Ruf 4
4
Bowaza swo Ruf
1Bowaza ma vo teo kom manchwo-peena yam ni o jeini mɛ nakwa bam déem na jei ba di taane to. Ko na ke fee to, o yera nɔɔno wolo de daa na tiini o bwola ye o ta o taane to ma tɔge da o maa kɛa. Bowaza ma bwoŋi‑o o we, “A choro, ba n jeini ywo.” O ma vo o jeini da. 2Bowaza ma bwoŋi teo kom nakwa fuga o pa ba de jeini ba tei ne. Ba na jeini to, 3o ma ta de o choro kom o we, “Nawomi laam nwoŋi Moaba o jwoori o ba. O maa lage se o kwei debam choro Elimeleka tega kam o yeigi. 4Amo na boŋe tei to, ko maŋe se n ta‑n yei ko ni ne. Nmo ná laga se n yeigi tega kam, se n yeigi-ka nakwa bam de nɔɔna balo maama na jei ywo to yiga ne. N ná lage n jwoŋi-ka, nam jwoŋi! N daa‑n ná ba laga, se n ta se a lɔre. Nmo mo wó da yiga se n yeigi-ka. Nmo nam ná wo yeigi-ka, amo wó wane a yeigi.” Nɔɔno wom ma leiri o we, o wó yeigi-ka.
5Bowaza maa we, “Tɔ. N nam ná yeigi tega kam Nawomi tei ne, ta‑n yei we, nmo wó lɛɛre n swo Ruf na ye kadeim ye o nwoŋi Moaba to n woli da. Konto mo wó pa se tega kam maŋe o bar-dwooru wom dwi jeŋa ne.” 6Nɔɔno wom na nigi konto to, o ma ta o we, “Ko nam ná ye konto, amo daa bá yeigi tega kam. A ná yeigi-ka, a bia jwa bá taa tei-ka. Nmo nam ná wó leiri a yuu ne n yeigi-ka, se n ke konto.”
7Ko déem na yeini ko ke tei Isarele tiina bam tei ne to, nɔɔna ná yeigi wonnu ba pa daane, ba dedoa mo wó le o natere o kwei o pa wodwoŋi wom, se ko bere we ba sɛ pipiu kom. Konto déem bere we keim dem tɔge chwoŋa chekke. 8Konto ŋwaane, Bowaza choro kom na tage o we, Bowaza mo wó yeigi tega kam to, o ma le o natere o pa‑o. 9Bowaza laam ma ta de nakwa bam, de balo maama na wora to o we, “Abam maama zem nɛ we amo yeigi woŋo kolo maama ya na ye Elimeleka nyem to, ko woli de o bia Kilion, de Maalon de wonnu maama Nawomi tei ne. 10Ko ná ye Moaba tiina bukɔ Ruf wolo na ye Maalon kadeim to, amo jwoŋi‑o a woli da pa se o ye a kaane. Konto wó pa se too wom yere taa wo o jejegero baŋa ne, ye o dwi taa twoŋi taa dé teo kom ne. Abam zem maane we ko ye chega.”
11Nakwa bam de balo maama na wo teo kom manchwo-peena yam ni ne to ma sɛ ye ba we, “Debam seene dé na kolo na ke to. Baŋa Wɛ wó pa se kaane wolo n zem na swo to lo bia, nenɛɛne Racheli de Leah déem na loge bia pa se Isarele dwi dem daga to.#Pulim 35:23-24 Wɛ wó pa se nmo tiini n ji nadum Eferata teo ne ye n ta‑n jege yere Bɛtelehem teo ne. 12Baŋa Wɛ wó pa kaane wonto lo bia dedɛ o pa‑m, pa se n dwi dem yere zaŋe nenɛɛne Judah de Tamara déem na loge Pɛreza ye o pa Judah sɔŋɔ kom yale tei to.”
Bowaza dwi dem se ko yi David
13Bowaza ma kwei Ruf o ma ke o kaane. Ba ma peini daane. Baŋa Wɛ ma pa se Ruf ja puga, ye o lo bakeira. 14Teo kom kaana bam laam ma ta de Nawomi ba we, “Baŋa Wɛ maŋe de tia! Kokuri to, o zem pɛ‑m naa se o taa nii n baŋa ne. Wɛ wó pa se bu wom yere zaŋe Isarele tiina maama tei ne! 15Wonto wó pa se n ŋwea daa taa jege ywoni ye o fɔge o nii nmo baŋa ne n kokweero maŋa ne. N bu-kaane Ruf mo loga. Wonto nam tiini o swoi‑m lanyerane ye o dwoi bu-baara barepɛ n tei ne.”
16Nawomi ma jwoŋi bu wom ye o kwei‑o o feiri o tete bochare ne. O ma lɛɛre o jege‑o o kɔna. 17Kaana balo na zoore ba bwola de-ba to maa we, “Nawomi bu mo tento.” Ba ma pa bu wom yere we Obeda. Wonto déem mo loge Jesse. Jesse de ma ba o lo Pɛ David.#Matiyu 1:5; Luka 3:32
18Pɛreza dwi dem taane mo tento:
Pɛreza déem mo loge Hezeron. 19Hezeron ma lo Ram. Ram de ma lo Aminadabi. 20Aminadabi ma lo Naason. Naason ma lo Salimon. 21Salimon ma lo Bowaza. Bowaza de ma lo Obeda. 22Obeda déem ma lo Jesse. Jesse de ma lo Pɛ David.
Currently Selected:
Ruf 4: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)