Chullu 14

Yera jaweero kwɛɛm chullu

1 Baŋa Wɛ ma ta de Moses o we:

2“Nɔɔno yera jaweo ná ti ye kotu lage se o kwɛ o tete de chullu tem, ba jege se ba ke tento mo. Dɛ dem konto ne ba wó ja‑o ba yi kaanem tu wom tei mo. 3Kaanem tu wom wó nwoŋi kɔ-fɔrɔ kom na zoore mɛ to o vo o yi‑o dáa dáa se o fɔge o nii nɔɔno wom zii. Kotu jaweo kom ná seene ko jei, 4kaanem tu wom maa wó pa ni se ba ja zuna balei na maŋe de chullu tem ye ba ta ŋwe to, de Sedare daa dedoa, de gare-ŋon-seŋa, de Husopa vɔɔro ba ba ba pa‑o, se o ma-te o kwɛ nɔɔno wom. 5O ta wó pa ba ba mɔ buli yi na-doora ba daare ba lwo-ba kikeira wone. Ba laam maa wó gwoni zuŋa kam dedoa ba kikeira kam baŋa ne. 6Kaanem tu wom laam wó kwei zuŋa kalo ta na ŋwe to, de Sedare daa kam, de gare-ŋon-seŋa kam, de Husopa vɔɔro tem maama o de-te zuŋa kalo ba na go to jana bam wone. 7O maa wó miisi jana bam mo nɔɔno wolo na lage kwɛɛm to yera ne kuni berepɛ, se o daare o ta se ko nwoŋi pwooni we nɔɔno wom maŋe de chullu tem. O laam wó yage zuŋa kalo na ŋwe to mo pwola ne se ka jaane ka viiri.

8Nɔɔno wolo na lage kwɛɛm se o maŋe de chullu tem to nam ye se o zare o gwaaro mo, ye o cheeri o yuu maama, o daare o swɛ yera. Konto bere we o laam seene o kwɛ de chullu tem mo. O jege chwoŋa se o jwoori o zo kɔ-fɔrɔ kom wone, se o nam ba jege se o zo o vwei dem wone se ko ke da yarepɛ. 9Da yarepɛ dɛ dem ná yia, se o fane o yera koro de o ywei maama nywa! Ko maa ye o yu-ywei, de o twana, de o yi-kunnu tem mo. O laam maa wó zare o gwaaro ye o daare o swɛ o yera. Konto bere we o laam kwɛ mo o maŋe de chullu tem.

10Da nana dɛ dem ná yia, se nɔɔno wom laam ja pi-bale selei de pi-choa dedoa na jege bene, ye te ba jege gɛɛ te yera ne to o ba ware-jei sem ne. O ta wó woli mun-bwei bwɛ seredo#14:10 bwɛ seredo = 3 kilo na viiri de Olivi nuga to se ko taa ye wodiu pɛɛre. O nam ta wó ja nuga kabɔɔ dedoa o woli da o ba. 11Kaanem tu wolo na lage o kwɛ‑o to maa wó ja nɔɔno wom de o pɛɛra yam o vo wara-vwei dem ni ne se ba jeeri Baŋa Wɛ yiga ne. 12Kaanem tu wom laam wó kwei pi-bale sem dedoa o woli de nuga kabɔɔ kom ye o daare o zeiŋi-te wɛɛne, se o ma o ke wɛleere jene kaanem o pa Baŋa Wɛ nɔɔno wom ŋwaane. 13O maa jege se o gwoni pi-bala kam konto ba wara-jei sem ne, mɛ ba na yeini ba go wɛleere saarem vara de zwɛɛm kaanem vara da to. Pɛɛre dem na ye wɛleere jene kaanem to, pia kam ye Wɛ kaanem tu wom nyem mo, ne wɛleere saarem vara de na ye tei to. Pɛɛre dem konto tiini de ye wose mo. 14Kaanem tu wom laam wó kwei wɛleere jene kaanem pia kam jana bam badwonna, ye o taŋe-ba wolo na lage kwɛɛm to jazem zwɛ dem ne, de o jazem no-kweo kom, dedaane o jazem namimbu-kweo kom ne. 15O ta wó pwori kabɔɔ kom wo nuga kam o ke o tete jagwia ja-bɔŋɔ wone. 16O laam wó ma o jazem noa o laŋe nuga kam, ye o miisi-ka kuni berepɛ Baŋa Wɛ yiga ne. 17O ta wó kwei nuga kam na daare o ja-bɔŋɔ ne to o ma o taŋe wolo na lage kwɛɛm to jazem zwɛ dem, de o jazem no-kweo kom, dedaane o jazem namimbu-kweo kom, se ko woli de pia kam jana bam na maŋe ba taare da to. 18O laam jege se o kwei nuga kalo na daare o ja-bɔŋɔ ne to mo o lwo nɔɔno wom yuu ne. Kaanem tu wom wó toŋe konto mo se o le nɔɔno wom digiru Baŋa Wɛ yiga ne.

