Chullu 15

Nɔɔna yera na nwoŋim chullu

1 Baŋa Wɛ ma ta de Moses dedaane Aron o we:

2“Ta de Isarele tiina bam we: Baaro ná weele o peini ne pa se na nwoŋa de ni ne, na bam konto pae se o wo maŋe de chullu tem. 3Kotu peini dem na bam ná yɔɔre ba nwoŋi mo naa ba ná kɔge de, o ta jege digiru Wɛ chullu tem seeni mo.

4Baaro wom konto na wó taa tigi woŋo kolo baŋa ne to, de o na wó jeini kolo maama baŋa ne to de dɛ te digiri mo. 5Wolo maama ná dwei woŋo kolo baŋa ne nɔɔno wom na tigi to, se kotu zare o gwaaro. O ta wó swɛ o yera mo, se dedaan-ni maŋa ná yia, se o laam kwɛ de chullu tem. 6Wolo maama de ná jeini kotu na jeini woŋo kolo baŋa ne to, se o zare o gwaaro. O ta wó swɛ o yera mo, se dedaan-ni maŋa ná yia, se o laam kwɛ de chullu tem.

7Ko ta ye bedwe mo de nɔɔno ná dwei baaro wolo peini ni na nwoŋi na to. Kotu de jege se o zare o gwaaro ye o daare o swɛ o yera, se dedaan-ni maŋa ná yia, se o laam kwɛ de chullu tem. 8Baaro wom ná twe lileeru pa se te dwei wolo, kotu de jege se o zare o gwaaro mo ye o swɛ o yera, se dedaan-ni maŋa ná yia, se o laam kwɛ de chullu tem.

9Baaro wom na dɔge gɔrɔ kolo naa pɔlɔ kolo baŋa ne to de digiri mo. 10Wolo ná dwei woŋo kolo maama baaro wom na dɔge ko baŋa ne to, kotu de digiri Wɛ seeni mo se ko yi dedaan-ni maŋa. Wolo de ná zeŋe woŋo konto dwoŋi, o jege se o zare o gwaaro mo ye o swɛ o yera, se dedaan-ni maŋa ná yia, se o laam kwɛ de chullu tem.

11Baaro wolo peini ni na nwoŋi na to ná wo sane o je ye o dwei wolo maama, se o zare o gwaaro o daare o swɛ o yera, se dedaan-ni maŋa ná yia, se o laam kwɛ de chullu tem.

12Baaro wom ná dwei kamɔgɔ woŋo kolo maama, ba jege se ba lɔ-ko mo ba dole ba yage. Ko nam ná ye daa zoŋa se ba zare-ka.

13Baaro wom peini ni daa ná ba nwoŋi na, se o cheigi da yarepɛ se o kwɛ o tete de chullu tem. O jege se o zare o gwaaro mo, ye o daare o mɔ na-doora buli-yi ne o swɛ o yera. O ná ke konto, o laam wó maŋe de chullu tem. 14Da nana dɛ dem ná yia, se o kwei kunkwona balei naa kunkwon-puura balei o ja o vo wara-jei sem ni ne o pa kaanem tu wom, se o wane o kwɛ o tete Baŋa Wɛ yiga ne. 15Kaanem tu wom maa wó kwei kunkwoŋa dedoa o ma o ke wɛleere saarem kaanem. O ta wó ma kadwoŋi kam o ke zwɛɛm pɛɛre kaanem mo. O jege se o ke konto mo se o le nɔɔno wom digiru Baŋa Wɛ yiga ne pa se o kwɛ de chullu tem o yera na nwoŋim ŋwaane.

16Baaro nywanno ná nwoŋi yɔɔ, se o swɛ o yera yam maama, se dedaan-ni maŋa ná yia, se o laam kwɛ de chullu tem. 17Gɔrɔ kolo, naa tankɔlɔ kolo ná dwei kotu nywanno tem, se o zare-ko. Ko de digiri Wɛ seeni se ko yi dedaan-ni maŋa mo. 18Baaro de o kaane ná peini daane ba ti, se ba maama swɛ ba yera, se dedaan-ni maŋa ná yia, se ba laam kwɛ de chullu tem.

