtsü no Ampeu tsa chiluve.
Sceva Nuli
11Alhou no Paul vecheo paküta keu mzamghalei mla akehu, 12pa dilu keu küghüsüphi eno heqhiphi ghi timiqo no küsükinimi lau pewu kelo aküsüqo shipühave, eno tüghaküsa ghungu no tipaqo launo ipeve. 13Jewmi khami iqhoiqi aghawu haphe chekeqo ghi tüghaküsa ghungu akeqo shou Ampeu Jisü je kuno haphe ghi pi, “Paul no pikülha chekeu Jisü je lono I no azah o tsü ani.” 14Jewmi achinetou Sceva ipikeu nuli tsüni no hitoi shiae. 15Ikemu tüghaküsa ghungu no panoqo khochile, “I no Jisü ithi ani, eno Paul ghi ithi ani, ikemu nongu ye khuno kea?” 16Timi khuu philo tüghaküsa ghungu akeno, pa no panoqo shou ilhe ikughi no kümtsü süqoqhi eno mhoqhive kelo, panongu ye aki lono aphikümsa aghüzaku pusü pove. 17Ephesus lo küami Jewmi ngo Greekmi kümtsü no hi ithive, eno akümsa no kümtsü shou ikughive no Ampeu Jisü je sheqhe. 18Pülü luve kemi gholo ghi kutomo no ighi no panongu no kiu mlache keno küsü mono aqha zülono piphe. 19Küdüu kishimi kutomo no panow kakuqo kumqope aqha zülono pitive. Ti kaku me kihiju kelo ghükayi qhethonhe lhopungu shi aghie. 20Hitoi Ampeu tsa ye alau veküpha wove no mtotoi thuwuve.
Ephesus lo Hekibide
21Hipa thiu Aghungu no hakite keu lono Paul no Macedonia ngo Achaia vechesü Jerusalem lo wunikeu vehu kughu ghi pi, “I no tilau wuve kethiu ni ye Rome ghi xuju masae.” 22Pa kukuphumi Timothy ngo Erastus pama Macedonia lo puwuve no pa ampi ye Asia lo ado hami ngove.
23Tipa ghuloki lo, Alaghi vehu ghenguno aküküpna kije ipeghive. 24Ghükayi kiyiqiu Demetrius, khuu no ghükayi pesü Artemis lholiu chineki mlatsü keno, paw lhidi lono akümlami kutomo la shitsü che. 25Pa no timi hipaqo eno titoike kümla kishimi kümtsü kukumqo no pi, “O nongu, ningu ye hipau lhidi lono ni küakini anie pi nongu no ithi ani. 26Nongu no chilu eno ithulu anike Ephesus lo likhi kumono Asia kümtsü lo, hi Paul no au no mlakeu lhouqo ye khilemu alhou kumoe pino timi kutomo züiza sawuvae. 27Kümsapu akeu ye niw lhidi je küsapu likhi kumono, Artemis lholiu akijeu chineki ghi kiumu kumoveni cheni, eno Asiami ngo ayeghiqha no mlla chekeu li huye ajekipi-a lono ikiqiveni chenie.”
28Timiqo no hi chilupe axuideve no ighamku, “Ephesiami lhou Artemis no akijeue!” 29Tileno aphughi lo kübangü ipeghive, eno timiqo no aqoshi aghili kilo kohasü ilo no aghüzüla lo Paul küsami Macedoniami Gaius ngo Aristarchus pama sünhe sawuve. 30Paul ye aqokitikhi gholo wunishi akemu akhopemi no wupe move. 31Asia lo yepemi khami Paul küsami ghi pa vilo khilemu aghili kilo wu kevilo pi asütsa pi puwu. 32Timi khami no hiuke ipi, khami no huuke ipi igha ae, kughengu aqo ye aveghüzü shive, eno panongu kutomo no kiu ghenguno kumqo akeno mthae. 33Amqo khami no Alexander iniju, kughengu Jewmi no pa pelo panongu züu puwue. Alexander no shokha keu tsa piniye au kihipe timiqo vilo inaqhoi shilopi. 34Ikemu kughou pa ye Jewmi kepi ithive keno panongu kümtsü no qhai, “Ephesiami lhou Artemis no akijeue,” ipi ayi kihedo kini kutolo ighamku.
35Tithiu aphughi lo akiyeu no aqokitikhi ghasüve no pi, “Ephesus lo küamiqo, Ephesus phughi ye Artemis akijeu chineki kheu, eno atsütsü lono akimthe tuqu iluiqighi ke-a ipi khuu no mtha kea? 36Khunomu hipaqo lachile mlake nongu ye qümüi kepu eno kiumu chokilhe kepu kumoe. 37Kughengu timi hi khunoqo nongu no saghi ani keno, panongu ye achineki shikuchhube kemi kumo momu ni lholiu thaigha püamoe. 38Ikehu tsala Demetrius ngo pa kümlami no khuana shou nguku kepu aghi aye, küghaki ye khaqhi püani eno küghaküthami anike panongu ye tilau no lakhino lakhi shou nguku apelo. 39Ikemu nongu no tinguno alau phujuni aye, aghakhumi hoho lono xathalu nani. 40Kughengu ishi mbumghu ipeghi akeu lo ningu ye kiu ghenguno keno akiqi tsükulupu kiumu küha kehu akipimi ningu tsülu kepu lo auvae.” 41Pa no hi pive kethiu, timi kumqo akeqo puwove.
Currently Selected:
APOSTOLMI 19: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
