Ruf 3
3
Ruf nɛ baro
1Dɛ dedwe, Nawomi ma ta de Ruf o we, “A bukɔ, ko maŋe se a kwaane a lage jeiŋa jei a pa‑m, se n ta‑n zoore da dedaane yazura. 2Chega to, Bowaza wolo n na toŋe o tontoŋ-kana bam tei ne to ye debam yera nɔɔno mo. Zem dedaan-ni ne o wó taa wo mena ferem jeiga kam ne se ba chaare o mena yam. 3Véi n swɛ n yera n daare n kwɛ n tete lanyerane de terale nuga dedaane gwaaro telo na lana to. Laam zaŋe n vo mena ferem jeiga kam se n jeeri‑o. Nam yé pa se o lɔre nmo ko taa nii o na di wodiu o ti to. 4O ná vei se o peini, maane o na tigi o dɔa mɛ to, se n laam vo n zeiŋi o gare-jale dem o nɛ sem seeni ye n daare n peini dáane. O wó ta de nmo n na wó ke woŋo kolo to.” 5Ruf ma leiri o we, “N na tage kolo maama to, amo wó ke.”
6Ruf déem ma vo mena ferem jeiga kam o ke kolo o baro-nu wom na tage o bere‑o to. 7Bowaza na di wodiu o ti to, o wo ma pwoli lanyerane. O ma vo men-pwoa yam teiŋa ne o tigi da o dɔa. Ruf ma lɔɔre o vo mɛmɛ o yi o tei. O ma puri o gare-jale dem o nɛ sem seeni ye o peini dáane. 8Tete-koro ne Bowaza yera maa sae ye o pipiri. O ma pɔpɔ o na kaane na tigi o nɛ sem seeni. 9O ma bwei o we, “Nmo ye wɔ mo?” O ma leiri o we, “N bukɔ Ruf mo. Amo tu, nmo ye debam yera nɔɔno wolo na maŋe se n nii amo baŋa ne to mo. Nam kwei n gare-jale n ma n pu amo se a zo n woro kom wone.”#Ezekeli 16:8
10Bowaza ma leiri o we, “A bukɔ, Baŋa Wɛ wó swɛ nmo swolim. Nmo lanyerane keim dento dwoni faŋa keim dem. N wo sɛ n tɔge teo kom nɔn-donno tem kwaga, ba ya ze jege wonnu naa ba ná ye zora de. 11A bukɔ, nam yé ta‑n fona. N na lage woŋo kolo to, a wó ke a pa‑m. Teo kom nɔɔna bam maama maane we n ye ka-yero mo. 12Ko ye chega mo we amo ye n yera nɔɔno, se nɔɔno wodwoŋi wora o na wo yiga ne o dwoi amo se o nii n baŋa ne.#Chullu 25:25 13Ta‑n tigi ywo-seeni tete dento maama, se tega ná poore, dé wó bwei dé nii o boboŋa tɔge keim dento naa ya ba tɔga. O ná sɛ se o ke konto, ko lamma. A dugi de Baŋa Wɛ wolo na ŋwe to yere we, o daa ná wo sɛ, amo wó taa nii n baŋa ne. Peini ywo-seeni se ko taa vei te-pora.”
14Ruf ma peini Bowaza nɛ sem seeni. O ma daare o gwoni tega o zaŋe lela se nɔɔn-nɔɔno yé na‑o. Kokuri to, Bowaza ba lage se nɔɔn-nɔɔno lɔre we Ruf tu o tei. 15Bowaza ma ta o we, “Dɔne n gare-vɔɔ kom n lware tega ne.” O ma lware-ko. Bowaza ma lwo chaara bwɛ seredo o ke da o daare o ja o zeŋe‑o. O laam ma jwoori o vo teo kom wo.
16Ruf na yi sɔŋɔ to, o baro-nu Nawomi ma bwei‑o o we, “A bukɔ, n na vei da to, ko ke tɛ mo?” Ruf ma ta o bere‑o woŋo kolo maama Bowaza na ke o pa‑o to, 17ye o we, “O we a yé jwoori de je-kore. O ma pa-ne mena yanto maama.” 18Nawomi laam ma ta de Ruf o we, “Nam zuri n yera se dé nii tento maama na lage ko ke tei to. Bowaza ná wo nɛ taane dem kuri, o bá sii.”
Currently Selected:
Ruf 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)