Jeelim 31
31
Isarele de Midian jara yam
1 Baŋa Wɛ déem ma ta de Moses o we, 2“Zaŋe n pa se Isarele tiina bam jwoori ba chɔge Midian tiina bam de ba na ke-ba tei to. Dento keim dem kwaga ne, n jege se n te mo.”
3Moses ma ta de nɔɔna bam o we, “Ti-na á yiga se á jar-keira badwonna nwoŋi ba vo ba kwaare jara de Midian tiina bam. Baŋa Wɛ lage o tɔge abam baŋa mo o waare-ba. 4Le-na nɔɔna moro moro Isarele dwi maama wone se ba vo ba ke jara yam.” 5Ba ma seene ba le nɔɔna morro fuga-telei (12,000) se ba nwoŋi ba vo ba kwaare jara yam, dwi maama de de nɔɔna moro. 6Moses ma pa ba nwoŋi ye Wɛ kaanem tu Eleaza bu Finehase de wo ba tei ne. Finehasi ma kwei wara-jei zela yadaara o woli da, dedaane nabwanno se ba wu-te jara-keim ŋwaane.
7Isarele tiina jar-keira bam ma nwoŋi ba jeeri Midian tiina de jara, nenɛɛne Baŋa Wɛ na pɛ Moses ni se ba ke tei to. Ba ma wane-ba ye ba go ba baara bam maama. 8Ba déem go Midian pwa banu bam de mo: Evi, de Rekem, de Zura, de Hura, dedaane Reba. Ba ta ma go Beyora bu Balaam ba woli da.#Jeelim 22:5 9Ba laam ma lɛɛre ba pɛ Midian tiina kaana de ba bia, ba daare ba vere ba vara, de ba jejegero maama ba ja ba viiri. 10Ba ma zwɛ teene delo Midian tiina bam na zoore de wone to, de ba vwoa yam. 11Ba laam ma pɛ kolo maama ba na vere ba dona tei ne to, ko woli de nɔn-bia de vara maama ba ja ba viiri. 12Ba ma ja nɔɔna bam, de vara bam, de jejegero tem maama se ba vo ba bere Moses, de Eleaza, dedaane Isarele kɔ-fɔrɔ kom maama. Konto to, de ba ya chwi ba vwoa yam Moaba laŋa kam te-kampare ne mo, jei selo na wo Jɔdan buga kam ni ne ye Jeriko de wo bubɛ dedwoŋi dem seeni to.
13Moses de Wɛ kaanem tu Eleaza, dedaane Isarele kɔ-fɔrɔ kom maama ma nwoŋi ba na zoore mɛ to ba vo ba jeeri ba jar-keira bam. 14Moses bane déem ma zaŋe de jar-keira dedɛɛra balo na jwoori jara yam wone to. Banto ye balo na nii nɔɔna moro baŋa ne de balo na nii nɔɔna bi baŋa ne to mo. 15O ma bwei-ba o we:
“Bɛ mo ye abam yage Midian tiina kaana bam maama pa se ba ta ŋwe? 16Nii-na! Kaana banto déem mo sɛ Balaam ni pa se ba soge dé baara bam se ba ywori Baŋa Wɛ kwaga ne ba daare ba zuli Baal-Peora to. Ba na ke tei konto to pɛ se jawe-chɛɔ ja Baŋa Wɛ nɔn-kɔgɔ kom mo ko chɔge-ba. 17Konto ŋwaane, zaŋe-na á go ba bia balo maama na ye bakeiri to, de ba kaana balo na peini de baara to maama. 18Ko nam ná ye ba bukwa balo ta na yeiri baara to, yage-ba-na se á di-ba á ma‑á ke á kaana.
19Abam wolo maama ná go nɔɔno naa o ná dwei too jara-keim baŋa ne, se kotu taa zoore dáa dáa de kɔgɔ kom maama se ko yi da yarepɛ. Da yam konto da yatɔ dɛ dem ne, dedaane ya da yarepɛ dɛ dem ne, kotu wó kwɛ o tete, de balo o na jaane jara-keim baŋa ne to se ba maama maŋe de chullu tem. 20Á ta jege se á zare á gwaaro, dedaane kolo maama á na jege ye ba kwei varem tɔnɔ, naa boŋo koro, naa dɛ ba ma ke-te to mo pa se te laam kwɛ.”
21Wɛ kaanem tu Eleaza de ma ta de jar-keira bam o we, “Baŋa Wɛ na kwei nia yalo o pa Moses se o pa abam to mo tento:
22-23Ko ná ye wonnu telo maama na ba zwɛ mini wone to, ne sabu-seŋa, de lu-nyenno, de channa, de luuru dwi dedwonna#31:22-23 luuru dwi dedwonna = iron, tin, lead na ye tei to, á jege se á kwei-te á de mini wone pa se te kwɛ chullu tem seeni mo. Á ná le-te mini dem wone, se á ma chullu kwɛɛm na bam á miisi te yera ne se te laam kwɛ te ti. Ko nam ná ye wonnu telo mini na wó zwɛ to, se á miisi-te de chullu kwɛɛm na bam se te kwɛ. 24Da yarepɛ dɛ dem ne, á wó zare á gwaaro, se á maŋe de chullu tem. Abam laam jege chwoŋa se á jwoori á ba á ta‑á zoore kɔgɔ kom wone.”
