Chullu 1
1
Zwɛɛm pɛɛre kaanem
1 Baŋa Wɛ déem zege wara-vwei dem ne mo#Nwoŋim 26 o bwoŋi Moses, ye o ta ded‑o o we, 2“Ta de Isarele tiina bam we:
Abam wolo ná yeini o boŋe se o ja pɛɛra o ba o kaane o pa Baŋa Wɛ, se o le o sɔŋɔ vara bam wone o ja o ba.
3Wolo ná kuri se o kwei naao o ma o ke zwɛɛm kaanem, se o nii o naane dem wone o le nabea kalo na ba jege gɛɛ ka yera ne to o ja o ba. Kotu laam maa wó ja-ka o vo o zege wara-vwei ni dem ne, se Baŋa Wɛ laam sɛ se o jwoŋi-ka#1:3 jwoŋi-ka naa jwoŋi‑o. 4Kotu ta wó kwei o jeŋa mo o daŋe nabea kam yuu ne se ko bere we varem wom leiri o yuu ne mo, se Wɛ wane o saare o wɛleera yam o yage.#Jeelim 8:12 5O laam maa wó gwoni nabea kam ba Baŋa Wɛ yiga ne, se Aron dwi dem na ye kaanem tiina to de laam kwei ka jana bam ba ja vo ba dole dole kaanem dakaa kam na wo wara-vwei ni dem ne to sɛ sena sem yera ne. 6Kotu ta wó pwoni varem wom mo se o daare o cha o nɔna yam muga-muga. 7Kaanem tiina bam de maa wó tɔre mini kaanem dakaa kam baŋa ne, ye ba daare ba tigisi dɛ ba daŋe mini dem baŋa ne. 8Ba ta wó kwei varem wom nɔna, de o yuu, de o lara kam maama ba daŋe dɛ sem na jege mini to baŋa ne mo. 9Ko nam ná ye varem wom nɛ sem, de o loro tem, se kotu zare tento yiga se kaanem tu wom laam zwɛ te maama kula kaanem dakaa kam baŋa ne. Pɛɛre dem konto ye zwɛɛm kaanem mo. De lwom maa ywomma de pae Baŋa Wɛ.
10Ko nam ná ye pia, naa boŋo mo kotu kuri se o ma o ke zwɛɛm kaanem, se o le pi-bea naa bo-bala o vara bam wone, ye gɛɛ tere ka yera ne. 11O laam maa wó ja varem wom o vo kaanem dakaa kam saŋa kalo na jeeri baŋa seeni to o go‑o Baŋa Wɛ yiga ne. Kaanem tiina bam de maa wó kwei varem wom jana bam ba dole dole kaanem dakaa kam sɛ sena sem yera ne. 12Nɔɔno wom ta wó cha varem wom nɔna yam muga-muga, se kaanem tu wom kwei o nɔna yam, de o yuu, de o lara maama o tigisi dɛ selo na jege mini ye se wo kaanem dakaa kam baŋa ne to ne. 13Ko nam ná ye varem wom nɛ sem, de o loro tem, se kotu zare tento yiga se kaanem tu wom laam zwɛ te maama kula kaanem dakaa kam baŋa ne. Pɛɛre dem konto ye zwɛɛm kaanem mo. De lwom maa ywomma de pae Baŋa Wɛ.
14Ko nam ná ye zuna dwi dem mo kotu kuri se o ma ke zwɛɛm kaanem o pa Baŋa Wɛ, se o kwei kunkwoŋa, naa kunkwon-puuri o ma o toŋe. 15Kaanem tu wom mo wó ja-ka o yi kaanem dakaa kam jei sem se o jujugi ka yuu o gwori ye o daare o zwɛ ka yuu kom kaanem dakaa kam baŋa ne. O laam maa wó zulimi zuŋa kam se ka jana lwoori ba ke kaanem dakaa kam saŋa ne. 16O ta wó le ka fonfɔlɔ kom de kolo maama na wo ko wone to, ye o daare o dole-te o yage kaanem dakaa kam saŋa kalo na jeeri wɛ-puli seeni to ne, tentwarem na dogele mɛ to. 17Kaanem tu wom ta wó ja kunkwoŋa kam mo ka vɔna seeni o kaare belei se ka yé tore. O maa wó kwei-ka o zwɛ dɛ sem na jege mini ye se wo kaanem dakaa kam baŋa ne to. Pɛɛre dem konto ye zwɛɛm kaanem mo. De lwom maa ywomma de pae Baŋa Wɛ.
Currently Selected:
Chullu 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
