Gurim 18
18
Te-fɔrɔ Babilon na chɔge tei to
1Maleka kam na tage konto ka ti to, amo ma na maleka kadwoŋi na nwoŋi telaao ne ka maa beene logo baŋa. Ka maa tiini ka jege dam ye ka nenɔŋa kam zeiŋi pwooni ka pa logo baŋa maama peere. 2Ka ma tɔɔle baŋa baŋa de kwor-dɛa ka we:
“Babilon te-fɔrɔ kom chɔge ywoo!
Ko yɔɔre ko chɔge mo.
Setaana yerane laam mo zoore ko wone,
ye chichiri-zɔɔna dwi maama de zoore da.
Zuna de vara balo nɔɔna na chula ye ba ba lae to
dwi maama maa tɔge ba wora.#Izaya 21:9
3Logo baŋa dwi tiina maama ma to
teo kom konto kabwoŋa chwei sem wone,
ne ba nyɔge ko sa-dɛɛra mo ba su tei.
Logo baŋa pwa bam ma tɔge ba ke bwoorim de-ko.
Logo baŋa pipim-piina ma tiini ba di nyɔɔre
teo kom konto baŋa ne,
kolo ŋwaane ko nɔɔna bam swoi
se ba taa chɔge sabu dedɛ.”
4Amo laam ma ni kwora kadwoŋi na ŋɔɔne Wɛ telaao ne ka we:
“Amo nɔɔna bam, nwoŋi-na teo kom wone,
se á yé tɔge ko wo-balwaaro chwei sem,
se á yé tɔge á na ko yaara yam.
5Kokuri ko wɛleera yam daga dedɛ
te daŋe da-baŋa ne te yi wɛyuu.
Wɛ nam yei ko keim-lwanno tem maama ni ne.
6Chɔge-na teo kom se ko maŋe de konto na chɔge nɔɔna badwonna tei to.
Pa-na ko chɛ ko yera ne se ko dwoni
ko na pɛ ko chɛ nɔɔna yera ne tei to.
Fe-na-ko se ko nyɔ sa-dɛɛra balo na tiini ba dana
ba dwoi konto sana bam ko na pae nɔɔna nyɔ to.
7Pipiri-na teo kom ywoni dem de ko wo-laaro tem
se te jwoori te ji cham de yaara te pa-ko.
Kokuri teo kom nye de kaane wolo na yeini o tɛ o we,
‘Amo di paare mo ye kolokolo daa bá daane-ne.
Amo dae kadeim, ye a yiga bá fɔge ka nyɔne.’
8Teo kom na bere ko tete kamunni to ŋwaane,
yaara dwi maama wó pɔpɔ ya ba ko baŋa dɛ dedwe wone.
Jawe-chɛɛro de yi-nyɔna de kana wó ba te ja-ko.
Mini de maa wó di-ko.
Yuu-tu Baŋa Wɛ jege dam-fɔrɔ,
ye wonto mo wó pa teo kom na waarem.”
9Ko ná ye logo baŋa pwa balo na tɔge ba ke teo kom kabwoŋa kikia yam ye ba di ywoni daane to, ba ná nɛ teo kom na jege mini tei to, ba wó taa keera de wo-chechɔgɔ. 10Ba na kɔre ko yaara yam to ŋwaane, ba wó taa zege yiga yiga ye ba nii ko nyoa kam. Ba wó taa chwoosa ye ba we:
“Ei! Lɛɛro wora! Lɛɛro yi te-fɔrɔ kom!
Babilon ya tiini ko jege dam.
Ko laam nam tu ko chɔge lela,
awa dedoa wone.”
