Gurim 11

Wɛ nɔɔna balei taane

1Ba laam ma kwei daa kalo ba na maa maŋe wonnu to ba pa-ne. Ba ma ta amo ba we, a zaŋe a maŋe Wɛ diga kam de ko kaanem bimbini dem a nii, se a daare a jeeli nɔɔna balo na wo Wɛ diga kam wone ba zuli‑o to ni.#Ezekeli 40:3, 5-16 2Ba ma daare ba ta amo se a yé maŋe ka da-yiga konkɔlɔ kom, kolo ŋwaane ba kwei jei sem konto ba ke dwi-gɛ tiina bam jeŋa ne mo.#Luka 21:24 Banto nam mo wó ba ba taa kare teo kolo Wɛ na pɔɔre o pa o tete to wone ba nɔne wonnu ba chɔge taa, chane finna-selei (42). 3Wɛ daa ma ta-ne o we, “Amo lage a toŋe nɔɔna balei se ba ba ba zege amo chega kam kwaga ne ba bere nɔɔna. Banto wó zo gare-nyenyaaro ye ba tɔɔle amo kwora kam se ko yi da moro de bia yalei de fuseredo (1,260).”

4Olivi teeni delei de min-zwonnu telei na zege logo baŋa Teiru wom yiga ne to mo bere Wɛ nɔɔna bam konto balei na ye tei to.#Zekaria 4:3, 11-14 5Mini mo wó nwoŋi ba nia ne de chɔge ba dona balo na dwoni de-ba to. Wolo maama ná lage se o ke-ba lwarem, ko ye konto dwoŋi mo ba wó go kotu. 6Banto nam jege dam se ba ja wɛyuu kom se doa daa yé taa nena maŋa kam ba na wora ba tɔɔle Wɛ kwora kam to.#1 Pwa 17:1 Ba nam daa ta jege dam se ba pa bwi sem na leiri ba ji jana. Ba ta jege dam se ba pa jawe-chɛɛro dwi maama ba nabiina baŋa maŋa kalo maama ba na lage to.

7Ba ná tɔɔle Wɛ kwora kam ba ti, juru kolo na zoore gwoŋ-chanluŋu kom wone to wó nwoŋi ko ba ko ja jara dedaane-ba. Ko maa wó wane-ba ko go. 8Ko ná go-ba, ba yera yam maa wó taa tigi pwooni yiga ne teo kamunu kom wone. Yera yalo na bere teo kom konto kuri chekke to mo ye ‘Sodom’ de ‘Ejipti’. Ko ye dáane mo ba jaane banto Teiru wom ba pa dagara yuu ne ba go.

9Nɔɔna laam wó nwoŋi teene maama wone,

de nabiina dwi maama wone,

de taana dwi maama tiina wone,

de paare dim jei maama wone,

ba ba ba nii banto yera yam na tigi da to.

Ba wó taa yɔɔre ba nii banto yera yam da yatɔ de chichworo, ye ba bá sɛ se ba kwei-ba ba suli. 10Balo na zoore logo baŋa ne to wó taa jege wopwolo de banto balei na tege to. Ba maa wó ke kwɛɛra daane, ye ba daare ba pae pɛɛra ba ma zuli daane. Ba wó taa chaka de wopwolo, Wɛ sampwori sem konto balei na pɛ se yaara dwi dwi ba nabiina baŋa ne ye ba laam te to ŋwaane. 11Da yatɔ de chichworo kom nam na kɛ to, Wɛ ma pa o siu kolo na pae ŋwea to laam ba ko zo ba yera yam, ye ba jwoori ba bi ba zaŋe. Foone ma tiini de ja balo maama na nɛ-ba to. 12Wɛ sampwori sem laam ma ni kwora na ŋɔɔne telaao ne ka we, “Diini-na á ba ywo.”

Kunkwoŋo ma ba ko kwei-ba ko ja di wɛyuu, ye ba dona bam zege ba nia. 13Kanto maŋa kam ne nɔɔ, tega baŋa maama maa tiini ka ziziŋa. Ko ma pa se teo kom pɔɔrem kuni fuga wone kuri bedwe chɔge maama. Tega kam ziziŋim dem ma go nɔɔna morro terepɛ (7,000). Foone ma ja nɔɔna balo na daare to, ye ba sɛ we Telaao Tu Baŋa Wɛ wom tiini o jege dam. 14Mo lɛɛro telo na ke belei tu to. Ko nam ta daare lɛɛro telo na wó ke betɔ tu to mo. Tento nam lage te ba leile mo.

Nabɔnɔ kolo na wugi ko ma kweeli to

15Wɛ malese serepɛ tu wom laam ma wu o nabɔnɔ kom. Kwori laam ma ŋɔɔne telaao ne baŋa baŋa se we, “Logo baŋa paare dem laam wo dé Yuu-tu Wɛ jeŋa ne mo de o Dam Tu Krista jeŋa ne. O nam wó taa di paare logo baŋa ne se ko taa vei wuu.”#Danyeli 7:14

16Nakwa finlei-bana bam ba na jei Wɛ yiga ne ba paare yitunnu tem baŋa ne to laam ma chɔɔle ba yuni tega ne ba zuli Wɛ, 17ye ba we:

“Dam-fɔrɔ Tu Baŋa Wɛ,

nmo maŋe n wora boboa ne,

ye n ta wora de zem maama.

Dé ke nmo lei de n laam na kwei n dam-fɔrɔ kom

n ma n tei logo baŋa to.

18Logo baŋa dwi-gɛ tiina bam tiini ba jege ban-zɔŋɔ mo.

Leile konto nmo ban-lom dem nam wó zaŋe de-ba.#Lei 2:1

Ko laam yi maŋa kalo nmo na wó di twa taane to.

Nmo wó pa se balo maama na sɛ nmo to na pɛɛra.

Ko ná ye nmo ni-jwoŋina balo na tɔɔle nmo kwora to,

de balo maama na ye nmo nɔɔna ye ba kɔre n yere dem to,

ko ná ye nɔn-kamuna de nabwona de,

ba maama wó di nyɔɔre.

Ko nam ná ye balo na chɔge logo baŋa to,

maŋa yia se nmo laam chɔge-ba.”

19Ba na zuli Wɛ konto ba ti to, Wɛ diga kalo na wo telaao ne to ni laam ma pore. Wɛ ni-gwonim dakaa kam na wo Wɛ di-yun-gala kam ne to ma ba ka nae jaja. Doa laam maa pepela ye ka baga ka wuura. Tega maa ziziŋa ye do-kandwa tiini ya toe dedɛ.

Currently Selected:

Gurim 11: KBG

Highlight

Copy

Compare