Nwoŋim 40

Wara-jei sem chwiim

1 Baŋa Wɛ daa ma ta de Moses o we:

2“Ta‑n yei se n chwi amo wara-jei sem ben-doore dem boboa dɛ dem ne. 3Laam kwei ni-gwonim dakaa kam Wɛ nia fuga kam na wo ka wone to, n ja n zo n zege wara-vwei dem ne. Nmo nam wó pale gare-jale dem mo se de kwoli-ka de che Wɛ di-yun-gala kam wone. 4Nam ta ja tabolo kom n zo n zege vwei dem ne, se n daare n tigisi ko yera zela yam ko baŋa ne. Laam ja min-zwon-zego kom n ja n zo da, se n kwei min-zwonnu terepɛ tem n zege ko baŋa ne. 5N ma‑n wó kwei talwoŋ-ywoŋa dakaa kam mo n zege se ka taa wo ni-gwonim dakaa kam yiga ne, Wɛ di-yun-gala kam wone. Laam pale gare-jale delo na wó taa wo wara-vwei ni dem ne to.

6Ko ná ye zwɛɛm kaanem dakaa kam, se n zege-ka se ka taa bwola de wara-vwei ni dem. 7Laam kwei channa ware-zoŋa kam n zege wara-vwei dem de zwɛɛm kaanem dakaa kam tetare laŋa ne. Mɔ na n su-ka. 8Nmo ta wó che konkɔlɔ n kaare wara-vwei dem maama, se n daare n kwei gare-jale delo na wó che manchwo-peena yam to n pale da.

9Nmo nam ná ke konto maama, kwei Wɛ swolim nuga kam, se n ma‑n kwɛ wara-jei sem de se zela yam maama se ya taa ye wose ya pa-ne. 10Ta kwei swolim nuga kam n ma‑n kwɛ zwɛɛm kaanem dakaa kam dedaane ka yera zela yam, se ya taa ye wose ya pa-ne, 11se n daare n kwɛ ware-zoŋa kam de ka na zege woŋo kolo baŋa ne to se te de taa ye te yera.

12Nmo laam ma‑n wó pa se Aron de o bu-baara bam jeeri wara-vwei dem ni ne se n pa ba swɛ ba yera ba kwɛ ba tete amo ŋwaane. 13Kwei kaanem gwaaro tem n zo Aron, se n daare n ma nuga kam n turi‑o. Ke konto n pwɛ Aron o kaanem totoŋa yam ŋwaane, se o taa toŋe o pa-ne. 14Nam ta kwei gare-dedwaaro tem n zo Aron bia bam de, 15se n daare n turi-ba de nuga kam, nenɛɛne n na ke tei de ba kwo wom to. Konto mo wó pa se ba de ba dwi tiina taa ye amo kaanem tiina se ko taa vei wuu.”

16Moses déem ke ko maama se ko tɔge Baŋa Wɛ ya na bere‑o tei to. 17Bena yalei bene dem boboa chana kam boboa dɛ dem ne mo ba déem chwi wara-jei sem. 18Moses ma pa ba chwi vwei dem ywoa yam ya luuru tem baŋa ne, se ba daare ba tore dagare sem da. Ba ta ma chwi da-dɛɛro tem. 19O ta ma kwei gwaaro telo na kwoli wara-vwei dem yuu kom to o pu ko jei ne, ye o daare o kwei tankwallo tem o daŋe te baŋa ne. Ko maama déem ke ko tɔge nenɛɛne Baŋa Wɛ ya na bere‑o tei to.

20Moses ma kwei Wɛ ni-gwonim kandwa-pelɛ selei sem o tiŋi dakaa kam wone. O ta ma kwei dɛ selo na wó taa mae se zeŋe dakaa kam to o tore ka kwana yam wone. O ma daare o kwei wɛleera saarem ni-pugu kom o pu ka ni. 21O laam ma ja dakaa kam o zo o zege wara-vwei dem wone, ye o kwei gare-jale dem o maa che Wɛ di-yun-gala kam se dakaa kam taa wora. Ko déem ke ko tɔge kolo maama Baŋa Wɛ ya na bere Moses se o ke to.

22Moses ta ma ja tabolo kom o zo o zege wara-vwei dem baŋa seeni, gare-jale dem yiga ne. 23O ma tiŋi bworobworo ko baŋa ne, se ko taa wo Baŋa Wɛ yiga ne, nenɛɛne Wɛ na bere‑o se o ke tei to.

24O ta ma kwei min-zwon-zego kom o zege se ko maŋe de tabolo kom ye ko wo vwei dem tega-kuri seeni. 25O ma zege min-zwonnu terepɛ tem maama te zega jei ne, se te taa wo Baŋa Wɛ yiga ne, nenɛɛne Wɛ na bere‑o se o ke tei to.

26Moses déem ma zege sabu-seŋa talwoŋ-ywoŋa dakaa kam gare-jale dem yiga ne. 27O laam ma zwɛ talwoŋ-ywoŋa ka baŋa ne, nenɛɛne Baŋa Wɛ na bere‑o se o ke tei to. 28O ta ma pa se ba kwei gare-jale dedwoŋi dem ba che wara-vwei ni dem.

29Moses laam ma kwei zwɛɛm kaanem dakaa kam o zege konkɔlɔ kom ne, vwei dem ni yiga ne. O ta ma kwei vara de muni pɛɛra o ke kaanem de baŋa ne. O déem ke ko maama se ko tɔge Baŋa Wɛ ya na bere‑o se o ke tei to.

30O ma kwei ware-zoŋa kam o zege kaanem dakaa kam de wara-vwei dem tetare laŋa ne. O ma pa se ba mɔ na ba ke da se kaanem tiina taa wae ba zare ba tete. 31Moses de Aron, dedaane Aron bia bam maa zege ko yiga ne ba zare ba jea dedaane ba nɛ sem. 32Maŋa kalo maama ba ná lage ba ke kaanem dakaa kam baŋa ne, naa ba ná zo vwei dem wone, ba jege se ba zare ba tete konto mo, se ko tɔge Baŋa Wɛ ya na bere Moses se o ke to.

33Moses laam ma pa se ba che konkɔlɔ ba kaare wara-vwei dem de kaanem dakaa kam maama. O ma kwei gare-jale delo na wó che ko manchwoŋo ni dem to o pale da. Konto na ke to, Moses déem ma ti totoŋe dem maama.

Baŋa Wɛ nenɔŋ-fɔrɔ kom

34Kunkwoŋo kom déem ma chu ko kwoli wara-vwei dem pa se wara-jei sem maama su de Baŋa Wɛ nenɔŋ-fɔrɔ kom. 35Moses daa ware se o zo vwei dem wone, kunkwoŋo kom de Wɛ nenɔŋ-fɔrɔ kom ŋwaane.#Nwoŋim 13:21-22; 2 Tigisim 5:13-14

36Isarele tiina bam veiŋa maama wone, kunkwoŋo kom ná yeini ko zaŋe wara-jei sem ne, ba de wó zaŋe ba tɔge ba via mo. 37Kunkwoŋo kom nam ná maŋe da, ba de wó maŋe jei sem konto ne se ko taa nii maŋa kalo ko daa na wó zaŋe to. 38Ba ná wo mɛ maama ba veiŋa wone, Baŋa Wɛ wo ba tei ne mo. Wea ne mo kunkwoŋo kom yeini ko dɔge wara-jei sem yuu ne. Ko maa ná ye tete ne, mini mo wo kunkwoŋo kom yera ne de pae pwooni.

Currently Selected:

Nwoŋim 40: KBG

Highlight

Copy

Compare