HLAZY HLA 3
3
Myuh ramâ
1Zâ ta khôpheih chô tawhta rohpadypa ta,
Lôh rie ei ngiabâh chaipaw cha tlua na ta,
Tlua na ta, châhrasala hmô va na.
2Thyu aw na ta khihpi chahryhpa ta,
Lâlaizy nata tlyliahzy chahryh laih aw na ta,
Lôh rie ei ngiabâh chaipaw cha ei tlua laih aw.
Tlua laih na ta, châhrasala hmô va na.
3Khihpi vaituhpazy ta
Khihpi ama chahlô nota na hmô ei ta.
“Lôh rie ei ngiabâh chaipaw nama hmô ma?” tah ei na ta.
4Âmo ei khôpa nah ei ta,
Lôh rie ei ngiabâh chaipaw cha hmô na ta;
Ei hmôpa nahta patu na ta,
Ei nô o lâ ei chhi hlâlei cha,
Nâ phaohtuhpa chhôhpadâhpa lâ ei chhi hlâlei cha,
Pathlie khao va na.
5Hy Zerusale zuahzy saih u,
Lyurâh sakhih nata sasu moh ta,
Bie ei cha pataihsa ei;
Ano tlai ta a khoh hlâlei la,
Kyhpachâna cha a tha pathyu leipa u la,
Pahra hra khuh vy.
Myuhneituhpa a vaw tlô
6Deiryh nata sathaw ropahâhpa a thu ta,
Sôhdaoh liata ropahâhpa paohzy a hniapa ta,
Meikhuh a duahpazy hawhta,
Râhchawhpa tawhta â vypa hao ahy ma a châ tly?
7Moh tua u, Sawlawmaw amâ syna dyuchhai a châ huh!
Pasaipha sycharu ta chadô ei ta,
Izarei pasaiphazy ta ama chadô.
8Ama zydua ta zaozi a vao ei ta,
Riah tu a thaipa sai ama châ.
Ama byhpi liata zaozi a vao chyu ei ta,
Zâ chariah chichhihpazy amâ dyuh.
9Bei Sawlawmaw cha Lebanaw tho hmâpa ta,
Asyna dyuchhai ano châta a tao ta.
10A tôhzy tâkâ ta tao ta,
 hniehna ngôh châ ta,
 tyuna cha poh nohsaihpa a châ.
A chhôh cha Zerusale zuahzy ta
Kyhpachâna ta ama tobi.
11Hy Zaio zuahzy saih u, pua u la,
Bei Sawlawmaw hao moh tua u.
A lapi hnei noh châta a nô ta lakho a pakhopa a kho ta,
A palôh thapha noh ta â kho awpa lakho a khopa ta â vy huh.
Currently Selected:
HLAZY HLA 3: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
