HLAZY HLA 4
4
Sawlawmaw ta a myuh chhithaina a palyupalih
Myuhneituhpa
1Âh, nâ ngia tlai na, ei lôhdunô,
Na vaw chhithai tlai na!
Nâ khuna poh ry liata na mozy vachhuh lyu ta,
Na sâ chhao Kilia tlâhzy tawhta a zâ chôpa mie hrizy a lyu.
2Na hâhzy cha ti pasi khai tawhta a vaw puapa,
Hmi ngyu duapa mietaku panô zawzy lyu ta,
Ama zydua ta maphieh taw pataw chyu ei ta,
Ama taw ama pahlei tlâ leipa hawhta a châ.
3Na hmaozy pala saihlawpa lyu ta,
Na pakah chhao kho â chhih ngaita.
Nâ khuna poh ry liata na ôkhaihzy cha,
Pawmikarânâ patlawpazy a lyu.
4Na rao cha alôzy pachopa ta paduapa
Dâvi o sâhpa lyu ta;
Cha liata vyhphao sâh kha a bangieh ta,
Pasaiphazy vyhphao sai a bangieh.
5Na sâhpi mianozy cha sakhih taw pô no lyu ei ta,
Lilipawzy hry liata a tlaihpa
Sakhih taw maphieh tlai ama lyu.
6Noh vaw nai ta,
Nohawh tlâh a khô hlâlei cha,
Deiryh tlâhpi lâ a chhei aw na ta,
Ropahâhpa tlâhthlôh lâ ei chhei aw.
7Nâ ngia paki tlai na, ei lôhdunô,
Sei nawpa rai hnei va chi.
8Hy keima myuh thieh, ei hnohta Lebanaw tawhta za sie la,
Ei hnohta Lebanaw tawhta za sie ha mah y.
Amânâ laki tawhta vaw pua la,
Seni nata Hâmaw laki tawhta vaw pua mah y.
Chakeibarôhneipa lôpuzy tawhta vaw pua la,
Keichhoh tlâhpi tawhta vaw pua mah y.
9Hy ei sietanô, keima myuh thieh,
Na iah ta ei chhôhso na zai ta,
Ei kha eina vaw mopa chi ta,
Na pachhih liata lôsôhpa miakha ta,
Ei chhôhso a pahnie haw.
10Hy ei sietanô, keima myuh thieh,
Na kyhpachâna khoiah a vaw hnei rimâ cha!
Na kyhpachâna kresawhti hlâta pahâh via syulyu ta,
Na sathaw ropahâhpa chhao,
Ropahâhpa zydua hlâta a pahâh via.
11Hy keima myuh thieh,
Na hmao tawhta pawti a thlaoh ta,
Na paleih ry liata kheihti nata sâhpiti a y;
Na chysia roh cha Lebanaw roh a lyu.
12Ei sietanô cha sadô khawpa châ ta,
Ei myuh thieh cha tihnawh chhie pachhôpa,
Tikhaoh pamaipa a châ.
13Na chiahzy cha pawmikarânâ sadô châ ta,
Thei pha chaipazy pathei ta,
Henâ nata spinâ zy puana sadô a châ.
14Spinâ nata iahsamai zy y ta,
Basuh ropahâhpa nata lôiasoh zy a y.
Ropahâhpa tho to y ta,
Deiryh nata lilipaw chhao a y;
Ropahâhpa chi to yna sadô a châ.
15Tihnawh palina sadô châ ta,
Hrona tikhaoh chhao y ta,
Lebanaw tawhta vahtiezy lona sadô a châ.
16Hy maw thlih, a hra la,
Hy chho thlih, a vy mah y!
Ei sadô liata vaw pathli u la,
A ropahâhpazy charao zaolao mawh sy.
Myuh
Ei lôhdupaw cha a sadô liata a vaw ngia sala,
A thei pahâh chaipazy vaw nie mawh sy.
Currently Selected:
HLAZY HLA 4: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
