Gurim 20

Twa biim taane

1Amo laam ma na maleka kadwoŋi na nwoŋi telaao ne ka maa tu logo baŋa. Ka maa zei bwor-bu se ka ma pore gwoŋ-chanluŋu kom ni dem, ye ka kwori ka zei chapon-zɔŋɔ. 2Ka ma zi kayanchɔrɔ kom ka vɔ taa, se ko vo ko yi bena moro dedoa. Kayanchɔrɔ kom konto maa ye basankwea kalo na maŋe ka wora faŋa faŋa to.#Pulim 3:1; Gurim 12:9 Kanto kam mo ye vwa-nyena pɛ wom, ye ka kwori ka ye setaane tete. 3Maleka kam ma de-ka gwoŋ-chanluŋu kom wone ka pe. Ka ma daare ka kwoni bɔɔne dem ni se ka yé wane ka nwoŋi ka daa gane logo baŋa dwi tiina bam se ko vo ko yi bena moro kom na wó ti to. Maŋa kam kanto ná kɛ, ko laam jege se ba bwoli-ka ba yage se ko ke fenfee.

4Amo ma daare a na paare yitunnu, ye nɔɔna jei te baŋa ne. Banto ma jwoŋi dam se ba di nɔɔna taane. Ba maa ye balo ba ya na gwoni ba yuni ba na tɔge Yezu chega kam ye ba bere Wɛ kwora kam to ŋwaane. Ba maa wo sɛ se ba zuli varem wom naa o kamɔgɔ kom. Ba nam ta wo sɛ ba la varem wom gwona yam ba tira ne naa ba jea ne. Amo na nɛ ba jworru tem konto to, ba ma jwoori ba bi ba na ŋwea, ye ba tɔge de Yezu Krista ba di paare se ko yi bena moro. 5Twa biim dem konto mo ye delo na dɛ yiga de ke to. Twa balo maama na daare to nam wo bi maŋa kam konto ne. Bena moro kom ná tu ko ba ko ti mo banto de laam wó bi toone wone. 6Balo maama na tɔge ba woli da-yiga twa biim dem wone to jege yu-ywoŋo, ba na ye Wɛ tete nɔɔna to ŋwaane. Toone delo na lage de ke belei to daa bá wane-ba. Banto wó taa zege Baŋa Wɛ de Yezu Krista yiga ne mo ba pa zula ne kaanem tiina tei. Ba maa wó tɔge ded‑o ba di paare se ko yi bena moro kom.

7Bena moro kom ná tu ko kɛ, ba laam wó bwoli setaana pɛ wom se o nwoŋi bɔɔne dem ba na pe‑o da to wone. 8O maa wó vo o gane dwi tiina balo na wo logo baŋa jei sem maama ne to. Banto maa ye Wɛ dona mo, ye ba yera ye ‘Goga’ de ‘Magoga’.#Ezekeli 38:2 O maa wó pa ba la daane se ba ke jara. Ba kɔgɔ kom nɔn-bia wó taa daga dedɛ, ne buga ni kasolo bia na ye tei to mo. 9Ba maa wó tɔge logo baŋa jei maama ba vo ba gilimi Wɛ nɔɔna bam kɔgɔ kom na lage daane mɛ to. Teo kom konto mo ye kolo Wɛ na swoi dedɛ to. Mini laam ma nwoŋi wɛyuu ne de ba de chɔge Wɛ dona bam kɔgɔ kom maama. 10Ko daare setaana pɛ wom na gane-ba to, ba ma dole wonto ba de buga kalo na jege mini ye chilibugu wora ko di to wone. Kanto mo ye buga kalo ba na maŋe ba de varem wom de wolo na bere we o ye Wɛ sampwora ye o gane nɔɔna to ba yage ka wone to. Dáane mo ba maama wó na cham wea de tete maama se ko taa vei wuu.

11Amo ma daare a na paare yituŋ-kamunu kolo na ye napwoŋo to, de wolo na jei ko baŋa ne to.#Danyeli 7:9-10 Tega baŋa de wɛyuu maama ma duri te kɛ o yiga ne, ye te daa tera. 12Amo ma na balo na tege to, dedɛɛra de nabwona maama, ba zege paare yituŋu kom yiga ne. Nɔɔna ma puri twanno se ba nii. Ba ma daare ba puri tɔnɔ kodwoŋi na ye Wɛ ŋwe-doŋa tɔnɔ kom to. Ba ma bore twa bam taane se ko maŋe de ba na ke kolo to, nenɛɛne ko na popone ko tiŋi twanno tem wone tei to. 13Naneo kom ma pa twa balo na maŋe ko wone to chwoŋa se ba nwoŋi. Toone de ma yage balo de na jaane to. Churu de ma yage ko nɔɔna bam. Ba ma bore twa bam konto maama taane se ko maŋe de ba na ke kolo to. 14Ba laam ma ja Toone de Churu ba dole ba de buga kam na jege mini to wone. Buga kam de ka mini dem mo bere toone belei tu na ye tei to. 15Nɔɔno wolo maama yere na maŋe de wo popone de ke Wɛ ŋwe-doŋa tɔnɔ kom wone to, ba dole konto tu ba de buga kam na jege mini dem to wone mo.#Gurim 13:8

Currently Selected:

Gurim 20: KBG

Highlight

Copy

Compare