Jeelim 32

Dwia yalo na jeini Jɔdan buga kam wɛ-puli seeni to

Nia Gulim 3:12-22

1Ko ná ye Ruben de Gad dwia yam, ba vara kɔgɔ déem daga dedɛ. Ba ma na we Jazera tega kam de Gilead tega kam lana se vara bam taa di ba sui. 2Ba ma vo Moses, de Wɛ kaanem tu Eleaza, dedaane Isarele kɔgɔ kom yiga tiina badwonna bam tei, ye ba we, 3-4“Baŋa Wɛ seene o woli debam pa se dé di Atarofa, de Dibon, de Jazera, de Nimira, de Hesebon, de Elealɛ, de Sebam, de Nebo, de Beon. Dé nam maane we tega kalo na gilimi teene dento to tiini ka lana de vara kɔnɔ. Chega to, dé vara kɔgɔ kom daga dedɛ. 5Dé kwo, nmo yi ná su dé kikia yam, sɛ se dé yé bɛ Jɔdan buga kam. Kwei ywo-seeni tega kam n pa debam se dé taa tei.”

6Moses ma leiri Ruben dwi tiina de Gad dwi tiina bam o we:

“Abam nam boŋe se á maŋe ywo-seeni, se á chorro Isarele tiina bam taa vei ba ke jara mo na? 7Abam ná ke konto, á chorro tem vɔna wó pare mo pa se ba ga chwoŋa se ba bɛ Jɔdan buga kam ba vo ba zo tega kalo Baŋa Wɛ na kwei o pa-ba to wone. 8Amo déem na zege Kadese-Baranea ne, ye a toŋe á kwoa bam se ba vo ba nii tega kam to, ba déem ke abam kikia yam dwoŋi mo.#Jeelim 13:2-29 9Ba déem vei ba yi Esekola nabara kam ba nii ba na tega kam na ye tei to. Ba laam ma jwoori dé tei, ye ba pa Isarele tiina bam vɔna pare ye ba we, dé yé zo tega kalo Baŋa Wɛ na kwei o pa debam to wone. 10Dento dɛ dem ne mo Baŋa Wɛ bane zaŋe, ye o du duuri o we:

11‘Nɔɔna balo maama na maŋe ba yi bena finlei ba daŋe ye ba nwoŋi Ejipti teo wone to bá na chwoŋa se ba zo tega kalo wone amo na gwoni ni de ba nabaara Abaraham, de Izaak, de Jakob se a pa-ba to wone. Kokuri to, ba wo yɔɔre ba ke ba wo-dedoa de amo. 12Jefunɛ bu Kaleb, de Nun bu Josua yerane mo wó zo da, banto na ke ba wo-dedoa de amo Baŋa Wɛ to ŋwaane.’

13 Baŋa Wɛ bane déem na zaŋe de Isarele tiina bam konto to, mo o pɛ se ba kaare kagoa kam wone ba beeri taa, bena finna. O ke-ba konto se ko vo ko yi balo na ke lwarem ba pa‑o to maama laam mo tege ba ti.

14Nii-na! Abam nam daa zege se á tɔge á kwoa totoŋ-naga kam mo, se Baŋa Wɛ bane daa tiini de zaŋe Isarele tiina bam baŋa ne de woli da. Á ye puseŋ-nyena mo! 15Abam zem ná ywori Baŋa Wɛ kwaga ne, á wó pa se o de ve nɔɔna bam maama mo o yage kagoa kanto wone. Abam wó pa se ba na ba chɔgem.”

16Ruben dwi tiina, de Gad dwi tiina bam ma leiri Moses ba we:

“Dé ya boŋe se dé lɔ jei selo dé na wó pe dé pei sem, de dé bone dem se wone to, se dé daare dé lɔ teene delo dé kaana de dé bia na wó taa zoore da to mo. 17Konto ná kea, dé wó kwei dé jara zela dé to dé dwonna Isarele tiina bam yiga ne se dé vo dé pa ba zo ba tega kam wone.#Josua 4:12-13 Dé bia bam nam wó taa zoore teene delo na fɔge de pe to wone mo, se tega kam tembia yé wane ba ke-ba kolokolo. 18Dé nam bá jwoori ywo-seeni, ko ná dae we Isarele dwi tiina maama nɛ ba jeiŋa jei se ba jeini. 19Debam tete bá tɔge dé jwoŋi tega kalo na tigi Jɔdan buga kam bubɛ dedwoŋi dem seeni to, dé na nɛ dé tega kam ywo-seeni to ŋwaane.”

