Chullu 16
16
Wɛleera saarem dɛ dem totoŋa
1Aron bia balei na tege to kwaga ne Baŋa Wɛ déem ŋɔɔne dedaane Moses. Ba déem tega de ba na wo tɔge chwoŋa se ba twɛ Baŋa Wɛ yiga to ŋwaane mo. 2Baŋa Wɛ ma ta de Moses o we:
“Kaane n zembaaro Aron we, ko dae se o ná lage maŋa de maŋa kalo, se o zo amo di-yun-gala kam gare-jale dem na chege-ka to. O ná fe o zo se o twɛ amo ni-gwonim dakaa kam, o wó te mo, ko na ye jeiga kalo amo na yeini a veere a tete kunkwoŋo wone to ŋwaane. Wɛleera saarem ni-pugu kolo na pui ni-gwonim dakaa kam to baŋa ne mo konto.
3Aron nam ná yeini o zo amo wara-jei sem wone, se o ke tento: o wó kwei na-bala se o ma o ke wɛleere saarem kaanem, de pi-bala se o ma o ke zwɛɛm kaanem o ja o zo.#Hiburu 9:12 4O maa wó swɛ o yera ye o daare o zo Wɛ zula gare-laaro telo ba na mɛ gare-fefale ba sɔ to mo. Yiga to, o wó zo gare-dedɔrɔ kom dedaane gare-kuri-kukua kam se o daare o vɔ vovoa kam o teiŋa ne, ye o daare o kwei yuu gare-yi dem o ma ba o yuu kom. 5Isarele kɔ-fɔrɔ kom de wó le bo-bale selei mo ba pa Aron se o ma o ke wɛleere saarem kaanem ba ŋwaane. Ba ta wó pa‑o pi-bala se o ma o ke zwɛɛm kaanem.
6Aron maa wó kwei na-bala kam o ke wɛleere saarem kaanem se o le o tete lwarem de o diga tiina lwarem Wɛ yiga ne. 7O ta wó ja bone delei dem mo o vo wara-vwei dem ni ne o zege Baŋa Wɛ yiga ne. 8O jege se o ta jɔrɔ mo dáane se o lɔre boŋo kolo na wó taa ye Baŋa Wɛ nyem to, de kolo na wó toŋe Azazeli chulu to. 9Aron laam maa wó kwei boŋo kolo na ye Baŋa Wɛ nyem to o go o ma o ke wɛleere saarem kaanem. 10Ba nam wó kwei boŋo kolo na zege Azazeli chulu ŋwaane to ba pa Baŋa Wɛ ye ko ŋwe. Ba ta wó pa se ko le nɔɔna bam lwarem Wɛ yiga ne ye ba kwei-ko ba yage kagoa chwoŋa ne se ko viiri Azazeli chulu kom ŋwaane.
11Ko na jege se ko ke tei to, Aron wó ja na-bala kam o ba, se o kwei-ka o ma o ke wɛleere saarem kaanem se o le o tete lwarem de o diga tiina lwarem Wɛ yiga ne. O wó gwoni ka ba o go, 12ye o daare o kwei min-chala zoŋa, se o twoŋi mini Baŋa Wɛ kaanem dakaa kam baŋa ne o ke ka wone. O ta wó mɔ talwoŋ-ywoŋa jaguli-yia yalei, se o laam ja zoŋa kam de talwoŋ-ywoŋa kam o yɛɛre gare-jale dem o zo de yiga ne. 13O maa wó zege Baŋa Wɛ yiga ne, se o kwei talwoŋ-ywoŋa kam o daŋe min-chala yam baŋa ne. Nyoa laam wó guguli ka zaŋe ni-gwonim dakaa kam baŋa ne ka pe wɛleera saarem ni-pugu kom se o yé na-ko. O ná ke konto, o bá te. 14Konto kwaga ne, o laam wó de o noa mo na-bala kam jana wone, ye o miisi-ba Wɛleera saarem jei sem yiga ne. O ta wó miisi-ba kuni berepɛ mo ni-gwonim dakaa kam yiga ne.
15Aron ta wó go boŋo kolo na wora nɔɔna bam wɛleera saarem ŋwaane to mo, se o ja ko jana bam o zo gare-jale dem yiga ne. O wó kwei boŋo kom jana bam mo o miisi wɛleera saarem jei sem yiga ne, de dakaa kam yiga ne, nenɛɛne o ya na ke na-bala kam jana bam tei to. 16O jege se o tɔge chwoŋa kam konto mo o kwɛ Wɛ di-yun-gala kam se ko maŋe de chullu tem, Isarele tiina bam na tusi ye ba chɔge chullu tem de ba wɛleera yam to ŋwaane. O ta maa wó ke konto dwoŋi o kwɛ wara-vwei dem maama se de maŋe de chullu tem, de na wo Isarele tiina zoorem jei sem tetare ne ye ba yeini ba chɔge de chullu tem to ŋwaane. 17Aron nam ná zo Wɛ di-yun-gala kam wone se o le lwarem dem Wɛ yiga ne, nɔɔn-nɔɔno dae se o tɔge o zo wara-vwei dem wone. O wó maŋe da o yerane mo, o le o tete lwarem, de o diga tiina lwarem, de Isarele tiina kɔgɔ kom maama lwarem Wɛ yiga ne. 18O ná ke konto maama o ti, o nam ta wó nwoŋi o yi kaanem dakaa kam na zege Baŋa Wɛ yiga ne to se o kwɛ-ka se ka maŋe de chullu tem. O wó kwei na-bala kam de boŋo kom jana mo o ma o taare dakaa kam nyea yana yam. 19O laam maa wó de o noa jana bam wone o kwei-ba o miisi kuni berepɛ dakaa kam baŋa ne, se o ma o kwɛ-ka o jwoori o ke Wɛ jeŋa ne, Isarele tiina bam na tusi ye ba chɔge chullu tem to ŋwaane.
