APOSTOLMI 20
20
Macedonia ngo Achaia lo
1Aküküpna thiu, Paul no akhopemi kuno panongu mlo shikumto tsüno ileno alo pive, eno pa ye Macedonia lo wuve. 2Pa no tipa cheaxü qhalo wuno timiqo shikumto tsü, eno Greece lo ighive. 3Pa ye tile aqhi küthü ngove, tithiu ashuka lono Syria lo wuniye akelono Jewmi no pa pithive niye kuchughu aghive kehu Macedonia küdau no ideighini ke kughuve. 4Bereami Pyrrhus nu Sopater no pa sasü wuve; eno Thessaloniami Aristarchus ngo Secundus; Derbemi Gaius; Timothy ngo Asiami Tychicus ngo Trophimus 5hipaqo no azüu no wuve no Troas lono ningu khe aghi. 6Ikemu ningu ye Kholaqhi sümokeu Sho ghulhu thiu Philippi lono cheve, eno atsala pungu lono Troas lo panoqo lau ighi, tilau ningu ye atsala tsüni ngove.
Akithi lono Eutychus Xüputhu
7Apine kithe lo atsala atüghüni, ningu no aghulhu shiniye kumqo akelo, Paul ye thoghiu wuve niye akehu pa no timiqo sasü küptsa anipi zübumta kutolo süpushuve. 8Ningu no akeu kunguu chebo lo akulu kutomo ae. 9Tile apumi lakhi Eutychus ipikeu ye Paul no shulo atsa pi auve kehu, alashe mütsü lo iqa ghi cheyi zühuve. Eno zücheive kehu pa ye aki jolha aküthüu lono ikiqive no khapeqhe kelo thive aghi. 10Ikemu Paul no iqi no itsaqi püzü pa u no vapeno panoqo vilo pi, “Amlo kichi püha kevilo, kughengu pa lolo aküxü aphie.” 11Tishino Paul no kunguu ikuve no achuqupu chuve kethiu, tsütho moke kutolo küptsa ano cheve. 12Panongu no apumi hu thai aki lo sawuve eno ighono panongu mloqive.
13Ningu no ashuka lono Assos lo wuve, kughengu Paul no pekithi tsüke toi tilau no pa saluni ye kughu, pa ye apukhu lono tilau ighini keu shiae. 14Kughou pa no Assos lono ningu sholu keno, nino pa saluve no Mitylene lo wuve. 15Thoghiu Chios ghüngü tolu, aghiniu no Samos tolu eno kuniu no Miletus tolue. 16Paul ye Asia lono ado puwo moniye Ephesus kathasü wuniye kughuve, kughengu pa ye Pentecost tsalani Jerusalem lo tolu nike mighi cheke.
Ephesus lo Layemi Pütsa
17Miletus lono Paul no Ephesus kukuhou lo kichimiqo pa lau ighi penike ku puwu. 18Kughou panongu no ighi keno, pa no pi, “I no Asia lo I pukhu nesüke tsalani no kishi nongu gholo xükeno nongu ampi no ithi ani, 19shishe aqhokighe eno anhezü kipiji shino Ampeu huthu, eno Jewmi no kuchughu keu vecheo ighono I pishipuju püani. 20Ni ye nongu kuphulu kepu tsa süchile mono mishi gholo eno aki-aki lono shika püani. 21Jewmi eno Greekmi vilo ghi Alhou lau xaide ighi no ni Mpeu Jisü Khristo pülü penike thopi shi püani. 22Eno itehi ye Aghungu no I pekülhü keu kiqi lono, I lau kiu shive nani keno mtha kemu ni ye Jerusalem lo wucheae. 23Aphughi kümtsü lo Aghungu Kimthe no akughukishi eno shiluküsa no I khe akeu kütüghü ani. 24I kimjiu ye Alhouw küpükini tsakiviu sheshu peni keu kümlapu saje khikhi Ampeu Jisü no I tsü keno ti shikupu luni malapi ani thono ni ye I küxü pesü ameküapu momu akughupu shi chemoe. 25I no ithi anike nongu khunoqo lau I no Alhou yekipe sheshuve akeno, itehi ye khilemu I ju ithulumae. 26Tighenguno ishi tsala lono I no nongu lau thopi shi anike nongu no pühave aye I makho kumoae. 27Kughengu Alhou kimji kümtsü pesü nongu vilo pikülha nike ni ye süchile püamoe. 28Nongu ampi jukütsükiyi lo eno Aghungu Kimthe no nongu pesü khunoqo shou jukükütsümi shive akeno, aloji kümtsü jukuto lo. Alhou kukuhou kheu shilo, ti ye Pa no Pa ji pesü qhüluvae. 29I no ithi anike I no cheve kethiu tüngtügha yiküsa no nongu gholo ighi no küpülümi lojiqo püxümo nani, 30eno nongu mqo lono akhopemi züluve nike atsa tuchighi kemi ipeghi nani. 31Tighenguno tsükhüi alo, I no anhezü piji, ampe küthü kutolo tamono putho pucho nongu lakhikhi shika chekeu kümsü lulo. 32Itehi ye Alhou lau eno Paw küpükini tsa lo nongu kulhuqhi tsü ani, tino nongu xaqhelu nani eno Paw shiluve kemi gholo nongu mheghi ighilu penani. 33Ni ye khuuw ameshoyi, ghükayi, aphimini mu mine püamoe. 34Nongu ampi no ithi anike I u pesü ni eno I gholo kichemi vehupu kümtsü lo mlaitha cheke. 35I no thokha lo nongu piyeve ake ningu ye ichheime mlano miqemlei kemi kuphu, eno Ampeu Jisü ampi no pikeu tsa kümsülu masae, ‘Tsükeu no lukeu nguno akümghapue.’”
36Kughou pa no hipaqo pive keno, panongu kümtsü sasü qhoqhünhe no akighini shi. 37Tile panongu kümtsü no qaukhave; eno Paul vape no müma, 38kütau nguno alau panongu no ighono amlo imeve keu ye panongu ye pa ju ithulu kithemae pi pa no pike ghenguno ke. Tithiu panongu no pa sawo ashuka lo phesüve.
Currently Selected:
APOSTOLMI 20: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
