Gurim 10

Maleka kadwoŋi de ka tɔn-balaŋa taane

1Amo daa ma nii a na maleka kadwoŋi na tiini ka dana to. Ka ma nwoŋi Wɛ telaao ne ka maa tua. Ka mɛ kunkwoŋo mo ka kukwori ka yera, ye manlaataŋa kekare ka yuu seeni. Ka yibia nye de wea kam mo, ye ka nɛ sem nye de min-vogo na ye tei to.#Danyeli 10:5 2Maleka kam maa jege tɔn-balaŋa kalo na puri to ka jeŋa ne. Ka ma kwei ka jazem naga ka chwi naneo kom wone. Ka ma daare ka chwi ka jagwia naga kam tega baŋa ne. 3Ka laam ma daare ka bage baŋa baŋa, ye ka kwora kam ke sɔɔ ne nywoŋo na suuri tei to. Maleka kam na bage konto to, doa bagem kuni berepɛ ma leiri-ka. 4Doa kam na bage konto to, amo maa lage se a popone ka kwora kam a tiŋi. Amo laam ma ni kwora na ŋɔɔne Wɛ telaao ne ka we, “Ta‑n chem, se n yé zaŋe n popone doa kam na bage ka ta kolo to n tiŋi.”

5Maleka kalo amo ya na maŋe a na ka na zege naneo kom wone de tega baŋa ne to laam ma zeiŋi ka jazem jeŋa wɛɛne, 6ye ka du Wɛ yere ŋwaane.

Wonto nam mo jege ŋwea se ko taa vei wuu.

O ke wɛyuu baŋa kam mo

de wonnu telo maama na wo ka wone to,

ye o kwori o ke tega baŋa kam

de ka wonnu tem maama,

O ta mo ke naneo kom,

de wonnu telo maama na wo ko wone to.

Maleka kam na dugi tei to, ka maa we, “Wɛ daa bá dáane de o na lage o ke kolo to. 7Malese serepɛ tu wom ná lage o ba o wu o nabɔnɔ kom wɛɛne to, Wɛ boboŋa yalo ya na seigi to laam wó ba ya ke ya ti. O sampwori selo déem na tɔɔle o kwora to maŋe ba lɔre o boboŋa yam konto.”

8Maleka tu wom na tage konto to, amo ma jwoori a ni kwora kalo na wo telaao ne ka ŋɔɔne to. Ka daa ma ta de amo ka we, “Véi maleka tu wolo na zege naneo kom baŋa ne de tega kam baŋa ne to tei, se n jwoŋi tɔn-balaŋa kalo na puri ka wo o jeŋa ne to.”

9A ma vo a ta maleka kam se ka pa-ne tɔn-balaŋa kam. Ka ma ta-ne ka we, “Jwoŋi tɔnɔ kom n kwei n di. Ko ná yi nmo kana, ko wó taa chamma. Ko nam ta ná wo nmo ni ne, ko wó taa sona ne tooro tei.”#Jeremia 15:16; Ezekeli 3:1-3

10Amo ma kwei tɔn-balaŋa kam maleka kam jeŋa ne a de a ni ne. Ka maa sona ne tooro tei. Ko daare, amo na ligi-ka to, ka ma leiri ka ji cham yerane a kana ne. 11Ba laam ma ta ba bere-ne ba we, amo daa taa jege se a tɔɔle Wɛ kwora kam se ko vo logo baŋa dwi tiina dedɛ seeni, de teene dedɛ seeni, dedaane taana dwi dwi tiina dedɛ de ba pwa de seeni.

Currently Selected:

Gurim 10: KBG

Highlight

Copy

Compare