Gurim 12

Kayanchɔrɔ zeili kaane de o bu

1Wo-kenkagele laam ma nwoŋi wɛyuu ne. Amo ma na kaane na mɛ wea kam o kukwori o yera. Chana kam maa wo o napera kuri ne. Ko daare yipuga kalo na jege chalechwe fuga-selei to ma pu o yuu ne. 2Kaane wom ye kapua mo ye o puga kam virigi se o lo. Ko na chana to, o ma kaase baŋa baŋa.

3Wo-kenkagele dedwoŋi daa ma nwoŋi wɛyuu ne. Amo ma na kayanchɔrɔ#12:3 kayanchɔrɔ = dragon na wora, ko na nye de vare-kamunu. Ko ye nasoŋo mo chwɛ-chwɛ ye ko jege yuni terepɛ, de nyea fuga. Paare yipwi ma pu ko yuni tem maama baŋa ne. 4Ko ma kwei ko nabili dem ko ma vaŋe chalechwe sem pɔɔrem kuni betɔ wone kuri bedwe ko kwori wɛyuu ne ko de tega ne. Ko ma ba ko zege kaane wolo na lage o lo to yiga ne, se o ná loge bu wom, se ko kwei ko di. 5Kaane wom ma lo o bu wom, o ye bakeira mo. Wonto mo wó taa tei logo baŋa dwi tiina maama de o dam. Kaane wom na loge konto to, ba ma chaale bu wom ba ja vo Wɛ tei, o paare yituŋu kom na wo mɛ to. 6Kaane wom laam ma duri o vo kagoa yuu, jeiga kalo Wɛ na maŋe o kwɛ se o pa‑o to. Wɛ wó taa nii o baŋa ne jei sem konto ne da moro de bia yalei de fuseredo (1,260).

7Jara déem ya ke Wɛ telaao ne. Wɛ malese dedɛɛro wolo yere na ye Mikayeli to dedaane o kwaga malese sem ma chiŋi jara de kayanchɔrɔ kom.#Danyeli 10:13; Judi 1:9 Kayanchɔrɔ kom de ko kwaga malese sem de ma jwoori se kwaare jara yam. 8Ko maa wo wane jara yam ko ke ko di. Ko de ko kwaga malese sem ma daa wo nɛ jeiŋa jei Wɛ telaao ne. 9Ba ma zeili-ko Wɛ telaao ne ba dole ba yage logo baŋa ne, de ko kwaga malese sem maama. Kayanchɔrɔ kom konto mo ye basankwea kalo na maŋe ka wora faŋa faŋa to. Ka yere nam mo ye ‘Vwa-nyena pɛ’, de ‘Setaane’, ye ka gane logo baŋa nɔɔna maama.#Luka 10:18

10Amo laam ma ni kwora na ŋɔɔne Wɛ telaao ne ka we, “Leile konto debam Tu Wɛ tu o vere o nɔɔna setaana pɛ jeŋa ne. O ma pa o dam de o paare dem bere jaja. O Dam Tu Krista de tu se o taa tei nɔɔna de dam. Kokuri wolo wom na yeini o ŋɔɔne o chɔge dé nu-bia bam Wɛ yiga ne to daa tera. Wonto mo yeini o zege dé Tu Wɛ yiga ne tete de wea maama o ŋɔɔne o chɔge-ba. Ba laam nam de‑o ba yage.#Job 1:9-11; Zekaria 3:1 11Ba na wane‑o konto to, ko ye Pipeila kam toone jana bam de ba na bere Wɛ chega kam tei to ŋwaane mo. Ba ma sɛ se ba kwei ba ŋwea ba ma leini toone.#Gurim 2:10 12Abam balo maama na zoore wɛ telaao jei sem ne to, á ta‑á chaka de wopwolo. Ko daare ko ná ye logo baŋa de ko naneo kom, lɛɛro wó ba abam nɔɔna bam baŋa, vwa-nyena pɛ wom na tu abam tei to ŋwaane. O nam tiini o jege ban-zɔŋɔ lanyerane, kokuri o yei we o da yam gɛ fee mo.”

13Kayanchɔrɔ kom na lɔre we ba zeili-ko ba yage logo baŋa ne to, ko ma pɛ kaane wolo na loge bakeira kam to kwaga ko pu. 14Ba ma kwei kawul-zɔŋɔ vɔna yalei ba pa kaane wom se o ma jaane wɛɛne o vo o yi kagoa kam yuu jei sem o na maŋe se o taa wora to. Dáane mo Wɛ wó nii o baŋa ne bena yatɔ de chichworo, ye o daare o che‑o kayanchɔrɔ kom yiga ne. 15Kayanchɔrɔ kom ma twe na dedɛ se ba vo ba pɛ kaane wom ba ja viiri, ne bu-tola na na duri tei to. 16Tega kam ma zeini kaane wom, ye ka pore bɔɔne ka nyɔ na balo maama kayanchɔrɔ kom na twe to. 17Konto ŋwaane mo kayanchɔrɔ kom bane tiini de zaŋe de kaane wom. Ko laam ma vo se ko ke jara de kaane wom dwi tiina balo na daare to. Banto mo ye balo na sɛ Wɛ nia yam, ye ba bere we ba tɔge Yezu chega kam to. 18Kayanchɔrɔ kom laam ma vo ko zege naneo kom ni ne.

Currently Selected:

Gurim 12: KBG

Highlight

Copy

Compare