Chullu 17

Vara gom chullu

1 Baŋa Wɛ daa ma ta de Moses o we:

2“Ta amo ni dento n bere Aron de o bia bam, ko woli de Isarele tiina bam maama: 3-4Isarele dwi tu wolo ná zege jei selo maama ne o go naao, naa pia, naa boŋo se o ma ke kaanem, ye o wo jaane varem wom o vo wara-jei sem se ba go‑o wara-vwei dem ni ne ba kaane ba pa Baŋa Wɛ, kotu sage de chullu tem mo de o na pwori jana tei to. Ko daa dae se o tɔge o woli Isarele dwi dem wone. 5Ni dento wó che Isarele tiina bam se ba yé taa kare pwola ne ba ke kaanem yɔɔ yɔɔ. Ba laam maa wó yeini ba ja ba kaanem vara maama ba jeeri wara-vwei dem ni ne ba pa Baŋa Wɛ. Kaanem tu wom wó kwei ba pɛɛra yam konto o ke kaanem o pa Baŋa Wɛ se ya taa ye yazura pɛɛra kaanem. 6Kaanem tu wom maa wó kwei varem jana bam o dole dole o yage kaanem dakaa kam na wo wara-vwei ni dem ne to sɛ sem ne. O ta wó zwɛ varem lara kam, se ka lwom dem taa ywomma de pae Baŋa Wɛ. 7Isarele tiina bam dae se ba ywori Wɛ kwaga ne se ba taa goe ba vara pwola ne ba kaane ba pae chichiri na jiri bone to.

Isarele tiina bam de ba kwaga kam jege se ba tɔge ni dem konto mo se ko taa vei wuu.

8Daa‑n ta ta de-ba we: Ko ná ye Isarele dwi tiina naa veira balo na zoore ba wone to, ba wolowolo ná go varem se o ma o ke zwɛɛm kaanem naa kaanem delo maama, 9ye o ná wo jaane kaanem dem o jeeri wara-vwei dem ni ne se o ke kaanem o pa Baŋa Wɛ, se á le konto tu se o daa yé tɔge o woli Isarele dwi dem wone.”

Jana dim chullu

10“Isarele tiina bam de veira balo na zoore ba wone to wone wolo ná di jana, amo wó nwoŋi kotu kwaga ne. A ta wó le‑o Isarele dwi dem wone. 11Ko na ye tei to, woŋo maama jege ko ŋwea ko jana bam ŋwaane mo. Amo ma kwei jana bam a pa abam se á ta‑á ma-ba á ke kaanem se á le á wɛleera amo yiga ne. Ko ye jana bam konto mo pae á wɛleera saare, ba na leiri ŋwea kam yuu ne to ŋwaane.#Hiburu 9:22, 28 12Konto ŋwaane mo pɛ se a ta de Isarele tiina bam we, ba wolowolo de veira balo maama na zoore ba wone to dae se ba di jana.

13Isarele tiina bam de veira balo na zoore de-ba to wolo ná vei se o tɔɔne, ye o ná go varem wolo, naa zuŋa kalo na maŋe de dim chullu tem baŋa ne to, kotu jege se o lwoori ka jana bam tega ne mo o daare o kwei kasolo o ma o kwoli-ba. 14Kokuri to, woŋo maama yeini ko jege ko ŋwea ko jana bam ŋwaane mo. Amo ma da ko ŋwaane a we, Isarele tiina bam dae se ba di woŋo ye jana bam ta wo ko yera ne, se wolo ná di jana, kotu daa bá tɔge o woli amo nɔɔna bam wone.

15Nɔɔno wolo nam ná nɛ varem wolo na tege o tete toone, naa kago-vara na tore‑o ba go to, ye kotu ná di varem wom nɔna, se o zare o gwaaro o daare o swɛ o yera, se dedaan-ni maŋa ná yia, se o laam kwɛ de chullu tem. Ni dem konto wora de pae Isarele tembia de veira balo na zoore ba wone to mo. 16Kotu nam ná ve se o zare o gwaaro ye o swɛ o yera, o tusim dem wo o yuu ne mo ye o maŋe se o na waarem.”

Currently Selected:

Chullu 17: KBG

Highlight

Copy

Compare