Chullu 18

Sare-peiga taane

1 Baŋa Wɛ daa ma ta de Moses o we:

2“Ta de Isarele tiina bam we: Amo mo ye abam Tu Baŋa Wɛ wom. 3Abam déem zoore Ejipti ne mo, nam yé lwoni-na ba kikia yam. Amo nam na lage a pa abam zo Kanaan tega kam ne konto to, yé lwoni-na ba de kikia. 4Yɔɔre á ta‑á tɔge amo nia yam yerane. Ta‑á yei-na se á sɛ amo bera yam. Amo mo ye abam Tu Baŋa Wɛ wom. 5Abam wolo kikia nam ná seene ya tɔge amo bera yam de a nia yam, kotu wó na ŋwea ya baŋa ne.#Luka 10:28 Amo mo ye Baŋa Wɛ wom.

6Abam wolowolo yé ke sare-peiga de o choro. Amo mo ye Baŋa Wɛ wom.

7Yé yaale n kwo yuu se n peini de n nu. Nmo nam dae se n yaale n nu de konto.

8Nam yé zo n kwo kaana wone se n ke sare-peiga de ba wolowolo. Keim dem konto yaale n kwo mo.

9Yé ke sare-peiga de n nakɔ, o ya ze ye n nakɔ vekke, naa á ná ye nu daane, naa kwo daane mo de. Ko ye bedwe mo de wolo á na bege daane sɔŋɔ kodoo ne, naa wolo na bege jei sedwonna ne, ye á lɔre daane to.

10Yé ke sare-peiga de n naa. Ko ná ye n bu-baaro bukɔ mo, naa n bukɔ bu de, wolo ná peini ded‑o, kotu yaale o tete mo.

11Yé ke sare-peiga de n kwo kaana bam wolo bukɔ. O ná ye bukɔ wolo n kwo na loge to, o ye n nakɔ mo konto.

12Yé ke sare-peiga de n kwo nakɔ, wonto na ye n kwo choro to ŋwaane.

13Yé ke sare-peiga de n nu nyaane, naa o zembaaro, banto na ye n nu chorro to ŋwaane.

14Yé yaale n kwo choro, se n peini de o kaane. O ye n nu mo konto.

15Yé ke sare-peiga de n bu-kaane.

16Yé yaale n zembaaro, naa n nyaane se n peini de o kaane.

17Nmo de kaane wolo na ke sare-peiga daane to, nam daa‑n yé swo o bukɔ, naa o naa. Banto maama ye chorro mo. Keim dem konto tiini de jege chaveera mo.

18N kaane ta ná ŋwe, yé zaŋe n swo o nyaane naa o zembaaro n ma n ke n kaane. Ko wó pa se ba zwe kazwe daane mo.

19Kaane ná jege o chana zarem o ke, yé peini ded‑o, se o wo maŋe de chullu tem.

20Yé peini de n dwoŋi kaane. Konto wó pa se n digiri Wɛ chullu tem seeni mo.

21Ko ná ye bia balo nmo na loge to, se n yé kwei ba wolowolo n pa se ba kaane‑o ba pa Moleka jwoni dem. Konto wó pa se á yaale á Tu Wɛ wom yere. Amo mo ye Baŋa Wɛ wom.#2 Tigisim 28:3

22Baaro ba jege se o peini de o dwoŋi baaro, ne baaro na peini de kaane tei to. Keim dem konto yɔɔre de ye wo-zɔɔne mo.#Rom 1:27

23Baaro dae se o ke sare-peiga de varem. Kaane de nam ba jege se o kwei o tete o pa varem peini ded‑o. Kikia yam konto yɔɔre ya jege chaveera mo.

24Abam yé zaŋe-na á tɔge kikia yanto baŋa á digiri á tete de chullu tem. Dwi-gɛ tiina balo nam na zoore ywo-seeni to kare ba ke kikia yam konto mo, ye ba digiri ba tete. Amo laam maa lage a zeili-ba se ba nwoŋi ba daare tega kam ba pa abam. 25Ba wo-zɔɔna yam chɔge tega kam mo. Konto ŋwaane a lage a pa cham ba ka baŋa ne, pa se ka ve ka nɔn-bia bam ka dole ka yage. 26Abam nam jege se á yɔɔre á sɛ amo nia yam de a bera yam mo. Á ba jege se á ke wo-zɔɔna kikia yanto dwoŋi, ne á ná ye tembia naa á ye veira mo de. 27Dwi-gɛ tiina balo ya na zoore tega kam ne to yeini ba ke keim-balwaaro tento maama mo pa se ba chɔge tega kam. A laam maa jege abam a vei dáane. 28Abam de nam ná ke konto dwoŋi á chɔge tega kam, ka lage ka ve abam ka dole ka yage, ne ka na maŋe ka ke tei de dwi-gɛ tiina bam to mo. 29Chega to, abam wolo maama nam ná kare o ke wo-zɔɔna yam konto, konto tu daa bá tɔge o woli Isarele dwi dem wone.

30Ta á sɛ-na a nia yam. Nam yé tɔge á ke wo-zɔɔna yanto na chuli keim ye dwi-gɛ tiina balo ya na zoore tega kam ne to yeini ba ke-ya to. Abam ná ke-ya, á wó chɔge á tete de chullu tem mo. Amo nam mo ye abam Tu Baŋa Wɛ wom.”

Currently Selected:

Chullu 18: KBG

Highlight

Copy

Compare