Gurim 19

Wɛ telaao wopwolo kom taane

1Amo laam ma ni kwor-dɛa, ka na nye de nɔn-kɔgɔ dedɛ na ŋɔɔne baŋa baŋa telaao ne ba we:

“Aleluya!#19:1 Aleluya kuri mo ye Pa-na dé tei Baŋa Wɛ.

Debam Tu Wɛ mo ye verem tu,

de nenɔŋ-fɔrɔ tu, de dam tu.

2O borem dem yɔɔre de ye chega mo.

Ko ná ye ka-tola kalo na dana

ye ka bwoŋa kikia yam jage jei maama ya chɔge logo baŋa to,

Wɛ di ka taane pa ka to.

O ma waare-ka, ka na pɛ o tontoŋena bam te to ŋwaane.”#Nia Gulim 32:43

3Ba daa ma ta baŋa baŋa ba we:

“Aleluya!

Mini na di-ka to, ko nyoa kam wó taa zaŋa mo taa,

se ko taa vei wuu.”

4Nakwa finlei-bana bam, de wonnu tena tem na ŋwe to laam ma kuni dwoona Wɛ yiga ne ba pa‑o zula, o na jei paare yituŋu kom baŋa ne to. Ba ma zuli‑o ye ba we:

“Ameena! Aleluya!”

5Kwora kadwoŋi laam ma ŋɔɔne paare yituŋu kom seeni ka we:

“Abam balo maama na ye Wɛ tontoŋena to,

ta‑á tei-na dé Tu Wɛ wom.

Abam balo maama na kɔre‑o to,

ko ná ye nɔn-kamuna de nabwona,

á ta‑á zuli‑o.”

6Amo laam ma ni sɔɔ, ko na nye de nɔn-kɔgɔ dedɛ na ŋɔɔne baŋa baŋa, ye ko dɔna ne na mo wuuri ye doa baga tei. Ko maa ŋɔɔne ko we:

“Aleluya!

Debam Tu, Dam-fɔrɔ Tu Baŋa Wɛ mo di paare.

7Pa-na dé taa chaka de wopwolo,

ye dé zuli‑o o nenɔŋ-fɔrɔ kom ŋwaane.

Kokuri to, wolo na ye Pipeila kam to kadiri dem maŋa laam yia.

O kaane wom ti o yiga se o zo‑o.#Izaya 61:10

8Ba kwei gare-fefale selo na tiini se nyeena pele-pele to mo

ba pa kaane wom se o zo.”

Gwaaro tem konto nam mo bere Wɛ nɔɔna bam keim-laaro tem na ye tei to.

9Maleka kam laam ma ta de amo ka we, “Popone tento n tiŋi: Ko ná ye balo ba na bwoŋi se ba tɔge ba di Pipeila kam kadiri dem wodiu kom to, banto jege yu-ywoŋo mo.” Ka daa ma ta ka we, “Nmo na nigi kolo maama to ye Wɛ kwora chekke mo.”

10Amo ma kuni dwoona ka yiga ne se a zuli-ka. Ka ma ta ka we, “Yé ke konto. Amo de ye Wɛ tontoŋeno mo, ne nmo de n nu-bia balo maama na bere we ba tɔge Yezu chega kam to de na ye tei to. N maŋe se n zuli Wɛ mo.”

Ko ye Yezu chega kam konto mo pae Wɛ sampwori sem tɔɔle o kwora.

11Amo laam ma nii a na Wɛ telaao ni na pore. A ma na siseiŋ-pwoŋa. Wolo na dɔge ka baŋa ne to ye ‘Wo-dedoa Tu’ de ‘Chega Tu’. O na bore nɔɔna taane tei to yɔɔre ko tɔge chega mo, ye o kwori o jaane jara de chega. 12O yia maa seene ne min-vogo tei. Paare yipwi dedɛ ma pu o yuu ne. Yere dedwoŋi ma popone o yera ne, ye nɔɔn-nɔɔno yeiri-de, ko ná dae o tete yerane. 13Gare-dedɔrɔ kolo o na zo to ma bugi de jana. Ba maa bwoi‑o we, “Wɛ Botara kam”. 14Wɛ telaao jar-keira kɔgɔ kom ma pu o kwaga. Ba ma dɔge sisein-pwonnu baŋa ne, ye ba zo gare-fefale selo na ye napwonnu fase to. 15Se-zɔɔ kolo na tiini ko jege ni to maa nwoŋi o ni ne. O nam wó ma-ko o mage logo baŋa dwi tiina bam o de tega ne. O ta wó kwei luu-dedɔrɔ mo o ma wane-ba de o dam.#Lei 2:9 O maa wó pa se Dam-fɔrɔ Tu Baŋa Wɛ ban-zɔŋɔ kom tiini ko ba ba baŋa, nenɛɛne o nɔne Vini tio-bia mo se ba nyoa bam taa nwoŋa tei. 16Yere dedwoŋi ma popone o gare-dedɔrɔ kom yera ne, de o chwei ne de we:

“Pwa maama Pɛ,

de yuu tiina maama Yuu-tu.”

17Amo laam ma na maleka kadwoŋi ka na zege wea kam tetare ne. Ka ma bage baŋa baŋa ka ta de zuna balo maama na jaane wɛyuu ne to ka we, “Ba-na á la daane se á tɔge á di wodi-fɔrɔ kolo Wɛ na ke to. 18Ba-na se á di pwa ya-nɔna, de jar-keira yiga tiina nɔna, de nɔn-babɛ nɔna, ko woli de sisei de se diina bam nɔna, de nɔɔna dwi maama nɔna, ko ná ye kabɛ de balo na tei ba tete to de, ko woli de nɔn-kamuna de nabwona.”

19Amo ma daare a na varem wom, de logo baŋa pwa bam maama, de ba jar-keira bam na lage daane se ba ke jara de wolo wom na dɔge siseiŋa kam baŋa ne to de o jar-keira kɔgɔ kom. 20Ba ma ja varem wom ba vɔ, de wolo na bere we o ye Wɛ sampwora ye o gane nɔɔna to.#Gurim 13:1-10 Wonto ya mo ke wo-kenkagela o ma woli varem wom. O na ke wo-kenkagela yam konto to, o mɛ o gane balo na lage varem wom gwona yam ye ba daare ba zuli o kamɔgɔ kom to mo. Ba ma kwei banto balei ŋweene, ba ja vo ba de buga wone. Buga kam kanto ye kalo na jege mini ye chilibugu wora ko di to mo. 21Ba jar-keira kɔgɔ kom na daare to maama ma te. Se-zɔɔ kolo na nwoŋi sisein-diru wom ni ne to mo go-ba. Zuna bam maama ma ba ba di ba ya-nɔna yam ba su.

Currently Selected:

Gurim 19: KBG

Highlight

Copy

Compare