19Kaane ná jege o chana wone zarem o ke, o bá maŋe de chullu tem se ko yi da yarepɛ. Wolo nam ná dwei‑o yanto da yam ne, kotu de wo maŋe de chullu tem mo. 20Da yam konto wone kaane wom na tigi woŋo kolo baŋa ne to, de o na wó jeini kolo maama baŋa ne to de wo maŋe de chullu tem. 21Wolo maama ná dwei kaane wom peiga jei, se kotu zare o gwaaro o daare o swɛ o yera, se dedaan-ni maŋa ná yia, se o laam kwɛ de chullu tem. 22Wolo maama de ná dwei kotu na jei woŋo kolo baŋa ne to, se o zare o gwaaro o daare o swɛ o yera, se dedaan-ni maŋa ná yia, se o laam kwɛ de chullu tem. 23Ko ná maŋe ko ye woŋo kolo maama kaane wom na jeini naa o tigi ko baŋa ne to mo de, ye wolo ná dwei-ko, kotu wo maŋe de chullu tem se ko yi dedaan-ni maŋa.

24Baaro nam ná peini ded‑o ya da yam wone, ye kaane wom kalugu jana bam ná dwei‑o, kotu de dɛ o wo maŋe de chullu tem mo se ko vo ko yi da yarepɛ. Da yam konto wone o na wó peini woŋo kolo maama baŋa ne to de digiri de chullu tem mo.

25Kaane wolo jana bam nam ná nwoŋi konto dwoŋi, ye ko dae o chana wone zarem da yam wone, naa jana bam nwoŋim ná gaale de da yam na yeini ya ye tei to, kotu de bá maŋe de chullu tem da yam konto maama wone. Ko ta ye bedwe de o zarem dem ná tɔge chwoŋa ye o wo maŋe de chullu tem tei to mo. 26Da yam konto wone, woŋo kolo maama baŋa ne kaane wom na wó peini, naa o na wó jeini to de dɛ te digiri mo, ne ko na ye tei o chana wone zarem da yam ne to. 27Wolo ná dwei wonnu tem konto, se kotu zare o gwaaro ye o daare o swɛ o yera, se dedaan-ni maŋa ná yia, se o laam kwɛ de chullu tem.

28Kaane chana zarem ná ti, se o cheigi da yarepɛ se o laam kwɛ o tete de chullu tem. 29Da nana dɛ dem ná yia, se o kwei kunkwona balei naa kunkwon-puura balei o ja o vo wara-jei sem ni ne o pa kaanem tu wom. 30Kaanem tu wom maa wó kwei kunkwoŋa dedoa o ma o ke wɛleere saarem kaanem. O ta wó ma kadwoŋi kam o ke zwɛɛm pɛɛre kaanem mo. O jege se o ke konto mo se o le kaane wom digiru Baŋa Wɛ yiga ne pa se o kwɛ de chullu tem o chana zarem ŋwaane.

31Á wó pa se Isarele tiina bam taa tɔge chwei sem konto se ba pɔɔre ba tete de wonnu telo na wae te pa se ba digiri ba tete de chullu tem to. Ba ná wo ke konto, ba wó digiri amo wara-jei sem na wo ba tetare ne to, pa se ba tɔge keim dento baŋa ne ba te.”

32Wɛ nia yanto wora se abam ta‑á yei baaro wolo na digiri de chullu tem o peini ni na nwoŋim ŋwaane to, de wolo na digiri o nywanno nwoŋim ŋwaane to ni ne mo. 33Ya ta wora se á ta‑á yei kaane wolo na wo o chana zarem maŋa ne to, de balo maama na jege digiru ba yera na nwoŋim ŋwaane to ni ne, ba ná maŋe ba ye baara naa kaana mo de. Ya ta wora se á ta‑á yei baaro wolo na wó peini de kaane o chana zarem da yam ne to ni ne mo.

Currently Selected:

Chullu 15: KBG

Highlight

Copy

Compare