APOSTOLMI 18
18
Corinth lo
1Hipa thiu Paul ye Athens qhive no Corinth lo wuve. 2Pa no Pontusmi Jewmi Aquila kusholu. Aquila ye anileshi pa nipu Priscilla sasü Italy lono ighi ae, kughengu Claudius no Jewmi kümtsü vilo Rome qhive lopi azah tsüveke. Paul no pama pütsani ye wu, 3eno pa ghi pama toi aphiki lhikishi lo akehu, panongu kümtsa ngono kilhisho shiuve. 4Sabbath atsütsü pa no sinagog lono kütsala no shika, eno Jewmi ngo Greekmi züiza niye pükapütsa che.
5Kughou Silas ngo Timothy no Macedonia lono ighi keno, Paul ye ado kümtsü atsa pesü Jewmi vilo Khristo ye Jisü kepi ashepe shiae. 6Jewmi no pa küla eno pipütha kelo, Paul no pa phimini kuthove no pi, “Nongu ji no nongu kütsü lo ikughi nani! Ni ye akipimi kühae. Hinguno hilau ni ye Jewkumomi lau wuniae.” 7Tishino pa no tipa-a qhive no Alhou kümllami Titius Justus ipikeu kilo wuve. Pa ki ye sinagog shelo ake. 8Sinagog yepeu Crispus no pa kibolomi kümtsü sasü Ampeu küpülümi shive. Corinthmi kutomo no Paul no pikeu tsa chilu no pülü luve eno baptiz shive. 9Kijili lakhi kungunhetsü lono Ampeu no Paul vilo pi, “Msa kevilo, inaqhoive kevi ikemu tamono pilo, 10kughengu I no o gholo ani, khunomu o ghüzamo nani, kughengu mishighüna hipau lo Iw timi kutomo ani.” 11Pa ye ampe lakhi no aqhi tsügho tile ngono Alhou tsa pesü timiqo shikae.
12Ikemu kughou Gallio no Achaia lo angh shive keno, Jewmi kümtsü küqha no Paul küghape küghaki lo saghi, 13eno pi, “Timi hipau ye ayezah hebide ghi timiqo vilo Alhou mlla penike züiza ani.” 14Ikemu Paul no atsa piniye shikelo, Gallio no Jewmi vilo pi, “O Jewmiqo, akumou kümla momu heqhi-buqhi keu vehu aye, ni ye nongu no akipimi tsü akeu ikhilu tsüni cheke. 15Ikemu hi ye atsa ngo aje eno nongu yezah vehu kütsala keu keke nongu dolono xathalu lo. Ni ye hipaqo vehu loye küghaküthau shimoe.” 16Eno pa no küghaki lono panongu hapheve. 17Tileno timi kümtsü no sinagog yepeu Sosthenes tsüqü luve no angh zülono pa heqhi thuve. Ikemu Gallio no kiumu alomsü tsümoe.
Paul no Antioch lo Ideighi
18Hipa thiu Paul ye ado hami ngo apüzü, küpülümi qhive no Priscilla ngo Aquila pama sasü ashuka lono Syria lo wuve. Pa no ashoqhi shipüa kehu Cenchreae lono akütsüsa tsave.#Aki 6:2,18 19Panongu no Ephesus lo ighi kelo, Paul no panoqo tile qhive no, pa ye sinagog lo Jewmi sasü küptsa wuve. 20Panongu no pa vilo ado ta ngo aghi lopi kemu pa no lachileve. 21Ikemu panongu qhive no wuche kelo pa no pi, “Alhou pulou shi aye, ni ye nongu lau ideighi nani,” eno pa ye Ephesus lono cheve.
22Kughou Caesarea tokeno, pa no akukuhomi sasü kusholu no tithiu Antioch lo wuve. 23Tile ado hami ngove kethiu, pa ye Galatia ngo Phrygia qhalo, a-a lakhi lono lakhi lo chesü akhopemi kümtsü shikumto wuve.
Ephesus lo Apollos Shepe
24Alexandriami Jewmi lakhi Apollos ipikeu, atsa pikithimi eno Kuchoyesü ithishe kemi, no Ephesus lo ighi. 25Pa ye Ampeu laghi lo akivishi shika puthuve kemi. John baptizkishi likhi ithi keghi aghungu lono azükini shi akehu, pa ye Jisü ghili mtsümishei pesü pikülha eno shika ae. 26Pa no amlo mtotoi sinagog lo atsa pie, ikemu kughou Priscilla ngo Aquila pama no pa tsa chilu keno, pama no pa sawo alau Alhou laghi mtsümishei lhepiye. 27Kughou pa no Achaia lo wunishi keu pi keno, küpülümi no pa shikumto eno pa ikhilu tsü penike akhopemi lau yesü yetsü. Pa no ighi kelo khunoqo küpükini vecheo pülülu keno, tipaqo shishe kuphu tsü, 28kughengu pa no Kuchoyesü vecheo akumtoshi Khristo ye Jisü kepi mishi zülono Jewmi ghechile.
Currently Selected:
APOSTOLMI 18: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
