Gurim 22
22
Bu-tola kalo na na pae ŋwea to
1Maleka kam ma daare ka bere-ne bu-tola kalo na na pae ŋwea to.#Lei 46:4; Ezekeli 47:1-12 Na bam tiini ba nyeena pele-pele ne gelaase na nyeene tei to. Bu-tola kam na bam maa bura ba nwoŋa Wɛ de Pipeila kam paare yituŋu kom seeni ba dura. 2Teo kom pempale dem de bu-tola kam tetare laŋa ne mo tio wora kolo bia na pae ŋwea to. Tio kom konto maa yeini ko leiri bia kuni fuga-belei bene maama wone. Chana maama wone ko leiri bia mo. Ko vɔɔro tem wó wane te pa logo baŋa dwi tiina bam na yazura ba jaweero wone. 3Woŋo kolo maama na wora teo kom ne to, Wɛ sɔla bá taa wo ko baŋa ne. Wɛ de Pipeila kam paare yituŋu kom wó taa wo teo kom ne, ye Wɛ tontoŋena bam zuli‑o dáane. 4Ba wó taa nae o yibia. O yere dem maa wó popone ba tira ne. 5Tega daa bá yi teo kom ne. Ba bá taa lage min-zwonnu se te taa pae pwooni, naa wea de. Yuu-tu Baŋa Wɛ nam wó taa zeiŋi pwooni ba baŋa ne. Ba wó taa tɔge ba di paare se ko taa vei wuu.#Izaya 60:19
6Maleka kam daa ma ta de amo ka we, “Taane dento maama jege chega ye de maŋe se nɔɔna sɛ-de. Yuu-tu Baŋa Wɛ ye wolo na tɔge o Sin-laao kom baŋa o zeini o ni-jwoŋina bam se ba taa tɔɔle o kwora kam to mo. Wonto mo toŋe o maleka kam se ka ba ka le wonnu ka bere o tontoŋena bam, se ba lɔre kolo na jege se ko ke leile to.”
Yezu tutuuri dem taane
Yezu tage o we:
7“Nii-na! A bá dáane ye a ba. Wolo maama na sɛ o tɔge Wɛ kwora kalo na popone ka tiŋi tɔnɔ konto ne to jege yu-ywoŋo.”
8Amo Jɔn mo seene a ni wonnu tem konto, ye a kwori a na-te. Ko maama na tu ko ti to, a laam ma kuni dwoona maleka kalo na le wonnu tem ka bere-ne to yiga ne se a zuli-ka. 9Ka ma ta de amo ka we, “Yé ke konto. Amo de ye Wɛ tontoŋeno mo, ne nmo de n nu-bia balo na tɔɔle Wɛ kwora kam to, ko ta woli de balo maama na sɛ ba tɔge kolo na popone tɔnɔ konto wone to de na ye tei to. N maŋe se n zuli Wɛ mo.”
10Ka daa ta ma ta de amo ka we, “Yé kwaane n seigi Wɛ kwora kalo na popone tɔnɔ konto ne to. Maŋa nam yia se wonnu tem konto seene te ke. 11Maŋa daare fenfee yerane mo se nɔɔna leiri ba wo de ba kikia yam.
Wolo maama na ba tɔge chwoŋa to,
kotu taa vei yiga de o tusim dem.
Wolo maama na tɔge wo-zɔɔna kikia to,
o de nam vei yiga de o wo-zɔɔna keim.
Ko daare wolo na yɔɔre o tɔge chwoŋa to,
kotu taa vei yiga de o keim-laaro tem.
Wolo na jege wo-pwoŋo Wɛ ŋwaane to,
kotu daa taa ke Wɛ boboŋa na lage tei to mo.”
Yezu tage o we:
12“Nii-na! A bá dáane ye a ba. A ná maa beena, a maa wó taa jege ŋweero a jeŋa ne, ye a kwei-te a pa nɔɔno maama nyɔɔre delo na maŋe de o kikia to.#Izaya 40:10
13Amo mo ye pulim jei de kweelim jeiga.
Amo ta mo ye boboa kam de gurim tu,
dedaane da-yiga tu de tiim tu.”
14Balo na zare ba gwaaro pa te lana fase to jege yu-ywoŋo. Banto jege chwoŋa se ba di tio kolo bia na pae ŋwea to, ye ba kwori ba jege chwoŋa se ba da Wɛ tete teo kom manchwo-nia yam ba zo ko wo. 15Ko daare balo na bá na chwoŋa se ba zo to mo ye nɔn-wo-korro, de liri-mwa tiina, ko woli de balo na bwoori to, de nɔn-gora, de balo na kaane jwona to, dedaane vwa-fɔra balo na swoi se ba taa gane nɔɔna to.
Yezu tage o we:
16“Amo mo toŋe a maleka se ka ba ka ta amo chega kam ka bere abam balo na ye amo kɔgɔ kom nɔɔna to. Amo ye wolo kuri na nwoŋi Pɛ David dwi dem wone to.#Gurim 5:5 Amo ye tetete chalechoa kalo yere na ye naŋɔgɔ ye ka tiini ka nyeene to mo.”
17Wɛ Sin-laao kom de ka-dooro wom#22:17 ka-dooro wom bere Yezu nɔn-kɔgɔ kom na ye tei ye ba me de Yezu to. Gurim 19:7 ma sɛ Yezu ye ba we, “Nam ba.” Wolo maama na nigi kwora kanto to jege se o de ta we, “Nam ba.” Na-nyɔm na jege wolo maama to maŋe se o ba. Wolo maama na lage se o nyɔ na balo na pae ŋwea to jege chwoŋa se o ba o jwoŋi o nyɔ zɛɛra.
18Amo Jɔn nam lage a kaane balo maama na cheigi wonnu telo na popone tɔnɔ konto wone ye te ye Wɛ kwora to. Nmo ná kwei woŋo n woli tɔnɔ konto wonnu tem wone, Wɛ wó pa n na waarem se ko woli de yaara yalo tɔnɔ kom na bere to. 19Nmo nam ná le woŋo tɔnɔ kom wone n yage, Wɛ wó le nmo de yiga o yage, se n yé da n di tio kolo bia na pae ŋwea to, naa n tɔge n zo Wɛ tete teo kom wo, ne tɔnɔ konto na maŋe ko bere tei to.
20Wolo wom na zege wonnu tem konto chega kam kwaga ne to mo tɛ o we: “Ko ye chega mo. A bá dáane ye a ba.”
Ameena. Dé sɛ konto. Dé Teiru Yezu, nam ba!
21Debam Teiru Yezu zaane dem taa wo Wɛ tete nɔɔna bam maama tei ne. Ameena.
Currently Selected:
Gurim 22: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