20Aron nam ná kwɛ Wɛ di-yuu kom, de wara-vwei dem maama, de kaanem dakaa kam o ti, se o laam ja boŋo kolo na wora Azazeli chulu kom ŋwaane ye ko ta ŋwe to o nwoŋi o zege. 21O laam wó kwei o je selei o daŋe boŋo kom yuu ne mo, se o daare o bore Isarele tiina bam zwabania kikia de ba wɛleera maama, o yage ko yuu ne. Ba wó le nɔɔno mo chulu totoŋe dem konto ŋwaane, se o vaŋe-ko o vo o yage kagoa ne. 22Boŋo kom wó zeŋe Isarele tiina wɛleera yam maama ko ja ko vo kagoa yuu ne, se nɔɔno wom laam bwoli-ko se ko viiri.
23Aron laam wó jwoori o zo wara-vwei dem wone, se o lɔɔre gare-laaro telo o ya na lɛ-te ye o zo Wɛ di-yuu kom wone to. O maa wó yage-te vwei dem wone. 24Ko kwaga ne, o wó zege jei selo na ye wose to ne mo o swɛ o yera, ye o daare o zo o tete gwaaro tem. O laam maa wó nwoŋi se o ke zwɛɛm kaanem o ma o le o tete lwarem Wɛ yiga ne, o daare o ke zwɛɛm kaanem dedwoŋi o ma o le nɔɔna bam de lwarem. 25O ta wó kwei wɛleere saarem varem lara kam mo o zwɛ kaanem dakaa kam baŋa ne.
26Wolo nam na wó ja boŋo kom o vo o yage kagoa yuu ne Azazeli chulu kom ŋwaane to de jege se o zare o gwaaro mo se o daare o swɛ o yera. Ko kwaga ne o laam jege chwoŋa se o jwoori o taa zoore Isarele tiina kɔgɔ kom wone. 27Ko ná ye wɛleere saarem na-bala kam, de wɛleere saarem boŋo kom, Aron na jaane te jana o zo Wɛ di-yun-gala kam se o le lwarem dem to mo, ba jege se ba ja vara bam konto ba nwoŋi ba vo dáa se ba zwɛ-ba. Ko nam ye ba tankwallo, de ba nɔna, de ba wo-zela maama mo ba wó zwɛ. 28Wolo na wó zwɛ-te to jege se o zare o gwaaro mo se o daare o swɛ o yera. Ko kwaga ne o laam jege chwoŋa se o jwoori o taa zoore Isarele tiina kɔgɔ kom wone.
29Abam jege se á tɔge amo Baŋa Wɛ ni dento mo se ko taa vei wuu: Bene maama wone, ko ná yi chane serepɛ chana kam da fuga dɛ ne, se á vɔ ni, ye á bá toŋe de dɛ dem wone. Abam balo na ye tembia to dedaane veira balo na zoore á wone to maama jege se á peene á tete konto dwoŋi mo. 30Ko ye dento dɛ dem wone mo kaanem tu wom wó le abam wɛleera maama Baŋa Wɛ yiga ne, se o fɔge o kwɛ abam se á maŋe de chullu tem. 31De dɛ dem wó taa ye de yera mo de pae abam, se á sii de wone ye á vɔ ni. Á wó tɔge amo ni dem konto mo se ko taa vei wuu. 32Maŋa maama wone wolo ba na yeini ba tiŋi se o leiri o kwo yuu ne o jwoŋi Wɛ kaanem totoŋe dem to mo wó zo Wɛ zula gare-laaro tem o ke wɛleera saarem totoŋe dem. 33O jege se o kwɛ Wɛ di-yun-gala kam, de wara-vwei dem maama, de kaanem dakaa kam, se te maŋe de chullu tem. O ta wó le kaanem tiina lwarem dedaane Isarele tiina kɔ-fɔrɔ kom maama lwarem Wɛ yiga ne.
34Amo ni dem konto wó taa wora mo taa wuu ko pae abam. Bene maama wone á jege se á ke konto mo á ma‑á le Isarele tiina bam wɛleera maama Wɛ yiga ne.”
Moses ma seene o pa ko ke ne Baŋa Wɛ na pɛ‑o ni se o ke tei to.
Currently Selected:
Chullu 16: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
