Gurim 21

Wɛ de nabiina wó taa zoore daane

1Amo laam ma na wɛyuu-doŋo dedaane te-doŋa na wora. Boboa wɛyuu kom de boboa tega baŋa kam pipiri te kɛ. Naneo de daa tera.#Izaya 65:17; 66:22; 2 Piita 3:13 2Amo ma daare a na teo kolo Wɛ na pɔɔre o pa o tete ye ko yere ye Jerusalem te-doŋo kom to. Ko ma nwoŋi wɛyuu Wɛ tei ne ko maa tu logo baŋa. Ko ma yɔɔre ko kwɛ lanyerane ne kaane na ti o yiga se o zo baro tei to. 3Amo ma ni kwor-dɛa na ŋɔɔne paare yituŋu kom seeni ka we, “Wɛ tete sɔŋɔ laam mo wo nabiina tei ne. O nam wó taa zoore ba tei ne, ye ba wó taa ye o nɔɔna. Wɛ tete wó taa wo ba tei ne ye o nii-ba.#Chullu 26:11-12 4O maa wó weeri ba maama yi-na se ba daa yé taa jege yi-nyɔna. Toone de daa bá taa wora. Wo-chechɔgɔ, de keira, de yaara maama de wó jei. Kokuri to, boboa wo-dwonnu tem kɛ.”

5Wolo wom na jei paare yituŋu kom baŋa ne to laam ma ta o we, “Nii! Amo laam pɛ se wonnu maama ji wo-donno.” O daa ta ma ta de amo o we, “Popone wonnu tento n tiŋi, kolo ŋwaane taane dento jege chega ye de maŋe se nɔɔna sɛ-de.”

6O ma daare o we, “Wonnu tem ke te ti. Amo mo ye pulim jei de kweelim jeiga. Amo nam ta mo ye da-yiga tu de tiim tu.#Gurim 1:8; Jɔn 4:13-14 Na-nyɔm ná jege wolo maama, amo wó pa kotu chwoŋa se o nyɔ buli-yi delo na na pae ŋwea to zɛɛra. 7Wolo maama na wane wo-balwaaro dam to mo wó jwoŋi wo-laaro tem konto. Amo Wɛ wó taa nii‑o, ye o taa ye a bu. 8Ko nam ná ye balo na kɔre cham to, de balo na pipiri ba kwaga ba ya Yezu to, de nɔn-wo-korro, de nɔn-gora, de balo na bwoori to, ko woli de liri-mwa tiina, de balo na kaane jwona to, dedaane vwa-nyena dwi maama, banto nam maŋe se ba vo ba misi buga kam na jege mini ye chilibugu de wora ko di to wone mo. Toone dem konto mo ye delo na ke belei to.”

9Maleka kadwoŋi laam ma ba amo tei. Ka nwoŋi malese serepɛ sem wone mo, se na jege zwe serepɛ sem de se wo yaara yarepɛ yalo na lage ya ke ya ma kweeli to. Ka ma ta de amo ka we, “Ba se a bere‑m ka-dooro wom, o na lage o zo wolo na ye Pipeila kam to.”

10Wɛ Sin-laao kom laam ma ba amo tei de dam, ye a na we maleka kam kale-ne ka ja ka vo peo-zɔŋɔ kolo na tiini ko dɔra to yuu. Ka ma bere-ne Wɛ tete teo kom, ko yere na ye Jerusalem ye ko maa nwoŋi wɛyuu Wɛ tei ne ko tu logo baŋa to. 11Wɛ nenɔŋ-fɔrɔ kom ma pa se teo kom nyeena lanyerane. Ko maa nye de kandwɛ-nyeno kolo yere na ye Yasepa to, ye ko nyeene pele-pele ne gelaase na nyeene tei to. 12Kabiri-kamunu kolo na dɔra to ma lɔ ko kaage teo kom. Kabira kam maa jege nia fuga-yalei. Wɛ malese fuga-selei maa zege nia yam konto dedoa dedoa ne. Isarele tiina dwia fuga-yalei yam yera ma popone nia yam baŋa ne. 13Teo kom sɛ sem maama jege nia yatɔ yatɔ mo. Yatɔ yɔɔre wɛ-puli seeni. Yatɔ maa wo wɛ-puli jagwia seeni. Yatɔ maa wo wɛ-puli jazem seeni. Yatɔ maa daare ya wo wɛ-zoore seeni. 14Teo kom kabira kam kuri ma chwi pelwaaro fuga-telei baŋa ne. Pipeila kam totoŋa nakwa fuga-balei bam yera ma popone pelwaaro tem konto yera ne.

