1 Samuwel 1
1
Samuwel lora de o biini taane
1Nɔɔno wodwoŋi déem mo wora, o yere mo Elikana. O déem nwoŋi Eferata dwi dem wone mo, de Zufa sɔ-yuu kom ne. O kwo yere maa ye Jeroham, ye o nabaara ye Elihu, de Tohu, de Zufa. O déem zoore Efrayim zwonnu laŋa kam teo kodwoŋi ne, ko yere mo Rama. 2Elikana kaana déem ye balei mo. Ba dedoa yere mo Hanna, wodwoŋi wom yere maa ye Penina. Penina déem maa jege bia ye Hanna ba jege bu.#Pulim 25:21
3Bene maama ne, Elikana yeini o zege Rama ne o ja o diga kam maama mo o vo wara-jei sem na wo Siloo ne to se o zuli Paŋwa Tu Baŋa Wɛ, ye o daare o ke kaanem o pa‑o.#Nia Gulim 12:4-7 Eli bia balei bam, Hofini dedaane Finehase déem mo ye Baŋa Wɛ kaanem tiina bam Siloo ne. 4Elikana ná yeini o ke kaanem konto, o yeini o maŋe nɔna yam mo o pa Penina, ye o daare o kwei yadwonna o pa o bia bam de. 5Se ko ná ye Hanna, Elikana yeini o maŋe nɔna yam kuni belei o pa‑o, o na tiini o swoi‑o to ŋwaane mo. Baŋa Wɛ nam wo pɛ pwola se wonto lo bia. 6Konto ŋwaane, Hanna ka-dwoŋi Penina maa yeini o ke‑o o mɔna, ye o daare o pae ko zoore o yera lanyerane. 7Ko maa ye konto mo bene de bene. Ba ná vei Baŋa Wɛ wara-jei sem ne, Penina wó tiini o pa ko chɛ Hanna yera mo. O de déem maa yeini o ve se o di wodiu, ye o lɛɛre o da keira yerane taa. 8O baro Elikana laam ma yeini o bwei we, “Hanna, bɛŋwaane mo ye n ve wodiu. Bɛ mo ye n wo tiini ko chɔge konto? Yé ta‑n keera. Amo ba dwoi bia fuga n tei ne na?”
9Maŋa dedoa ne, ba na vei Siloo ye ba di ba ti to, mo Hanna zaŋe o zo wara-jei sem ne, se o ware Baŋa Wɛ. Konto de Wɛ kaanem tu Eli déem ya jei diga kam ni ne, o na yeini o jei mɛ to. 10Hanna yiga ma tiini ka nyɔne, ye o keera. O ma lwoori Baŋa Wɛ, 11ye o pwooli o we, “Paŋwa Tu Baŋa Wɛ, amo ye nmo tontoŋeno mo. Nii lɛɛro tento a na wo te wone to, se n guli amo gula. Nmo ná wo swei amo swia, ye n ná pɛ-ne bakeira, amo nam lage a jwoori a kwei‑o mo a pa nmo, se o ŋwea maama wone o taa ye nmo nyem. Fan-choa de nam bá fɔge ka tɔge o yuu ka kɛ.”#Jeelim 6:5
12Hanna ma tiini o lwoori Baŋa Wɛ wara-jei sem ne o dáane, ye Eli de maa jei o nii‑o. 13Hanna wɛ-lworo kom maama déem ke o bochare ne mo. O ni-vɔɔro tem déem mage daane mo, ye o kwora ba zaŋa. Eli na nɛ konto to, o déem boŋe we kaane wom nyɔge sana mo o su. 14O ma ta de Hanna o we, “Nmo zo ywo se n bere n sa-nyɔre totoŋa mo na? Yage n sa-nyɔre kikia yam konto!”
15Hanna ma leiri‑o o we, “Aawo! Amo wo nyɔge sana kɔtaa! Amo ye kaane wolo na tiini a na daanem to mo. Konto ŋwaane nam mo amo yɔɔre a lwo a wo-chechɔgɔ kom maama a tiŋi Baŋa Wɛ yiga ne. 16Yé ta‑n boŋe we amo ga ye ka-yɔɔ mo, se ko ye a wo mo chɔge dedɛ ko ja kɛ jeŋa. Konto mo tei a tiini a lwoori Wɛ.”
17Eli laam ma ta ded‑o o we, “Ko nam ná ye konto, zaŋe n vo de yazura, se Isarele tiina Wɛ wom wó pa‑m n na beeri kolo to.” 18Hanna ma leiri o we, “Amo tu. A ke n lei. Wɛ wó pa a kikia su n yi.” O ma zaŋe o viiri, o vo o di wodiu. O yiga daa maa wo nyɔne.
19Tega na poore tetete to, Elikana diga tiina bam maama daa ma zo wara-jei sem ne ba zuli Baŋa Wɛ, ye ba daare ba jwoori sɔŋɔ Rama ne. Elikana déem ma peini de o kaane Hanna. Baŋa Wɛ ma sɛ Hanna na lwoori kolo o tei ne to. 20Hanna ma ba o ja puga ye o lo bakeira. O ma pa bu wom yere we ‘Samuwel’. Kokuri to, o déem tage mo o we, “Amo lwoori Baŋa Wɛ mo ye a jwoŋi‑o.”
Hanna ke Samuwel Wɛ jeŋa ne
21Bene dedwoŋi déem daa ma yi se Elikana de o diga tiina bam jwoori ba vo Siloo ba ke kaanem ba pa Baŋa Wɛ, se Elikana de kwei ni delo o ya na tiŋi o pa Wɛ to. 22Hanna maa wo tɔge de-ba o vo. O déem tage de o baro wom mo o we, “Yage se a ná tu a kwori bu wom yele, a tete wó ja‑o a vo wara-jei sem se a ke‑o Baŋa Wɛ jeŋa ne. O maa wó maŋe da se ko vo ko yi o toone.” 23Elikana ma leiri o we, “Nam ke kolo maama na maŋe ko pa‑m to. Maŋe ywo se bu wom waare. Baŋa Wɛ nam wó pa se o ni dem ji chega ko pa‑m.”
Hanna ma maŋe sɔŋɔ ne ye o kɔne o bu wom. 24Bu wom na tu o kwori yele to, mo Hanna jaane‑o o vo Siloo. O ta maa jege bena yatɔ nabea, dedaane muni kuriwaa bu dedoa, ko woli de lɔa wo sana. O déem ma ja Samuwel o vo wara-jei sem, de o ta na maŋe o ye bu-pwola to mo. 25Ba ma go nabea kam, ye ba daare ba ja bu wom ba vo Eli tei. 26Hanna ma ta de Eli o we, “Amo tu. Ko na ye chega to, amo mo ye kaane wolo déem na zege n tei ne ye a lwoori Baŋa Wɛ to. 27Ko ye bu wonto ŋwaane mo a ya lwoori Baŋa Wɛ, ye o pa-ne a na lage kolo to. 28Konto to, a lage o jwoori a kwei‑o mo a pa Baŋa Wɛ. Bu wom ŋwea kam maama wone, o ye Baŋa Wɛ nyem mo.” O na tage konto to, ba ma kuni nadwoona ba zuli Baŋa Wɛ dáane.
Currently Selected:
1 Samuwel 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