11Logo baŋa pipim-piina bam de wó taa keera ye ba nyɔne ba yiga teo kom chɔgem ŋwaane, kolo ŋwaane nɔɔn-nɔɔno daa tera se ba taa yeigi ba zela yam. 12Zela yalo ba na jege ba yeigi to ye sabu-seŋa wonnu, de lu-nyenno wonnu, de kandwa-nyenno, ko woli de gwaaro dwi dwi, te na ye gare-fefale, de gare-nyenno, de gare-sonno telo na ye chwɛ-chwɛ to mo. Ba ta maa jege da-ŋwe dwi maama, de wonnu dedɛ telo ba na mɛ tuu yeila, de da-laaro, de channa, de luu, de pe-siswollu ba ke to. 13Ba ta maa kwori ba jege terale nuga dwi maama, de talwoŋ-ywoŋa dwi maama, de liri sedwonna, ko woli de sana, de nuga, de bworobworo muni, de kamaana, ko woli de naane, de pei, de sisei, de se torokooro. Ba ta jaane kabɛ ba yeiga.
14Ba laam maa wó ta de teo kom ba we, “Wo-laaro telo maama nmo fera na zo to daa tera. Nmo jejegero tem de n nenɔŋa kam maama laam jei. Nmo daa‑n bá‑n na wonnu tem konto maŋa de maŋa.”
15Pipim-piina balo na tiini ba na nyɔɔre teo kom baŋa ne to wó taa zege yiga yiga, ba na kɔre ko yaara yam to ŋwaane. Ba maa wó taa keera 16ye ba chwoosa ba we:
“Ei! Lɛɛro wora!
Teo kamunu konto tiini ko jege nenɔŋa.
Ko nɔɔna bam maa zoore gare-nyenno, ye ba yera jege sabu-seŋa wonnu de kandwa-nyenno.
17Ko jejegero tem maama laam ma ba te chɔge lela, awa dedoa wone.”
Ko nam ná ye balo maama na wo naneo wone ba lage ba ni-wodiu to, ko ná ye balo na cho nabworo to, de balo na toŋe nabworo ŋwaane to, de balo na zo nabworo se ba vo jei to, ba maama wó taa zege yiga yiga mo ba nii teo kom. 18Banto ná nɛ nyoa kam na zaŋe teo kom ne, ba wó ta baŋa baŋa ba we, “Teo kamunu konto dwoŋi tera.” 19Ba maa wó nyɔne ba yiga, ye ba chwoosa ba we,
“Ei! Lɛɛro wora! Lɛɛro yi te-fɔrɔ kom!
Ko na tiini ko jege jejegero tei to pɛ se
balo maama na tei nabwooru to di nyɔɔre ko baŋa ne.
Ko laam ma ba ko chɔge lela,
awa dedoa wone.”
20Abam balo na zoore Wɛ telaao ne to ta‑á chaka de wopwolo teo kom chɔgem dem ŋwaane. Abam balo na ye Wɛ nɔɔna to, ta‑á jege-na wopwolo, ko woli de Wɛ totoŋa nakwa, de o sampwori sem maama. Wɛ mo di teo kom taane, ye o pa abam jege bora.
21Wɛ maleka kadwoŋi na tiini ka dana to laam ma kwei kandwɛ-kamunu, ne nɔŋ-zɔŋɔ na ye tei to. Ka ma dole-ko ka yage naneo kom wone ye ka we,
“Ba nam wó kwei te-fɔrɔ Babilon de
ba dole ba yage konto dwoŋi mo,
ye nɔɔn-nɔɔno daa bá na ko jei.
22Ko wó ji di-dwonnu yerane.
Nɔɔna daa bá taa wo ko wone
se ba taa mage kwanno, naa ba taa leena,
naa ba taa wui wi naa nabwanno.
Gɔgɔ dwi maama de bá taa wo ko wone,
ye nɔŋɔ kwori de daa bá taa zaŋe ko wone.
23Min-zwoŋo mini de daa bá tɔrege ko wone.
Kadiri sɔɔ de daa bá ke ko wone.
Te-fɔrɔ kom pipim-piina bam déem mo ye logo baŋa dedɛɛra yiga tiina.
Ko liri kikia yam ma soge logo baŋa dwi tiina maama boboŋa.
24Ko ná ye Wɛ sampwori selo ba na go to,
de Wɛ nɔɔna balo maama ba na go to,
ba toone dem zege teo kom konto yera ne mo.
Balo maama ba na go logo baŋa ne to chao wó jeini teo kom yuu ne mo.”
Currently Selected:
Gurim 18: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