15Maleka kalo na ŋɔɔne de amo to maa zei sabu-seŋa nacheiga se ka ma maŋe teo kom na mae tei to, de ko nia yam de ko kabira kam de na mae tei to. 16Teo kom sɛ sena sem maama mara se mara mo. Maleka kam ma kwei ka nacheiga kam ka ma maŋe teo kom. Ko saŋa maama dedɔrem maa ye stadia morro fuga-telei (12,000).#21:16 stadia 12,000 = kilomiita 2,400 Ko sɛ sem de ko wɛyuu maama dedɔrem mae daane mo. 17Ka ma daare ka maŋe teo kom kabira kam. Ka ma maŋe de jatwogo de noa ni maŋem kuni bi de finna-bena (144) mo. Maleka kam na maŋe-ko tei to ye bedwe mo de nabiinu na mae o jeŋa o maŋe wonnu tei to. 18Ba lɔge kabira kam de kandwɛ-nyeno kolo yere na ye Yasepa to. Ko daare teo kom tete yɔɔre ko ye sabu-seŋa kalo na tiini ka lana fase ne gelaase na ye tei to mo ba mɛ ba lɔ. 19-20Pelwaaro telo teo kom kabira kam na chwi te baŋa ne to mo ba mɛ kandwa-nyenno dwi maama ba ma gɔgere te yera. Pelɔrɔ maama jege ko kandwɛ-nyeno mo, ye te yera mo tento:

1. Jasipa	2. Safira	3. Agate
4. Emeraleda	5. Onika	6. Saadia
7. Kwatiza	8. Bɛrula	9. Topazi
10. Churusopa	11. Yakinta	12. Amɛtesa

21Ko daare kabira kam manchwo-nia fuga-yalei yam tete mo ba mɛ kandwa-nyenno telo yere na ye ‘pɛɛle’ to ba ma ke. Nia yam maama ye pɛɛle dedoa dedoa mo ke da. Teo kom pempale dem maa ye sabu-seŋa kalo na tiini ka lana ne gelaase na nyeene lanyerane tei to.

22Amo nam nɛ we Wɛ diga tera teo kom wone, kolo ŋwaane Dam-fɔrɔ Tu Baŋa Wɛ dedaane Pipeila kam tete mo wora ye nɔɔna zuli-ba teo kom jei maama ne. 23Wɛ nenɔŋ-fɔrɔ kom na pae teo kom jege pwooni to, ko daa ba lage se wea kam de chana kam daa taa zeiŋi ko baŋa ne. Pipeila kam de pae ko jege pwooni ne min-zwoŋo na pae pwooni tei to.#Izaya 60:19-20 24Logo baŋa dwi tiina bam wó taa jege ba ŋwea pwooni dem konto wone. Logo baŋa pwa bam maa wó ja ba jejegero ba ba ba ke teo kom wone.#Izaya 60:3 25Dɛ maama ba bá pe teo kom nia yam, kolo ŋwaane tega daa bá yi jei sem konto ne.#Izaya 60:11 26Ba maa wó kwei logo baŋa dwi tiina jejegero tem de ba nenɔŋa maama ba ja ba ba ke da. 27Ko daare kolo maama na jege digiru to bá zo ko wo. Nɔɔno wolo maama na ke wo-zɔɔna to, de wolo maama na ye vwa-fɔro to bá zo ko wo. Balo yera na popone ya tiŋi Pipeila kam ŋwea tɔnɔ kom wone to yerane mo wó na chwoŋa se ba zo teo kom konto wo.

Currently Selected:

Gurim 21: KBG

Highlight

Copy

Compare