Chullu 2
2
Wodiu pɛɛre kaanem
1Abam wolo ná boŋe se o ja muni pɛɛre o ba se o kaane o pa Baŋa Wɛ, kotu jege se o beeri mun-bwei delo na lamma chekke to. O wó lwo Olivi nuga de baŋa ne, se o daare o woli Faraniki talwoŋ-ywoŋa da. 2O laam maa wó ja o pɛɛre dem o vo Aron dwi dem kaanem tiina bam tei. Ba dedoa mo wó zwɛ muni dem na gwaane de nuga to, de talwoŋ-ywoŋa kam maama o ke o ja-bɔŋɔ ne. O laam wó zwɛ pɛɛre dem popɔra kanto mo kaanem dakaa kam baŋa ne se ka taa ye gulim pɛɛre ka pa Wɛ. Pɛɛre dem konto lwom maa ywomma de pae Baŋa Wɛ. 3Muni pɛɛre delo ta na daare to wó taa ye Aron de o bia bam nyem mo. De maa tiini de ye wose mo, de na nwoŋi Baŋa Wɛ wodiu pɛɛra yam wone to ŋwaane.
4Abam wolo nam ná boŋe se o wɔ bworobworo kura wone se o kwei o ma ke kaanem dento dwoŋi, kotu jege se o kwei mun-bwei delo na tiini de lamma chekke, ye sabɔle wo woli da to. O wae o gwaane muni dem de nuga o ma ke bworobworo kom, naa se o kwei muni dem o ma wɔ bworobworo-memene#2:4 Bworobworo-memene = bworobworo kolo na ba jege sabɔle ko wone to o daare o ma nuga o taare taare de maama. 5Kotu nam ná lage se o wɔ bworobworo kom luu baŋa ne, se o kwei mun-bwei delo na tiini de lamma chekke to o ma ke wodiu pɛɛre dem konto. O wó woli nuga da, se o yé pa se sabɔle woli de wone. 6Ko kwaga ne, o wó fɔ-ko mena-mena mo, ye o daare o lwo nuga ko baŋa ne, se ko taa ye wodiu pɛɛre. 7Kotu nam ná saŋe o wodiu pɛɛre dem kambia wone, se o kwei mun-bwei delo na tiini de lamma chekke to, ye o woli nuga de wone.
8Nmo ná mɛ wonnu tem konto n ke wodiu pɛɛre dem se n kaane n pa Baŋa Wɛ, n laam wó ja-de n vo n pa Wɛ kaanem tu wom. Wonto de laam wó ja-de o vo kaanem dakaa kam teiŋa. 9O wó kwei pɛɛre dem o pɔɔre popɔra kadwoŋi se ka taa ye gulim pɛɛre ka pa Wɛ, ye o zwɛ-ka kaanem dakaa kam baŋa ne. Pɛɛre dem konto lwom maa ywomma de pae Baŋa Wɛ. 10Wodiu pɛɛre delo ta na daare to wó taa ye Aron de o bia bam nyem mo. De maa tiini de ye wose mo, de na nwoŋi Baŋa Wɛ wodiu pɛɛra yam wone to ŋwaane.
11Abam wolo ná lage se o kwei wodiu pɛɛre o kaane o pa Baŋa Wɛ, se o yé woli sabɔle de wone. Kokuri to, sabɔle dedaane tooro dae se abam ma-te á zwɛ á ke pɛɛre á pa Baŋa Wɛ. 12Kotu nam ná lage se o kwei wodiiru telo na lwoori yiga te ke to o pa Baŋa Wɛ, o jege chwoŋa se o woli sabɔle de tooro te wone. Ko nam dae se á kwei wonnu tem konto á zwɛ kaanem dakaa kam baŋa ne se te lwom taa ywomma. 13Á nam jege se á woli yɛ á wodiu pɛɛra yam maama wone. Kokuri to, yɛ dem zege de pae ni-gwonim delo Wɛ na ke de abam to mo. Konto ŋwaane, yeini á zezage yɛ á wodiu pɛɛra yam wone.
14Abam wolo nam ná boŋe se o kwei o kara wodiu kolo na dɛ yiga ko ke to o pa Baŋa Wɛ, se kotu kwei ko bia o nɔ ko wodi-doŋo maŋa ne ye o daare o wɔ de mini. 15O ta wó gwaane nuga ko wone o daare o kwei talwoŋ-ywoŋa o woli da, se ko taa ye wodiu pɛɛre mo. 16Kaanem tu laam maa wó pɔɔre gulim pɛɛre popɔra ko wone se o kwei o zwɛ o pa Wɛ. Men-bia bam chichworo de nuga kam chichworo dedaane talwoŋ-ywoŋa kam maama mo o jege se o kwei o zwɛ konto, ko na ye wodiu pɛɛre mo ko pae Baŋa Wɛ to ŋwaane.
Currently Selected:
Chullu 2: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