19Ko kwaga ne se kaanem tu wom kwei pi-choa kam o ma o ke wɛleere saarem kaanem wolo na lage kwɛɛm de o digiru tem to ŋwaane. O daa ta wó daare o go pi-bala kalo na daare to o ma o ke zwɛɛm pɛɛre kaanem dem. 20O laam wó kwei-ka o woli de wodiu pɛɛre dem o zwɛ-te kaanem dakaa kam baŋa ne. Kaanem tu wom jege se o tɔge chwoŋa kam konto mo o le nɔɔno wom digiru Wɛ yiga ne pa se o maŋe de chullu tem.

21Yiniga nam ná jege nɔɔno wom ye o ware pɛɛra yam maama o yi, se kotu ja pi-bala dedoa o ba se ba zeiŋi-ka wɛɛne ba ma ba ke wɛleere jene kaanem o ŋwaane. O ta wó woli mun-bwei bwɛ selei na viiri de nuga to se ko taa ye wodiu pɛɛre. O ta wó ja nuga kabɔɔ dedoa o woli da o ba. 22Kotu nam ta wó kwei kunkwona balei naa kunkwon-puura balei se ko maŋe de o dam na wae tei to. Ba wó kwei ba dedoa ba ke wɛleere saarem kaanem, se kadwoŋi kam taa ye zwɛɛm kaanem ŋwaane. 23Da nana dɛ dem ne nɔɔno wom wó ja wonnu tem konto o vo wara-jei sem ni ne o pa kaanem tu wom, se o wane o kwɛ o tete Baŋa Wɛ yiga ne. 24Kaanem tu wom wó kwei pi-bala kam na wora wɛleere jene kaanem ŋwaane to o woli de nuga kabɔɔ kom ye o daare o zeiŋi-te wɛɛne, se te taa ye pɛɛre te pae Baŋa Wɛ. 25O ta wó gwoni wɛleere jene kaanem pi-bala kam ba, ye o daare o kwei ka jana bam badwonna o taŋe-ba wolo na lage kwɛɛm to jazem zwɛ dem ne, de o jazem no-kweo kom, dedaane o jazem namimbu-kweo kom mo. 26O ta wó pwori kabɔɔ kom wo nuga kam mo o ke o tete jagwia ja-bɔŋɔ wone. 27O maa wó ma o jazem noa o laŋe nuga kam, ye o miisi-ka kuni berepɛ Baŋa Wɛ yiga ne. 28O ta wó kwei nuga kam na daare o ja-bɔŋɔ kom ne to o ma o taŋe wolo na lage kwɛɛm to jazem zwɛ dem ne, de o jazem no-kweo kom, dedaane o jazem namimbu-kweo kom, ne o na maŋe o ke tei de pia kam jana bam to. 29O laam jege se o kwei nuga kalo na daare o ja-bɔŋɔ ne to mo o lwo nɔɔno wom yuu ne, se o le kotu digiru Baŋa Wɛ yiga ne. 30Kaanem tu wom laam maa wó kwei kunkwona bam, ne nɔɔno wom na wane kolo o ja o ba to. 31O maa wó kwei ba dedoa o ma ke wɛleere saarem kaanem, ye o daare o ma kadwoŋi kam o ma ke zwɛɛm pɛɛre kaanem. O laam wó kwei wodiu pɛɛre dem o woli da o ke kaanem o pa Baŋa Wɛ. Kaanem tu wom jege se o tɔge chwoŋa kam konto o le nɔɔno wom digiru Wɛ yiga ne pa se o maŋe de chullu tem mo.”

32Wɛ nia yanto wora se á ta‑á yei nɔɔno wolo jawe-chɛɔ na jege‑o o yera ne ye ko ba ko jei to ni ne mo. Kotu ná lage kwɛɛm se o maŋe de chullu tem ye o ware se o yi pɛɛra yam chekke, o na jege se o ke tei to mo konto.

