Titusi 2

Berem delo na wae de woli nɔɔna to

1Ko nam ná ye nmo Titusi, se n ta‑n bere nɔɔna ba na wó ke tei se ba taa tɔge berem chekke dem to. 2Nmo jege se n bere nɔn-kweero se ba taa nege ba tete mo, se ba kwori ba taa ye jawale-nyena, se ba yɔɔre ba sɛ Yezu de wo-dedoa, de swono, de pu-dɛa.

3Ko ná ye kazena, se n pa ba taa jege ba tete se ko pa Wɛ taa nae zula ba tei ne. Ba nam yé taa ye bebare-nyena, naa ba taa pae sana nyɔɔm wae-ba. Ba nam jege se ba taa bere nɔɔna chwo-laao tɔgem na ye tei to. 4Konto mo ba wae ba pa se ka-bwona zamese ba na wó taa jege ba banna swono, de ba bia swono tei. 5Ko maŋe se ka-bwona bam taa ye jawale-nyena balo na cho ba tete de digiru to, se ba kwori ba taa ye ka-yerro telo na toŋe sɔŋɔ totoŋa lanyerane ye ba sɛ ba pa ba banna to. Konto to, nɔɔna daa bá na chwoŋa se ba yaale Wɛ taane dem, kaana banto kikia yam ŋwaane.

6Ko ta ná ye nɔn-donno, se n kwoori-ba se ba de taa ye jawale-nyena wonnu maama baŋa ne.

7Ko nam ná ye nmo tete, ko maŋe se n kikia yam bere nɔɔna ba na wó ke tei ba tɔge chwoŋa lanyerane to. Nmo na bere-ba Wɛ chega kam tei to, se n seene n yia n bere-ba lanyerane. 8Pa se n ni taane taa jege chega, se nɔɔn-nɔɔno yé zaŋe o yaale-de. Konto to, wolo maama na done debam to wó na o chaveera de woŋo na tera se o maa ŋɔɔne o chɔge debam yiga to.

9Ko daare ko ná ye kabɛ, ko maŋe se ba sɛ ba pa ba tiina wonnu maama wone, se ko pa ba tiina bam wo pwoli. Ba yé ve ba tiina bam ni, 10naa ba ŋɔ-ba. Ba nam pa se nɔɔna taa yei ba wo lanyerane de wonnu maama, se ko pa nɔɔna lɔre we, berem delo na vei dé Vereno Wɛ chega kam seeni to jege kuri lanyerane.

11Kokuri to, Wɛ pɛ se nɔɔna lɔre o zaane dem na ye tei, se ko pa ba maama na verem o tei ne. 12Wɛ tɔge o zaane dem konto ŋwaane o korese debam se dé lɔre we, ko maŋe se dé yage wɛleera kikia maama, de wo-yɔɔro telo dé fera na zoore to, se dé daare dé taa ye jawale-nyena logo baŋa ne, ye dé tɔge chwoŋa lanyerane dedaane Wɛ kɔrɔ. 13Ko maŋe se dé taa ye konto mo ye dé jege teena se dé pɔ Yezu Krista de wopwolo, se o jwoori o ba o veere o tete nabiina yiga ne. Wonto mo ye debam Wɛ-kamunu ye o ta ye dé Vereno. 14O ma kwei o tete o ke nabiina jeŋa ne, ye o sɛ se o te se o ma ŋwe debam wɛleera jene, se o daare o fɔge o kwɛ dé bochara se dé taa ye o tete nɔɔna, ye dé tiini dé seene dé yia wo-laaro kikia baŋa ne.#1 Piita 1:18

15Nam ta‑n bere nɔɔna wonnu tem konto se ba taa tɔge-te, se n daare n kwoori-ba ye n kwori n bwɛ-ba, se ko maŋe de nmo na jwoŋi dam se n ke tei to. Nam yé sɛ se nɔɔn-nɔɔno gwooni nmo.

Currently Selected:

Titusi 2: KBG

Highlight

Copy

Compare