20Moses ma leiri-ba o we:

“Abam ná seene yia mo se á ke konto, ti-na yiga se á nwoŋi á vo á ke jara yam Baŋa Wɛ ŋwaane. 21Nam pa-na se á baara bam maama kwei ba jara zela yam ba tɔge ba bɛ Jɔdan buga kam ba vo ba jeeri dé dona bam de jara, se ko taa nii Baŋa Wɛ ná zeili-ba dé yiga ne 22pa se dé wane ba maama dé di dé daare dé jwoŋi ba tega kam. Konto maama ná kea, se abam de jwoori ywo-seeni á jeini tega kalo wone Baŋa Wɛ na kwei o pa abam se á ta‑á tei to. Baŋa Wɛ de Isarele tiina bam daa bá taa jege abam jene.#Josua 1:12-15

23Abam nam ná wo ke se ko tɔge de á ni dem, ko ye á tusi Baŋa Wɛ chwoŋa ne mo konto. Ta‑á yei-na we, á wɛleere dem konto wó ba de lɔre jaja mo. 24Tɔ. Lɔ-na teene se á kaana de á bia taa zoore de wone. Ta fɔge-na jei se á pe á pei sem, de á bone dem se wone. Nam ta ke-na á na gwoni ni se á ke tei to.”

25Gad dwi tiina de Ruben dwi tiina bam ma leiri Moses ba we:

“Dé kwo. Dé wó ke tei nmo na pɛ debam ni se dé ke to. 26Dé kaana, de dé bia, de dé vara mo wó maŋe Gilead teene dem laŋa ne. 27Ko daare, dé baara bam maama wó ti yiga se dé vo dé ke jara yam Baŋa Wɛ ŋwaane. Dé maa wó bɛ Jɔdan buga kam dé vo dé kwaare jara nenɛɛne nmo na tage tei to.”

28Moses de laam ma pa Wɛ kaanem tu Eleaza, de Nun bu Josua, dedaane Isarele sɔ-yuni yiga tiina bam ni ye o we, 29“Ruben dwi tiina de Gad dwi tiina baara bam maama jege se ba kwei ba jara zela ba tɔge de abam ba bɛ Jɔdan buga kam, se ba vo ba ke jara Baŋa Wɛ ŋwaane ba woli abam se á de jwoŋi á tega. Konto ná ke pa se á na á jeiŋa jei, se á laam kwei Gilead laŋa kam á pa-ba se ba taa tei. 30Ba nam ná wo sɛ se ba bɛ ba vo ba ke jara yam, se á pa ba de tɔge ba jwoŋi ba tega Kanaan laŋa kam ne, mɛ á maama na wó jwoŋi á nyem to.”

31Gad dwi tiina bam, de Ruben dwi tiina bam ma leiri ba we, “Dé kwo, dé wó ke se ko tɔge de Baŋa Wɛ ni dem. 32Dé wó kwei dé jara zela dé tɔge dé bɛ Jɔdan buga kam dé zo Kanaan laŋa kam wone se dé ke jara Baŋa Wɛ ŋwaane. Ko kwaga ne dé laam wó jwoori dé jeini ywo-seeni se dé taa tei tega kanto na wo Jɔdan buga kam wɛ-puli seeni to.”

33Moses déem ma kwei tega o pa Gad dwi tiina bam, de Ruben dwi tiina bam, de Josɛf bu Manasɛ dwi chichworo kom se ba taa tei. O na pɛ-ba tega kalo to maa ye: Amori tiina Pɛ Sihon paare dim laŋa kam, dedaane Basan teo Pɛ Oga paare dim laŋa kam mo, ko ná ye ba tega kam maama, de ba teene dem de de nawuura yam.

34Gad tiina bam déem ma fɔge ba lɔ Dibon, de Atarofa, de Arowa, 35de Aterofa-Sofan, de Jazera, de Jogebeha, 36de Bɛte-Nimira, dedaane Bɛte-Haran. Ba ma lɔ teene dem konto ba pe, ye ba daare ba fɔge jei se ba pe ba pei se wone.

37Ruben tiina bam de ma jwoori ba lɔ Hesebon, de Elealɛ, de Kiriafayim, 38de Nebo, de Baal-Meon, ko woli de Sibima. Ba déem pɛ teene dem konto de yera mo. De yera badwonna de déem leiri mo.

39Manasɛ bu Makira sɔ-yuu tiina bam déem vei Gilead teo kom ba ke jara ba di-ko, ye ba zeili Amori tiina bam ya na zoore da to. 40Konto ŋwaane Moses ma kwei Gilead laŋa kam o pa Makira sɔ-yuu tiina bam se ba taa zoore da. 41Jayira na nwoŋi Manasɛ dwi dem wone to, de ma vo o ke jara o di Gilead nawuura yam. O ma pa se ba lɛɛre ba bwoi-ya we ‘Jayira te-balwa bam’. 42Noba de ma vo o ke jara o di Kenafa teo de ko nawuura yam. O déem ma pa se ba lɛɛre ba bwoi teo kom yere we ‘Noba’.

Currently Selected:

Jeelim 32: KBG

Highlight

Copy

Compare