Nɔɔna sam ná kokɔŋe

33 Baŋa Wɛ daa ma ta Moses de Aron o we:

34“Abam ná zo Kanaan tega kam wone, mɛ a na lage a pa abam se a ta‑á tei to, ye amo ná pɛ se jaweo jage á sɔŋɔ kolo kabiri ne pa se ko kokɔŋe, 35se sɔŋɔ kom konto tu vo kaanem tu tei o ta o bere‑o we, ‘A maane we a sɔŋɔ kabiri sem jege jaweo, nenɛɛne ko lage ko kokɔŋe mo tei.’ 36Kaanem tu wom maa wó pa ni se ba lu sɔŋɔ kom zela maama ba ja ba nwoŋi pwooni se o wane o vo o nii-ko zii. Ba ná wo ke konto, zela yalo maama na wo sɔŋɔ kom wone to de wó taa jege digiru Wɛ chullu tem seeni. Kaanem tu wom laam wó vo o zo sɔŋɔ kom wo, 37se o nii ko kabiri sem na ye tei to. O ná nɛ we jaweo mo wora ye ko nyenyego ye nasen-sena, naa ko nye de sa-nyoa, ye ko jei sem ná moore se dwoni ba na fɔge kabiri sem mɛ seeni to, 38o laam wó nwoŋi sɔŋɔ kom ne mo ye o pa se ba pe-ko ba zege da yarepɛ. 39Da yarepɛ dɛ dem ná yia, kaanem tu wom wó jwoori sɔŋɔ kom ne mo se o daa nii-ko. O ná nɛ we jaweo kom laam jage mo kabiri sem yera ne, 40se o pa ni se ba le sɔŋɔ kom kandwa yalo jaweo kom na jege to, naa ya seene to, se ba ja-ya ba nwoŋi teo kom wone ba vo ba dole ba yage jeiga kalo ba na pɔɔre wo-zɔɔna ŋwaane to. 41Ba laam wó kɔgese sɔŋɔ kom wo kabiri sem mo se ba ja-te ba vo ba dole ba yage jeiga kalo ba na pɔɔre wo-zɔɔna ŋwaane to. 42Ba ta wó beeri kandwa yadwonna se ya leiri boboa nyena yam yuu ne, ye ba jwoori ba kwei teero ba ma fɔge kabiri sem ba zege.

43Ba ná le sɔŋɔ kom konto kandwa, ye ba kɔgese-ko, ba daare ba jwoori ba fɔge-ko, ye ko kabiri sem ta ná kokɔŋe, 44kaanem tu wom daa wó vo o nii sɔŋɔ kom mo. O ná maane we jaweo kom ta jage sɔŋɔ kom kabiri sem ne maama, ko bere we ko ye jawe-chɛɔ mo, pa se sɔŋɔ kom konto wo maŋe de chullu tem. 45O laam wó pa se ba de-ko tega ne. Ba maa wó chwooli ko kandwa maama, de ko dɛ maama, de ko teero maama ba vo ba dole ba yage jeiga kalo ba na pɔɔre wo-zɔɔna ŋwaane to. 46Ba nam ná pe sɔŋɔ kom konto ye nɔɔno ta ná zo ko wone, konto tu wó taa jege digiru Wɛ chullu tem seeni se ko yi dedaan-ni maŋa. 47Wolo de nam ná peini ko wone, naa o ná di wodiu ko wone, kotu jege se o zare o gwaaro mo.

48Ba nam ná jwoori ba fɔge sɔŋɔ kom kabiri sem, ye kaanem tu wom ná yi da o nii o na we jaweo kom wo jwoori ko jage jei jei, o laam wó ta se ko nwoŋi pwooni mo we sɔŋɔ kom maŋe de chullu tem. Kokuri to, jaweo kom ti maama. 49Kaanem tu wom jege se o kwei zuna balei, de Sedare daa, de gare-ŋon-seŋa, de Husopa vɔɔro mo se o ma o kwɛ sɔŋɔ kom se ko maŋe de chullu tem. 50O ta wó pa ba ba mɔ na-doora buli-yi ne ba daare ba lwo-ba kikeiri wone, se o daare o gwoni zuŋa kam dedoa ba kikeira kam baŋa ne. 51O laam wó kwei Sedare daa kam, de Husopa vɔɔro tem, de gare-ŋon-seŋa kam, de zuŋa kalo ta na ŋwe to mo, o de te maama zuŋa kalo ba na go to jana bam na viiri de na-doora bam to wone. O jege se o kwei tento maama o ma o miisi jana bam sɔŋɔ kom kabiri sem ne kuni berepɛ. 52Kaanem tu wom wó tɔge chwoŋa kam konto o ma zuŋa kam jana bam, de na-doora bam, de zuŋa kakam kam, de Sedare daa kam, de Husopa vɔɔro tem, de gare-ŋon-seŋa kam maama o kwɛ sɔŋɔ kom. 53O laam maa wó ja zuŋa kalo na ŋwe to o nwoŋi teo kom daa ne, ye o yage-ka pwola ne se ka jaane ka viiri. Ko wó tɔge chwoŋa kam konto mo se kaanem tu wom ke kaanem sɔŋɔ kom ŋwaane, se ko wane ko maŋe de chullu tem.”

54-56Wɛ nia yanto wora se abam ta‑á yei yera jawe-chɛɛro telo na lɔgese nɔɔna to, de ya-tora, de wo-zwanno, de sankwɛ, de ŋɔn-pwei ni ne mo. Ya ta wora gwaaro telo na ke gelangɔɔro to ŋwaane, de sam delo kabiri na kokɔŋe to ŋwaane. Ya ta wora wo-ŋonno, de yera bibeilim, de yera foosem ŋwaane mo. 57Á wó tɔge nia yanto mo á pɔɔre wonnu telo na maŋe de chullu tem to dedaane telo na jege digiru ye te wo maŋe to daane.

Nia yanto mo bere jaweero telo na wae te lɔgese nɔɔna to chullu tem.

Currently Selected:

Chullu 14: KBG

Highlight

Copy

Compare