BIESOZY 23
23
1Ryureituhpa nata pati na dôh khoh tita,
Na hmiakô liata ahy ma a y tahpa a phapa ta pachâ mah y.
2Niebaw a zoh kawpa na châ khiahta cha,
Na rao liata chaizôh soh mah y.
3A pati pahâhpazy tlaichhai kaw khah y,
Dôveina pati ama châ.
4Hneirôh awpa ta na rie a pathei tu leipa la,
 daihna rakha pahno awpa ta so thai kaw mah y.
5Sôh cha na hmôpa nahta thlai a pai tyh;
A mathlaw kaw thao ta,
Pahmôh hawhta avâ lâ â zaw syulyu ha tyh.
6Chyhsa mochhihpa viahchhâ cha nie leipa la,
A pati pahâhpazy chhao tlaichhai hlei khah y.
7A hryuh awpa sai pachâ ta,
“Nie la, doh mah y,” cha tah taraw ta,
A palôh hmeiseihpa liata deikua cha châ ly hlei vei.
8A chyhta na niepa chhao pali lilaw aw chi ta,
Na bie phapa tlao na papâpahria.
9Ahrupa theina liata bie reih khah y,
Na sona biezy a mohnao pathlei aw na.
10Râhri lôbô hlôpazy pasie leipa la,
Paw hnei leipazy lyu liata a ngia khah y.
11Âmo chatlaituhpa cha a thatlô tlôh ta,
Âmo a duakheipa ta a châ dyuh pathlei aw na.
12Pachuna lâ na palôh pahei la,
Na nah chhao pahnona biezy lâ pahei mah y.
13Sawnawh chhoreipa a chalihsai khah y,
Sôsi ta na tupa chhao ta thi aw vei.
14Sôsi ta na tu khiahta cha,
Athihkhih tawhta a hrona na pachha aw.
15Ei sawchapawpa y, na palôh a so khiahta cha,
Keima palôh chhao â ly aw.
16Na hmao ta hmo dopa a rei tita,
Ei palôh â ly ngaita aw.
17Na palôh ta moleipazy uahva leipa sala,
Noh y ta Abeipa chipa ta tlao y mah y.
18Hmialâ daihti hnei aw chi ta,
Na hnabeiseihna cha pahleipa châ aw vei.
19Ei sawchapawpa y, nathliepa ta so la,
Lâpi dopa liata na palôh soh mah y.
20Kresawhti iahzaipazy hry liata a hlao leipa la,
Sa zohpazy hry liata chhao a hlao khah y.
21Sahma paripa nata sa zohpa zy cha dyhchhiena lâ pangai aw ei ta,
Tla-uahna ta âmo cha poh chypa a pabu aw ei.
22Châ satuhpa na paw bie nathlie la,
Na nô a nôpi tita mohnao khah y.
23Biehmeiseihpa chalei la zuah khao leipa la,
Sona nata pachuna nata pahnona zy chalei mah y.
24Mosiapa paw cha a ly ngaita aw ta,
Sawchapaw sopa paw chhao a saw chô liata â ly kaw aw.
25Na paw nata na nô thaphapa ta y ei sala,
Châ satuhpa na nô cha a lypa ta y mawh sy.
26Ei sawchapawpa y, na palôh na pie la,
Na mozy ta ei lâpizy moh mawh sy.
27Âzuahnô cha khaohtlô athupa châ ta,
Apheinô chhao tikhaoh buahpa a châ.
28Hraotuhpa hawhta chyhsa a byh ta,
Chyhsapazy hry liata ngâchhih leina a papôhsa.
29Ahy ma a hupo ta, ahy ma a pachâ a rôh?
Ahy ma a hryuh ta, ahy ma a paphôh?
Ahy ma a chhâpa y leipa ta hmah a phaoh?
Ahy ma a mozy a saih khai haw?
30Âmo cha kresawhti dona liata a y parei tupazy châ ei ta,
Kresawhti pahlaopa do awpa ta a puapazy ama châ.
31Kresawhti a saih nota moh leipa la,
Nyu liata a rôh â ngia kawpa chhao moh hra leipa la,
A loh zaolao ngâpa chhao moh hra khah y.
32A chhâna liata cha parih hawhta cha pachu aw ta,
Vâzi hawhta a cha pachu aw.
33Na mo ta hmo nano kawpazy hmô aw ta,
Na palôh ta bie chhiepazy a reih pathlei aw.
34Tilaipi liah liata a ziapa hawhta châ aw chi ta,
Balyh pohraina tôh pawhmao liata a ziapa hawhta na châ pathlei aw na.
35“Na tu ei ta, pasa leipa na ta,
Na chhei ei ta, pahno va na.
Ei kaw hrapa nahta,
Ei doh heih aw,”
A tahpa na châ pathlei aw na.
Currently Selected:
BIESOZY 23: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