Ba chɛ jejegero ba pa daane
25 Baŋa Wɛ ma ta de Moses o we, 26“Nmo de kaanem tu Eleaza, de Isarele sɔ-yuni yiga tiina bam mo jege se á jeeli kolo maama jar-keira bam na di Midian tiina bam ye ba ja ba ba ywo-seeni to, ko ná ye ba nabiina de vara de. 27Laam pɔɔre-te kuni belei, se a kwei popɔra dedoa á pa jar-keira bam, ye á daare á kwei popɔra kadwoŋi kam á pa Isarele tiina kɔgɔ kolo na daare to. 28-29Ko ná ye jar-keira popɔra kam, zo ka wone n le nɔɔno dedoa naa varem dedoa ba bia yanu maama wone, se n kwei n pa Eleaza. Nɔɔna bam konto, de vara bam konto ye Baŋa Wɛ nyem mo. 30Ko nam ná ye Isarele tiina badaara bam popɔra, n jege se n le nɔɔno dedoa naa varem dedoa mo ba finnu maama wone, se n kwei n pa Levi tiina bam, ba na toŋe wara-jei sem totoŋa to ŋwaane.”
31Moses de Eleaza ma ke tei Baŋa Wɛ na bere Moses to.
32Jar-keira bam déem na vere wonnu telo ba ja ba jwoori ye te daare to mo tento:
Pei#31:32 pei naa pei de bone morro bia yaredo de fuserepɛ-tenu (675,000), 33de naane morro fuserepɛ-telei (72,000), 34de bonɛ morro fuseredo-dedoa (61,000), 35dedaane bukwa balo na yeiri baara to morro fintɔ-telei (32,000).
36Jar-keira balo na vei jara-keim wone ye ba jwoori to popɔra kam déem ye tento mo:
Pei morro bia yatɔ de fintɔ-terepɛ dedaane bia yanu (337,500). 37Ba ma le pei bia yaredo de fuserepɛ-senu (675) se wone ba pa Baŋa Wɛ. 38Naane morro fintɔ-teredo (36,000). Ba ma le naane fuserepɛ-delei (72) de wone ba pa Baŋa Wɛ. 39Bonɛ morro fintɔ de bia yanu (30,500). Ba ma le bonɛ fuseredo-dedoa (61) se wone ba pa Baŋa Wɛ. 40Nɔɔna morro fuga-yaredo (16,000). Ba ma le nɔɔna fintɔ-balei (32) ba wone ba pa Baŋa Wɛ.
41Moses ma kwei Baŋa Wɛ nyem o pa Eleaza, nenɛɛne Baŋa Wɛ na pɛ‑o ni se o ke tei to.
42-43Isarele tiina badaara bam popɔra kalo Moses déem na pɔɔre jar-keira bam jejegero tem wone o pa Isarele nɔn-kɔgɔ kom to maa ye:
Pei morro bia yatɔ de fintɔ-terepɛ dedaane bia yanu (337,500), 44de naane morro fintɔ-teredo (36,000), 45de bonɛ morro fintɔ de bia yanu (30,500), 46de nɔɔna morro fuga-taredo (16,000).
47Moses ma zo Isarele tiina kɔgɔ kom popɔra kam wo o le nɔɔno dedoa naa varem dedoa ba finnu maama wone, ne Baŋa Wɛ na pɛ‑o ni se o ke tei to. O maa kwei nɔɔna bam de vara bam konto o pa Levi dwi tiina balo na toŋe wara-jei sem totoŋa to.
48Jar-keira bam dedɛɛra balo na nii nɔɔna moro baŋa ne de balo na nii nɔɔna bi baŋa ne to déem ma vo Moses tei, 49ye ba ta ded‑o ba we, “Dé kwo, debam na jeeli dé nɔɔna bam ni, kɔgɔ de kɔgɔ to, dé maane we nɔɔn-nɔɔno wo jei. 50Konto ŋwaane dé laam kwei sabu-seŋa jejegero telo dé na jaane dé kɔɔne Midian tiina bam yera ne to mo dé ba se dé pa Baŋa Wɛ. Sabu-seŋa wonnu tem maa ye bɛ, de jafola, de zwa-kwana, de wonnu tedwonna. Dé ke konto se dé ma dé ke Baŋa Wɛ lei ye dé daare dé le dé tusim o yiga ne mo.”
51Moses de Wɛ kaanem tu Eleaza ma jwoŋi sabu-seŋa jejegero tem jar-keira dedɛɛra bam tei ne. 52Ba déem na jeeli te dunni to, te déem yi kilo bi de funogo (190) mo.#31:52 Hiburu = sɛkɛle 16,750 Ba ma kwei te maama ba pa Baŋa Wɛ. 53Ko daare jar-keira bam maama de déem jwoŋi ba nyem wonnu telo ba na vere Midian tiina bam tei ne to wone mo. 54Moses de Eleaza déem ma jwoŋi sabu-seŋa wonnu tem dedɛɛra bam tei ne ba ja ba vo ba tiŋi wara-jei sem wone, se ko taa ye gula ko pae Isarele tiina bam Baŋa Wɛ ŋwaane.
Currently Selected:
Jeelim 31: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
